LUNGLEI DISTRICT UPC MOTOR (JEEP) HMASA BER NEIH DAN

MOTOR NEIH DAN :

Kum 1980 October thla tir a PYD District inkhawmpui, Cherhlun khuaa neihah chuan ‘Lalpa leh a ram tana rawngbawltute, a bik takin District hruaitute motor chang a, ni sa leh ruah sur hnuaia an awm thinzia leh motor rem tak loh avanga Programme pawimawh tak tak hmang remchang lova an awm thinna te chu mipui pawhin an tuar em em thin tih hriain Kohhranpui leh LAD nen tangrualin target a kan neih chuan kum-3 hnuah motor kan nei thei ang,’ tiin a lo rel a. Hetiang a lo nih chuan hotute pawh an inhmang daihzai thei tawh dawn tih pawh an thlir a. Chumi kal zelah chuan District board chuan kum 1981 chhungin PYD leh LAD nen Rs. 5000/= theuh target phawt ila, tichuan kum khat target chu Rs. 15,000 niin, kum thum chhung chuan recondition tha kan lei ang chu tih a lo ngaihtuah ve ta a. Hetih lai hian, Rev. HL.Ruata chu America ah Bible College kalin a awm mek a.

Kum 1981 May thla vel chuan mak takin Rev. HL.Ruata chuan America lam a mi-thianghlim ten rawngbawlna atana hman tur, Motor lei nan Rs. 16,720.00 hu an pek thu leh a rawn hawn dawn thu District lamin an lo hriat chuan an lawm hle mai. Rev. HL Ruata chuan a chhunzawmna tur pawisa awm sa keng a, Gauhati a lo hmuak turin Rev. H.Chalchhunga chu a rawn chah ta a, Lalpan kan dilna leh thahnemngaihna hmun khatah a lo luankhawm tir a ni. Kum thum vela nei thei tura kan rilruk chu Dt. 1.8.81 khan Rev. HL.Ruata rawn hawn Rs. 16,720.00 leh kohhran ten an thawhkhawm Rs. 13,280.00 infin (Rs. 30,000/=) chuan Gauhati ami lei a lo ni ta a ni. Lalpan kan mamawh Motor chu khitiang khian Lunglei District UPC min pe ta a ni.

MOTOR HMING TUR LEH A NUMBER :

District board-in a rel angin, a neitu chu ‘Lunglei District UPC’ a ni ang. District Pastor-te chu District aiawh a neitu chan chang ber an ni ang.

He Motor hming atan hian, ‘Christian Life Centre (UPC)’ tih a ni ang. Motor number chu Sorkar lam Register number angin, ‘ZRM 5059’ a ni ang.