BEIHRUAL

Pastor Lallawmsanga

Thu Ziah Hawnna:
Mim Kut thla (September) hi Mizorama Kristiante tan chuan “Beihrual Thla” kan tih mai thin hun pawimawh tak kha a ni a, Kohhran hrang hrang ten Thupui thlan bik hmangin kan beihrual leh mup mup mai dawn a ni. Mumal taka Mizoramah September thla Beihrual hun atan kan hman thin hi Kum 1925 atangin a nih hmel. Kum 1918 ah June, 1919 leh 1920 ah September, 1921 ah January, 1922-1924 ah April thlaah te hman thin a ni awm e. (Presby. Oct 1920 No.25, Oct 1921 No.33, Assembly 1925 Jan No.18).

Mizoram-ah Beihrual kan lo hman tan dan:
Kum 1918 March thla khan Hmunhmeltha khuaah Mizoram Kohhran chhim leh hmar infinin Inkhawmpui neih a ni a, Palai 1700 vel zet an kal khawm a ni. Hetih lai hian Mizoramah ringlo an la tam zawk a, kalkhawmte hian mi pakhatin sawm zel changin Pathian thu hril nise chu chu a rualin bei I la, ringlo ho chu hneh vek ang u, tiin Beihrual hi an rawt chhuak ta a ni tiin mi thenkhat te chuan an sawi .
Rev Saiaithanga chuan hetiang hian a lehkhabu ziahah Beihrual a lo pian chhuah dan a sawi, “ Khatih hun lai khan ringtute chu ngui leh chau takin an awm chho leh a, a then an hnungtawlh a, thawhlawm thleng pawhin a lo tuar chho ta a, Kum 1917-a Tirhkoh tirh chhuah 7 te chu thawhlawmin a daih loh avangin an hlawh bi cheng 10 chu cheng 8 a tihhniam a ni a. Tichuan ringtute intihchak tawnna leh ringlote beihna chu hnapuia neih an duh ta a ni “ tiin a sawi (Mizo Kohhran Chanchin phek 54-56, 58) Tichuan Kum 1918 June thla atangin Mizoramah Beihrual hi neih tan a lo nita a ni. (BCM Kohhran hian kum 1926 ah Beihrual neih hi an rel a, Kum 1927 January atangin an nei tan ve thung.)

UPC leh Beihrual:
Beihrual Thupui zir ve tur a kan relna hmasa ber chu kum 1963 kha a ni a, (N Mizoram District Board Rorel No 10-na). Kan hman tan kum tak hi chu Kum 1965 ah khan a ni thung. (Mizoramah Beihrual an hman tan atanga chhutin a kum 47-na velah keini Kohhran chuan kan hmang tan ve tihna a nih chu.!) A tan tirah chuan Beihrual Thupui zir tur hi a buin siam nghal a ni mai lova, thupui thlan chhuah a kha lehkha phekin siam a ni a, chu chu hman thin a ni. Beihrual Thupui a bu a kan tih chhuah hmasak ber chu Kum 1976 kha a nih hmel. 35th District Board, S Mizoram Roel No 13-na hian Beihrual thuzir bu neih a rel a. Kum 1976 ah Rev H. Chalchhunga ziak kha inkhawm loh zan apiangin an lo zir thin a ni.
General atanga bu khat kan intawm hi Kum 2005 atangin a ni a, hei hi kum 2004 General Conference Rorel No 1-nain , “NE India pum puiah Beihrual Thupui pakhat zir ho ni se,” tih a rel bawhzuina a ni.

Kum sawm (10) chhunga Beihrual Thupui kan zir te chu:

• 2017: Pentecost mite leh Thlarau thianghlim
• 2018: Kohhran Zirtirna leh Ni pawimawh.
• 2019: Thuthlung fate Puitlinna.
• 2020: Chhunglam leh pawn lam Thianghlimna
• 2021: Covid Pandemic vangin zir theih loh niin a lang.
• 2022: Chhandamna Lawng.
• 2023: Ramthim Rawngbawlna.
• 2024: Thuawihna
• 2025: Ringtu leh Kohhran
• 2026: Pentecost mite Pathian Fakna leh Chawimawina

[BCM chuan tun kum 2026 Beihrual thupuiah, “Kan hmachhawn Khawvel”tih thu mi hrang hrang ziah an zirho ang a, Thupui sawm a ni a, zan sawm an zir dawn tihna a nih hmel. .Mizoram Synod chuan, “Mizo Kristian hlate leh a phuahtute” Rev Lalfakzuala ziah chu Nilai leh Beihrual Thupui atan an zirho tur a ni ve thung dawn a ni.]

Thu Kharna:
Beihrual hi hlawk taka hman tum ila, kohhrante puitlinna lam kawng a min hruai hi Beihrual hian a tin zawn ber a nih avangin, kan thupui zirho leh sawihona reng reng hi Kohhran kal dan phung leh inzirtirna kalh leh sawihnawm zawng nilovin, Kohhran duh dan ang zel a hlawk taka zir kan tum tlan hi a pawimawh a ni.