RINNA THUTE

INNGHAHNA THUHMA (PREAMBLE)

Bible hi Pathian thawkkhum, Pathian thu, dik lo thei lo a nih kan ring a. “Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni.” (2Tim. 3.16).

Bible chauh hi mihring neih phak zinga Pathianin thuneihna a pek awmchhun a ni a, chumi avang chuan heng: thuthlung te, rinna te, beiseina te leh kohhran inrelbawlna zawng zawngte hi Bible nen a inmilin, chutah chuan a innghat tur a ni. Khawvel hmun tina mitin rengten an chhiar tur leh zir tur a ni a, Thlarau Thianghlim hriakthiha awmte tan chauhva hriatfiah theih a ni (1Jn. 2.27). “Pathian Lehkhaa thu hrilh lawk reng reng hi mahniin hrilhfiah tur a ni lo tih hre hmasa phawt ula. Thu hrilh lawk reng reng hi mihring thuchuak a ni ngai si lo va, miten Thlarau Thianghlim tirhin Pathian hnen ata an sawi zawk thin a ni” (2Pet. 1.20-21).

THURIN BULPUI

He Pawl thurin leh innghahna bulpui ber chu Bible-in chhandamna famkim a tih, simna te, sual ngaihdam nana Lalpa Isua hminga tuia hnima in baptis te leh, Thlarauvin a tawngtir ang zela tawnghriatlohva tawng theihna telin Thlarau Thianghlim baptismate hi a ni.

Rinna hmun khata kan luanza hma chu, Thlarau Thianghlima inpumkhatna kan zawng fovin, inpumkhat lohna thlen thei hiala an ngaihdan inan lohnaa inhnial lo hram turin kan unaute chu kan zilhhau tur a ni.

PATHIAN PAKHAT

Chatuan Pathian pakhat, nung reng, thiltihtheihna tawp chin nei lo, thianghlim famkim leh Pathianna famkim then hran theih loh neitu chu kan ring a. He Pathian tak pakhat hi amah ngei chu Pa angin, tlannaah chuan Fapa angin, luan chhuahna lamah chuan Thlarau Thianghlim angin a inlar a ni. (1Kor. 8.6; Eph. 4.6; 2Kor. 5.19; Joel. 2.28).

Pathian lehkha thu chuan Pathian a awm ngei tih a tihfiah bakah, Pathian hriatnain tawpchin a neih lohzia a nemnghetin a puang chhuak a ni. (Rom 1.19, 21, 28, 32; 2.15). Pathian chu hmuh theiha taksa ruangam nei a ni lo va, tawpchin nei lo a ni. Thlarau a ni a (Jn. 4:24), “Thlarau chuan ruh leh tisa a nei lo” (Lk. 24.39).

Thu pek zawng zawnga ropui ber chu hei hi a ni, “Israel mite u, ngaithla teh u, Lalpa kan Pathian chu Lalpa pakhat chauh a ni,” (Mk. 12.29) (Deut. 6.4 en bawk la). “Engkim Pathian leh Pa pakhat chauh a awm a, ani chu engkim chungah a awm a, engkim fang chhuakin a awm a, engkim chhungah a awm bawk a ni,” (Eph. 4.6).

He Pathian pakhat hi tisaa a lo chan hma chuan kawng hrang hrangin a inlantir a. Tisaa a lo channaah chuan, amah leh amah Fapaa insiamin mihringte zingah a lo cheng a, a van lawn hnuah chuan amah bawk chu Thlarau Thianghlimin a inpuang chhuak a ni.

PATHIAN FAPA

Pathian tak pakhat, Thuthlung Hluia Jehova chuan mihring nihna ang a rawn inbel a, mihring fapa angin mithianghlim Mari lakah a lo piang a ni. Paula’n, “Tin, Pathian ngaihsakna thuruk chu hnial rual lohvin a ropui a ni; tisaa lo lang a, Thlarauva thiam chang a, vantirhkohte hmuh a, Jentail-te zinga tlangaupui a, khawvelah hian mite rin a, ropuinaa hruai chhoh taka chu,” tia a sawi ang khan. (1Tim. 3.16).

