United Pentecostal Church, Lunglei District

1. United Pentecostal Church, Lunglei District lo pian dan

Mizoram chhim bial (Lunglei District leh Chhimtuipui District) ah Pentecost kohhran a din tirh atangin khawvel mite hmuhsitna karah, kan mi hmasate thahnemngaihna leh thawhrimna avangin kohhran a pung chak em em a; hriat theih chinah kum 1952 ah chhim bial a kohhran hmasa ber, Tarpho Local-a ding a. Chumi kum atanga a kum thumna, kum 1955 ah chhim bialah chuan Pentecost kohhran chu khaw 39 ah a ding hman a ni. Chutih lai chuan Pastor pakhat Rev. Lalthima chauh kan nei nghe nghe.

Chhim bial (tunah chuan District 3 a piang ta) pumpui chu Pastor bial khatin a awm a. Circle Conference tiin, kumtin inkhawmpui an lo nei thin a. Kum 1963 atangin chhim bial chu Circle hnihah thenin, Pastor Lalthima bial leh Pastor J. Laltluanga bial tiin a hran ve ve in Circle Conference chu neih a ni ta a. Kum 1964 ah Circle thumah insiamin inkhawmpui a hrang theuhin neih leh a ni.

Hmar chhak bial (Tuichangral, N.Vanlaiphai leh a chheh vel zawng zawng) Pastor Lalbiakthangan a bial a. Chumi bial leh Chhim bial te chu hun engemaw chen a huhovin inkhawmpui an nei ho thin a, chu chu ‘District Conference’ tih a ni thin.

Kum 1962 atangin District conference a hrana nei tura rel a nih tak avangin, kum 1961 kum a District Conference thawhlawm pawh a tul apianga an hman bang (hemi tum hian Rs. 4/- an hmang) zawng chu an insem a, Rs. 11.75 ve ve in an chang nghe nghe.

District Conference hming vuaha an inkhawmpui hran hnu reiloteah District puitlinga awm tul tihna a lo lian chho ta zel a ni.

2. District puitling a awm thu

Kum 1963 ah chhim Bial District Conference, Thingsai hmuna neih Rorel No 4-na chuan,

‘kohhran kan lo chaka hma kan sawn zel theih nan, Chhimbial District chu Hmar lam awpna hnuai a awm reng lovin, a hranin District neih ve tawh nise, Superintendent of India hnenah dilna thehluh nise’

tiin a rel a. Kawng hrang hrangin harsatna awm thin mahse, a hun takah District puitlingah hlan niin, August Ni 29, 1965 ah chuan District puitlinga puan/hawn a lo ni ta a ni.

Kum engemawzat chhung chu District din ni hi ni ‘22th August’ tiin record a ni a, chumi ni chu District Day atan hman reng thin a ni.

Hetih lai hian Lunglei District chanchinbu, ‘Thuhriltu’ October 1965 a chhuakah Article pakhat hmuh fuh a ni a, chutah chuan:

‘Kohhran rorelnain ni 22th August, Sunday-ah hawng tura tih a ni a, mipui pawh he ni hmang tur hian thlen kim ni hma atang tawhin an lo pungkhawm a, nghakhlel leh phur takin inkhawm leh zaikhawmna neih a ni. Mahse, a hawngtu tur hotu lam te chu a hawnni turah pawh an rawn thleng thei ta lova, mipui tam zawk pawh beidawngin an haw a, kan hotute chanchin kan hre thei tawh bawk si lo. Thenkhatin an lo la nghak hram hram a. Tichuan, Dt. 25th August (Nilaini) ah kan hotute chu an lo thleng ta chauh mai a, anni an lo thlen takah chuan rorel that leh a ni. Engtik niah nge kan hawn tak ang, tih sawi a ni a, chawlhni ngei tha an tih avangin, Sunday lo awm leh tur ni 29/8/1965 chu ruat fel leh a lo ni ta a. Chumi niah chuan hlim taka hawn a ni ta a ni. District hming atan ‘South Mizo District’ tih a ni’.

Kum 1966 kum a, Chhim bial tih a nih lai hian bial 9 ah then a ni a, an ramri chu hetiang hi a ni. (Hmar Bial tih hi kan Mother Church, tun a North Mizoram District sawina hi a ni.)

South Mizoram United Pentecostal Church Workers' Special Business Meeting

Lunglei. A hun - May 20, 1966. Rorelna chuan South Mizoram, United Pentecostal Church huam chin chu Bial 9 ah then ni se, tiin a lo rel a, a bial then dan chu hetiang hi a ni:

1. Siata Bial
   • Hmar lam - Ainak
   • Chhak lam - Burman
   • Chhim lam - Burma leh Pakistan
   • Thlang lam - Tuipui
2. Bualpui (NG) Bial
   • Hmar lam - Lungpher
   • Chhak lam - Burma
   • Chhim lam - Chhuarlung
   • Thlang lam - Tuipui
3. Sangau Bial
   • Hmar lam - Lungleng
   • Chhak lam - Burma
   • Chhim lam - Vawmbuk
   • Thlang lam - Tuipui
4. Mualcheng (S) Bial
   • Hmar lam - Sairep leh Thangpui
   • Chhak lam - Tuipui
   • Chhim lam - Tuipui leh Pakistan
   • Thlang lam - Pakistan
5. Khawpui Bial
   • Hmar lam - Pukpui
   • Chhak lam - Ralvawng
   • Chhim lam - Theiriat
   • Thlang lam - Vanhne
6. Lungsen Bial
   • Hmar lam - Thehlep-Delui
   • Chhak lam - Hauruang
   • Chhim lam - Chawngte
   • Thlang lam - Pakistan
7. Thenhlum Bial
   • Hmar lam - Hmar Bial
   • Chhak lam - Tlawng
   • Chhim lam - Thuampui
   • Thlang lam - Pakistan
8. Haulawng Bial
   • Hmar lam - Hmar Bial
   • Chhak lam - Mat Lui
   • Chhim lam - Chenghpui
   • Thlang lam - Tlawng
9. Tarpho Bial
   • Hmar lam - Hmar Bial
   • Chhak lam - Burma
   • Chhim lam - Rotlang
   • Thlang lam - Mat Lui

Chhim bial tih anih lai hian kan ramri hi a zau em em mai a, Foreign ram pahnih lai mai - Burma leh Pakistan-te hian min karcheh a, chungte chu kan ramri ah hman a ni ta a ni.

Hun lo kal zelah, kohhranin hma a sawn zel a, kum 1975 ah Chhimtuipui District a lo indan takah chuan leh Mizoram chhim lam zawng zawng kan huam phak tak si lovah chuan chhim bial tih ngawt chu felin an hre ta lova, a hming thar a tan ‘Lunglei District’ tih a lo ni ta a ni.