REVIVAL

Revival awmzia:

English a Revival kan tih hi Latin tawng, ‘Revivere’ tih atanga lo kal a ni a, a awm zia chu, “nun thar lehna” (live again/ to live again) tihna a ni. Bible tawng bul lama Revival sawina, Hebrai (chayah/michyah) leh Greek (anazao/anathallo) tih pawh hian a sawi tum chu hetiang tho hi a ni.

Revival kan tih chuan Nun thar lehna emaw Harh thar lehna emaw tiin kan sawi thei ang. Biblein Revival (Harhna) a sawi tum ber pawh hi Harh thar lehna hi a ni deuh bik awm e. Rawngbawltu pakhat chuan Revival (Harh thar lehna) awmzia chu, “Nunna awm tawh, eng vang emawa a nihna tur dik tak anga awm zo tawh lo, a ze dik tak aia hniama tlachhe tawh hnu tuai thar lehna a ni a; chhungril lam ze thar avanga pawn lam lan dan thlenga lo tha thar ta sawina a ni e,” a ti a ni.

The New International Dictionary of Christian Church chuan ti hian a hrilhfiah a, “Harhna chu Kohhran mite zingah Thlarau Thianghlim hnathawh avanga thlarau nun rawn than harh tharna hi a ni a, chu chuan sakhaw mi nihna a tithuk a, Kohhran hna pui Chanchin Tha hril leh nun Thianghlimna a uartir a, hmasawnna leh mite laka thatna te, khawtlang siam thatna lam ngaihtuahna te a thlen thin,” tiin a sawi ve bawk.

Revival Dik:

Jonathan Edward-a chuan, “Harhna dik thlennaah a lem a tel ve ziah a, zirtirna firfiak leh thu herh kawih lutuk te, nuam tih zawng uar lutuk leh a ruiha ruih te hian harhna dik pawh a tihmingchhe thei em em a ni,” a lo ti hial a ni. Harhna dik a kan harh a ngai a, chumi kan hriat theihna tur chuan a pawimawh zual tlem rawn sawi ta i la.

Sual inhriatna leh Sual Simna:

Arch Bishop Richard Trench-a chuan, “Harhna dik tak chu Thalarau Thianghlim hnathawh avanga rilru leh thinlung taka nun pumpuia Pathian ang tur zawnga lo danglamna hi a ni a, a dawna dawn belh lam aiin a sima sim then lam a ni mah mah zawk,” a ti a. Revival dik tak kan chen hian chapona tlang atangin min hnuk thla a, sual in hriatna min neih tir thin a ni. Sual inhriatna min neih tir hnuah sual simna hian a chhunzawm ngei ngei thin bawk.

Rawngbawltu pakhatin, ‘Revival kan chan meka buaithlak lai ber chu, sim hreh hle si, lam hreh leh si lo te kan tam lutuk a, sim hreh hle si, sawi hreh lem lo te, sim duh silo, rawngbawl ve duh si te kan tam lutuk avang hian kan harh mek lai hian a rukin kan chau tlat si a ni’ a ti a ni. hei hi thil ni thei tak tur pawh niin ka hria, Harhna kan chan hi kan in enfiah fo a ngai a, Revival dik tak chuan Sual inhriatna, simna leh Sual huatna min neih tir ngei ngei tur a ni.

Thutak(Pathian thu awina)ah min hruai:

Harhna dik taka mi a harh tawh chuan Isua an hmangaih thar a, tichuan a thupek zawm duhna/chakna in an khat tawh thin, (midangte hmangaihna pawh an nei nasa em em thin bawk) Isua thuawihnaah hruailuh in an awm ngei ngei thin a ni. Harhna kan chan hi Harhna min chan tir tu hian a thu thua awm turin, a thu awihna bawihah min hruai luh hi a lo tum thin a lo ni. Pathianthu (Bible) hi an kawm ngeihin an hlut thin bawk. (Cf.Johana 16:13, Sam 119:151,160 . Ezek 36:27)

Thlarau bo veina min neih tir:

Pentecost nia harhna dik tak changtute kha an awm mai mai lova an thu hriat kha midangte hnenah an puang darh zel a ni. Tunlai harhna tam takah chuan a hlim tawhsa leh harh tawh sate in teltual reng a, hlimna chen reng kan tuma midang te veina kan tlachham fo a, keimahni kan hlim a kan harh chuan kan lawm tawk em em fo niin a lang. Harhna diktakah chuan midangte tana luanchhuah, midangte Krista hnena hruai a, sengkhawmna a keng tel zel a ni. Thlarau bo veina nasa takin an nei ngei ngei thin. (Cf.TT 8:4-5).

Min tithianghlim thin:

Harhna kan chan hian kan nuna sual kai dum te, bawlhhlawhna hrang hrangte kan fai vek a, min tihthianghlim a tum thin a ni. Harhna (Revival) nasa taka zan khaw tai rek rek thlenga chen inti si a, Lalpa leh a Kohhran duh loh thil kan la duh tlat te, kan nun ze ngai (tha lo) ang chiaha kan la nun zel si chuan in enfiah kan ngai tihna a ni ngei ang. Bible-a Fapa tlanbo pawh kha, a pa hnenah sima a kir leh khan a thawmhnaw bal te thleng khan thlak sak vek a ni tih kan hmuh kha Lalpa hnena kir leh te, harh tharna changtute hian, Nangni in Thianghlim tur a ni kei ka Thianghlim si a titu kan Lalpa duh dan a intihthianghlim hi kan tih mak mawh tur chu a ni. (Cf.Johana 17:17, I etera 1:15,16).

Dikna leh Huaisenna min neih tir:

Dikna kawng sirah a leh rengna ramah hian, harhna dik tak kan chan hian Dikna min ngainat tir a tum a, dikna tan ngam ringtu, dikna ngaina tlattu thlarau mi min chher chhuah zel hi a tum chu a ni. Harhna dik tak kan chan hian Huaisenna min neih tir tur a ni bawk a, tu ten emaw an sawi thaih theih tawk lek hlauhna thlarau changtu kan ni tur a ni lova, engemaw hleka lo nghing leh mai thin te pawh huaisen taka Lalpa leh a thuah dingnghet tlat thei turin min buatsaih tawh zawk a ni tih hi kan hre reng tur a ni. Hmeichhe hma a a Lalpa phat tu Petera ngei pawhin huaisen takin Lalpa thu a tlangau pui ta ang khan Thlarauva mi a khah poh leh a huaisen a, Petera te ang khan, Pathian Thuthlung an tui chilh a, mi lawmzawng leh ngaihthlak duhzawng ringawt an ngaihtuah thei tawh lova, Chhandamna Thuthlung hi huaisen takin an puang zel mai thin a ni. (Cf. TT 5:29, TT 4:20,31)

Keini UPC te hi Thlarau lam In pui kan ni tih te Revival Kohhran kan ni tih te hi kan in sawi fo dan leh mi tam tak te min hmuh dan pawh a ni ve bawk a, Revival programme heng; Crusade, Camping, Revival Inkhawmpui, Spiritual Emphasis Week etc kan tih ang te hi uar deuh deuh ila, Local tin tepawh hian kum tin kan Budget pharh ah te hian Revival puala sum dah na chang kan hriat theuh tepawh hi a hun tawh viau a ni. Harhna diktaka harh zel turin inbuatsaih sauh sauh I la, Thlarau Thianghlim leh a hnathawh te hi I chawisang deuh deuh zel ang u.