“Amaha mite hnenah a lo kal a, amaha miten an lo lawm si lo” (Jn. 1.11). Pathian tak pakhat chauh chu tisaah a lo chang a, chu chu Fapa Isua Krista a ni. “Pathianin Kristaah chuan khawvel hi amah nen inremin a siam a, an bawhchhiatnate chu bawhchhiatna-ah ruatsak lovin” (2Kor. 5.19).

“Amah (Isua) ah chuan Pathian famkimna chu taksa neiin a awm reng si a” (Kol. 2.9). “Amahah chuan engkim amah nen inremtir hi Pa lungnih zawng tak a ni si a” (Kol. 1.19) tih thute hi kan ring a ni. Chutichuan Isua chu mihrinna lamah chuan mihring a ni a, a Pathianna lamah chuan Pathian famkim a ni. A tisa chu B?ramno emaw, Pathiana inthawina emaw a ni. Pathian leh mihringte inkara palai awm chhun chu a ni. “Pathian pakhat chauh a awm a, Pathian leh mihring inkarah palai pakhat chauh a awm bawk a, amah chu mihring a ni, Isua Krista chu” (1Tim. 2.5).

Isua chu a Pa lamah chuan Pathian mithianghlim a ni a, a nu lamah chuan mihring a ni. Chuvangin Pathian fapa leh mihring fapa emaw, Pathian mihring tih a lo ni ta a ni.

“Ani chuan a ke hnuaiah engkim a dah a, nimahsela, a hnuaiah engkim dahin a awm” a tih hian, a hnuaia engkim dahtu chu a tel ve lo tih a lang reng a ni. Tin, a hnuaiah engkim dahin a awm hnu chuanFapa ngei pawh chu a hnuaia engkim dahtu hnuaiah chuan dahin a awm bawk ang. Pathian chu engkima engkim a nih theihna turin (1Kor. 15.27-28).

“Kei Alpha leh Omega ka ni, Lalpa Pathian Awmmeka leh Awmtawha leh Lolaawmtura, Engkimtitheia chuan a ti a ni,” (Thup. 1.8).

HMING CHU

Thuthlung Hluiah chuan Pathianin nihna hming hrang hrang ‘Pathian Elohim’ tih te, ‘Pathian engkim titheia’ tih te, ‘El Shaddaia’ tih te, ‘Jehova’ tih te a hmang a, a bik takin “Lalpa Jehova” tih hi chuan tlantu a nihna lam a kawk a ni.

“Kan tan naupang a lo piang a, fapa pekin kan awm ta a......hmingah chuan Maka, Remruattua, Pathian chaka, Chatuan Pa, Remna Lal an ti dawn si a,” (Is. 9.6). He Isaia hrilhlawk hi Pathian Fapa hming sak a nih khan hlenchhuah a lo ni ta a. “Fapa a hring ang a, a hmingah Isua i sa ang; ani chuan a mite an thil tihsual lakah a chhandam dawn si a” a ti a (Mt. 1.21).

“Mi dang tuma hnenah chhandamna a awm lo; van hnuaia mihring sak zingah, min chhandam tur hming dang reng a awm lo,” (Tirh. 4.12).

MIHRING SIAMNA LEH A TLUKNA

Mi zawng zawng hi Pathianin ama anpui ngeia a siam an ni a (Gen. 1.27). Chuvangin, mihring zawng zawng hian Pathianah chuan hlutna awmsa an nei theuh a, chu chu zah taka vawn tlat tur a ni. Mihring nunna hi Pathian hnen atanga thil pek thianghlim a ni a: chuvangin, chu mihring nun thianghlim chu a lo pian chhuah hnu lehpum chhunga a awm lai pawhin kan ngai hlu a ni (Sam 139.13-16). Chutih lai chuan, suala tluknain a nghawng khawvelah kan cheng a. A tir berah chuan Pathianin mihring chu pawi sawi lo, sual kai lo leh thianghlimin a siam a; mahse, thu awih lohna sual avangin, thlahtu bul Adama leh Evi te chu dinhmun thianghlim atang chuan an tlu a, Pathian chuan Eden huan atangin a hnawt chhuak ta a (Gen. 3.1-24). Chuti chuan, mi pakhat thu awih lohna avangin, sual chu khawvelah a lo lut ta a ni (Rom 3.23; 5.12).

Sual hi Pathian zah lohna a ni mai lo va, mihringte tana thil pawi leh hlauhawm zar peng tam tak a keng tel a ni. Kaina’n Abela a thah hnu atang khan, mihring nun kawng chanchin chu hleih neihna leh thil tih sualin a luah ta a. Eng pawh ni se la, tlan chhuah mihring kan nih angin, mi zawng zawng tan Pathian hmangaihna leh enkawlna chu lantir kan tum a ni (Mt. 5.46-48 & Rom 5.5). Chuti chuan, mitin kan enkawlna chuan mi zawng zawng, mipa leh hmeichhia te pawh, chi emaw, hnam emaw, theihna emaw, pian chhuahna ram emaw thliar loin Pathian hmaah chuan hlutna kan nei vek tih a lantir tur a ni (Gal. 3.26-28).

Chuti chuan, kohhran chu tawng leh mihring, chi tin leh hnam hnam tin atanga Isua Krista thisenin a tlante leh piang tharte kal khawm chu a ni (Thup. 5.9). He leia kohhran hian vana kohhran inpumkhatna leh awm khawmna chu a zawng reng tur a ni.

TLANNA

Kan Lalpa Isua chu “Boralte zawnga chhandam turin . . . a lo kal a ni” (Lk. 19.10). Pathian Beramno thisen hmangin Pathianin tlanna min siamsak a, chu ngei chu chhandamna awmtirtu, a innghahna lungphum chu a ni. A chhan chu “. . . thisen chhuah lohvin ngaihdamna reng a awm lo” (Heb. 9.22). “. . . a thisen avangin amahahchuan kan tlanna kan nei a ni - a khawngaihna ngahzia ang zela kan bawhchhiatnate ngaihdamna chu” (Eph. 1.7). “...min hmangaiha, a thisenin kan sualte lak ata min tlan chhuak a...” (Thup 1.5). Chhandamna chu rinna avanga khawngaihnaa lo awm a ni a; chu chu Isua Krista tlanna, a thihna, phumna leh thawhlehnaah chuan a innghat a ni.

SIMNA

Sual ngaihdamna hi simna tak tak inchhirna leh sual hawisanna avanga chan a ni a. Lalpa Isua Krista rinna avangin thiam kan chang a (Rom 5:1). Baptistu Johana’n simna thu a hril a, Isua pawhin a tlangau pui bawk a, zirtir hote pawhin chu bawk chu Juda leh Jentail-te hnenah uar takin an puang ta zel a ni (Tirh. 2.38; 11.18; 17.30).

“Simna” tih thumal hi Grik tawng thumal hrang hrang atanga lak a ni a, a awmzia chu thlir dan leh tum dan thlakthleng, rilru thlakthleng, ngaihtuahna thlakthleng, nundan thlakthleng leh danglam tihna a ni.

Isua chuan, “....insim loh chuan in boral vek ang” a ti a ni (Lk. 13.3).

Luka 24:47- ah chuan, “Ama hmingin simna thu leh sual ngaihhnathiamna thu Jerusalem khuaa tanin, hnam tin hnenah an hril ang,” tiin a sawi a ni.

TUI BAPTISMA

Pathian lehkha thu anga Baptisma chan dan chu hnim phum a ni a, an khawvel ngainatna leh an sualna ata hawikir a, sim takzette tan a ni. Kohhran Danin Baptisma chantir thei tura aruat rawngbawltuin Pathian thu zawmin Tirhkohte 2.38; 8.16; 10.48; 19.5 thu dung zuiin Lalpa Isua Krista hmingin a chantir tur a ni a; tichuan, Matthaia 28.19 thu hi a zawmin a hlen chhuak a ni ang.

THLARAU THIANGHLIM BAPTISMA

Matthaia 3.11-ah Baptistu Johanan, “Thlarau Thianghlim leh meiin a baptis ang che u,” a ti a.

Tirhkohte 1.5-ah chuan Isuan, “Ni rei lotean Thlarau Thianghlimin baptisma in chang ang,” a ti.

Luka chuan Tirhkohte 2.4-ah chuan, “An zain Thlarau Thianghlimin an khat ta vek a, Thlarauvin a tawngtir ang zelin tawng dangin an lo tawng ta a,” tiin min hrilh.

Thlarau Thianghlim leh meia baptis tih te, Thlarau Thianghlima khat tihte leh Thlarau Thianghlim pek tih te hi Bible-ah awmze thuhmun, sawi thlakthleng theih vek a ni.

Thlarau Thianghlim thilpek dawngtute, tihkhahte emaw, baptis-a awmte emaw chu taksaa langchhuak, tawnghriatlohva tawngna chang ngei tura beiseina hi Pathian thu kalhmang a ni.

Tawnghriatlohva tawngna Tirhkohte 2.4; 10.46 leh 19.6 a chuang leh tawnghriatloh thil pek 1Korinth bung 12 leh 14-a hrilhfiahnate hi awmze thuhmun an ni a, a hman danah leh a tum lam erawh a hrang deuh mai a ni.

Lalpa chuan zawlnei Joela kaah, “Mi zawng zawng chungah ka Thlarau ka leih ang,” a ti a. (Joel. 2.28).

Petera chuan amah ngeiin mak taka a lo chan tawh dan chu hrilhfiahin, “Thlarau Thianghlim tiam chu Pa hnen ata a hmu a, in hmuh leh in hriat hi a (Isua) han leih ta a nih hi,” a ti a ni. (Tirh. 2.33).

“A tiam kha nangni tan pawh, in fate tan pawh, hla taka mi zawng zawng tan pawh, Lalpa kan Pathianin a hnena a koh apiangte tan a ni e,” a ti bawk a. (Tirh. 2.39).

PATHIAN TIH DAMNA

Israel fate Aigupta atanga hruaichhuah an nih hnua Lalpa Jehova’n an hnena thu a thlun hmasak ber chu tihdamna thu a ni. Lalpa chuan, “Lalpa i Pathian aw hi ngun taka in ngaihthlak a, a mit hmuha tha a tih zawngte i tih a, a thupekte i ngaihsan a, a thu ruat zawng zawngte i pawm chuan Aigupta chunga hri ka lentir tak angte kha i chungah reng reng ka lentir ve lovang; Kei Lalpa a tidamtu che (Jehova-Rapha) ka nih hi,” a ti a. (Exo. 15.26).

Kan Lalpa Isua Krista chuan Ram chanchin Tha chu hrilin, mite zingah natna tinreng leh chaklohna tinreng tidamin Galili ram zawng zawng a fang vel a. (Mt. 4.23, 24).

“Isua Krista chu niminah nen, vawiinah nen, kumkhua pawhin a pangngaiin a awm fovang” (Heb. 13.8).

Lalpa Isua Krista tuarna tinrengte chu kan taksa tihdam nana pek a ni a, kan thlarau chhandam nan pawh a ni nghal a, “A vuakna vualtea tihdamin kan awm ta”. (Is. 53.5; 1Pet. 2.24). Matthaia 8:17-ah chuan, “Amah ngeiin kan chak lohnate a la a, kan nate a phur a,” tih a ni bawk.

Tichuan, kan taksa tana Pathian tihdamna chu tlanna atangin kan hmu a ni tih hi a dik a, chu chu a ring apiangte tan a lo ni ta a ni. Isuan ringtute chungchang a sawinaah, “Damlote chungah an kut an nghat ang a, an dam zel ang,” a ti a ni. Chumi hnu lamah chuan, Jakoba chuan Kohhrante hnena a lehkhathawnah chuan, “In zingah damlo an awm em ? Kohhran upa kohtir sela, ani’n Lalpa hminga hriak hnawihin a chungah tawngtaisak rawh se; tin, rinnaa tawngtaina chuan damlo chu a chhandam ang a, Lalpa chuan ani chu a kai tho vang; tin, thil a lo tihsual tawh chuan ngaihdam sak a ni ang. Chutichuan tihdama in awm theih nan in sualte thupha chawi tawn ula, in tawngtaisak tawn thin rawh u. Mi fel tawngtaina chuan thil nasa tak a ti thin,” tiin a ziak a ni. (Jak. 5.14-16). Heng thutiam zawng zawngte hi tunlai Kohhran tan hian a ni.

SACRAMENT

Kan Lalpa mantir a nih zanah khan a zirtirte Kalhlen Kut chaw a ei pui a, chumi hnu chuan Sacrament (Lalpa zanriah) hi a siam chhuak ta a ni. Tin, chhang a la a, lawmthu a sawi zawhin a phel a, an hnenah a pe a, “Hei hi ka taksa, in aia pek tura chu a ni, mi hriat reng nan hei hi ti thin rawh u,” a ti a. Tin, Zanriah ei zawhin chutiang bawkin no chu a la a, “He no hi ka thisena thuthlung thar chu a ni, in aia chhuak tura chu,” a ti a. (Lk. 22.19-20).

Paula chuan Kohhrante chu a hman dan a zirtir a, (1Kor. 11.23-24).

Chutiang chuan chhang leh Grep rah tuite chu a taksa vuak thitlin tur leh a thisen chhuak tur entirna atan buatsaih an lo ni ta a. Sacrament kilnaah hian Thlarau lam tan awmze thuk tak leh malsawmna a awm a ni.

KE SIL

Johana 13.4-5-ah heti hian kan chhiar a, “A zanriah chaw kil chu a thova, a puante a dah a, inhrukna puan a la a, a veng a. Tin, Maihunah tui a bun a, zirtirte ke a sil ta a, inhrukna puan a ven chuan a hru zel a,” tiin.

Isua chuan, “Kei, Lalpa leh zirtirtu mahin in ke ka sil chuan nangni pawhin in ke in insilsak tur a ni. In chunga ka tih ang hian nangni pawhin in tih vena turin ka tihhmuh che u a ni si a,” a ti a (Jn. 13.14,15).

He thu hi kan Lalpa min pek a ni a, Pathian tihchhuah ngei a ni. Min tihhmuhna hi a zui tlakin, ke kan insilsak tur a ni a; tichuan, inngaihtlawmna kan lanchhuahtir a lo ni ang.

THIANGHLIMNA

Pathian mite chuan Pathian fate nun dan an lan chhuahtir tur a ni. Pathian thuin min hrilh angin, nundan mawi leh entawn tlakin kan nung tur a ni. “Mi zawng zawng hnenah chhandamna rawn thlenin Pathian khawngaihna a lo lang ta si a; Pathian ngaihsak lohna leh khawvel chaknate bansanin, tunlai khawvelah hian insum leh fel tak leh Pathian ngaihsakin kan awm tur a ni tih min zirtir a,” (Tit. 2.11-12). “Krista pawh khan a tuarsak che u avangin, hetiang ti tur hian koh in ni asin; a hniak hnung in zuina turin entawn tur a hnutchiah che u kha. Ani chuan thil reng a tisual lova, a kaah ngamthlemna a awm hek lo; mi hauva a awm laiin a hau ve thung lova; a tuar laiin a vau lova, fel taka ngaihtuah thintua hnenah chuan a inpe zawk a ni (1Pet. 2.21-23).

“Mi zawng zawng nena inremna leh thianghlimna um rawh u, chumi thianghlimna lovin tuman Lalpa an hmu lovang,” (Heb. 12.14).

“A kotu che u a thianghlim angin nangni pawh in chetzia zawng zawngah lo thianghlim zawk rawh u, nangni in thianghlim tur a ni, kei ka thianghlim si a, tih ziak a nih kha. Tin, thlei bik nei lova mi tin hnathawh ang theuhva ngaihtuah thintu chu Pa anga in lam chuan heta in cham chhung zawng tih dekin awm rawh u; inthlahtute pek chhawn, in awmdan engkhaw ni lawilo lak ata chu, thil chhe thei, tangka leh rangkachaka tlan in ni lova, Beram no hmelhem lo leh bawlhhlawh kai lo thisen anga Krista thisen hlu chuan tlan in ni zawk tih in hre si a,” (1Pet. 1.15-19).

Kan mite chu Kristian tha leh Pathian mi nihna atana tangkai loheng: Lemchanna hmun bawlhhlawha tel te, khawvel nawmchenna thila lam te, leplerh taka inchei te, khawvel thil taka intihhlimna tha lo leh music thianghlim lo lakah te an insum tur a ni. Chumi bakah Kuhva ei te, zuk leh hmuam leh ruih theih thil tih te leh tawng mawi lo hmante hi khap a ni. A Kohhrante lam tura kan Lalpa lokalna a hnaih tawh avangin Thlarau nun tih hmasawn nan heng thil chin tha lote lakah hian kan mite chu an fihlim tur a ni.

PATHIAN KHAWNGAIHNA

“Mi zawng zawng hnenah chhandamna rawn thlenin Pathian khawngaihna a lo lang ta si a...... Pathian ngaihsak lohna leh khawvel chakna te bansanin, tunlai khawvelah hian insum leh fel tak leh Pathian ngaihsakin kan awm tur a ni tih min zirtir a” (Tit. 2.11-13).

“Dan thu Mosia’n a pe a, khawngaihna leh thutak Isua Krista avangin a lo awm,” (Jn. 1.17).

Ringtu chu invawng hima Pathian nena leng dun tur a niin (Jud. 21), Pathian hmangaihnaah a inkawltir tur a ni. “Khawngaihna” awmzia chu “Duhsakna” a ni. Miin a bawhchhiata Pathian lakah a sual chuan a duhsakna a chan a ni. Thil sual a tih zawm zela a sim loh chuan a tawpah a bo hlenin meidilah paih a ni ang. (Jn. 15.2, 6; 2Pet. 2.20,21 chhiar rawh). Juda pawhin a hun laia hnungtawlhte leh an chan tur a sawi a ni. (Heb. 6.4-6 chhiar tel rawh).

“Rinna avanga khawngaihnaa chhandam in ni; nangmahni thawhchhuah a ni lova, Pathian thilpek a ni, thiltih avang a ni lo ve, chutilochuan, miin an chhuang dah ang e” (Eph. 2.8-9).

ENGKIM SIAM THATNA

Egkim siamthat thu hi leilung piantirh ata Pathianin a zawlnei thianghlimte kain a sawi tawh tih Pathian lehkha thu atangin kan hria a ni. (Tirh. 3.21). Hei hian Diabola leh a tirhkohte leh misualte a huam ve lo (Thup. 20.10).

A RUKA PAWL DINGTE

Pathian thu angin Pathian mite chuan a ruka pawl dinah emaw pumkhata inhlawm rute reng reng, ringlo mite nena inpawlhona ang chi chhechham meuhva inphuarhlawmnaahte chuan telna an nei tur a ni lo tih hi kan ringin kan pawm nghet tlat a ni (Jak 5.12; 2Kor. 6.14-18).

MI THIANGHLIMTE TIH DANGLAMNA

Kan Lalpa lo lan hun chu a hnai tawhin kan ring a, chutih hunah chuan Kristaa thi tawhte chu an tho ang a, keini nungdama lo la awm rengate pawh boruakah Lalpa hmuak turin anmahni rualin lak chhohvin kan awm ang.(1Thes. 4.13-17; 1Kor. 15.51-54; Phil. 3.20,21).

INNEIH LEH INTHEN

“Tupawh inngaihna sual a vang ni lova nupui maa mi dang nei apiang chu uire a ni” (Mt. 19.9; 5.32). He sualnaah hian mi a lo tlukin a tisual lotu zawk chuan mi dang neih leh theih a ni. Amaherawhchu, rawngbawlna kawnga tha zawka a inpek theih nan mi dang nei nawn tawh lo sela tih chu kan duh dan a ni.

SAWMA PAKHAT

Sawma pakhat hi Pathianin a hnathawh chhawmdawl nana a ruahman a nih kan ring a, Abrahama hun lai atanga lo awm tawh a ni. Abrahama hunah chuan sawma pakhat pek chu rinna nen a inkawp a, Mosia danah chuan thu pek (order) a ni a, Pathian mit an tlun lai chuan Israel-te khan an pe reng a, Isua pawhin a nemnghet a ni (Mt. 23.23). Paula pawhin Pathianin a tih hmuingil ang zela dah hran tur a ni, a ti a ni. Ama chanpualah Pathian chu rawk suh – Sawma pakhat leh thawhlawmah te hian. (Mal. 3.8-9).

ISUA LO KAL LEHNA

Isuan, vana a lawn lai ang chiah khan amah ngei a lo kal leh dawn tih chiang takin a sawi a; zirtirte pawh khan Kohhran din tantirh lai khan an hrilin an zirtir thin a. Chuvang chuan tun laia Pathian fate pawh hian thil ropui tak lo thleng tur chu thahnemngai tak leh beiseinaa khatin an thlir reng a ni. (Mt. 24; Tirh. 1.11; 3.19-21; 1Kor. 11.26; Phil. 3.20-21; 1Thes. 4.14-17; Tit. 2.13-14).

KUM SANG ROREL

Lei chungah hian chhiatna a lo thleng ang a, chu chu lungngaihna intanna a ni ang a, a zual zel ang a, “Buaina hun, hnam awmtirh ata chumi hun lo thlen thleng pawha la awm ngai lo chu a awm ang” (Dan. 12.1) (Mt. 24.3-8 en bawk rawh). Chu buaina hun chu ni hlimawm zawk Kum sang lalram khawvar engin a rawn zui ang a. Chu Kum Sang lalramah chuan mihringte tana duhthusam leh muanna lei chungah hian a awm tawh ang, tih kan ring. (Thup. 20.1-5; Is. 65.17-25; Mt. 5.5; Dan. 7.27; Mik. 4.1-2; Heb. 2.14; Rom 11.25-27).

RORELNA HNUHNUNG BER

Kum sang khat chu a vei hnuin rorelna hnuhnung ber, Lalthutphah var hmaa ding turin mitthi dang zawng zawngte thawh lehna a lo awm ang a, tu hming pawh Nunna Bua chuang lo apiang chu meidil, kata kang hluah hluah, Pathianin ramhuai lal leh a tirhkohte tana a buatsaihah chuan paih an ni ang a, Setana ngei chu paih hmasak ber a ni ang. (Mt. 25.41; Thup. 20.7-15; 21.8).