BIAL DIN TURA HMALAKNA

Thawh khatna : Kum 1980 hma lam zawng khan Lunglei khawpui chhung hi Pastor bial khat a ni thin a. Kohhran hmasawnna leh member lo pung chho zelah Pastor bial hnih a then duhna a lo awm a. Ni 2-9 May 1969-a District Board rorel chuan bial hniha siam a pass a, hetiang hian a then :

• Bial khatna : Chanmari, Thangte, Lunglawn, Theiriat, Zobawk. Hei hi Pastor J. Laltluanga’n bial se tih a ni.
• Bial hnihna : Bazar, Rahsiveng, Zotlang, Hauruang. Hei hi Pastor Chuauruma’n bial se tih a ni.

He ruahmanna hi District Conference vawi 5-na, 20-24 March 1970-a Hnahthiala neih chuan thiatin bial khata awm turin a rel leh a. He ruahmanna hmasa hi tih puitlin a ni ta rih lo a ni.

Thawhhnihna : District Conference vawi 15-na, Ni 9 February 1980 rorel No. 2-na-ah, khawpui bial then chu pass a lo ni leh ta a. Conference rorel bawhzui hian District Board vawi 51-na, Ni 11 February 1980 rorel No. 1 chuan hetiang hian a then leh ta a :

• Hmarlam bial : Rahsiveng, Venglai, Bawngveng (tuna Venghlun ni ta), Hauruang, Vanhne, Zohnuai, Bazar, Zotlang, Pukpui. Pastor Quarter chu Rahsivengah a awm ang a, Rev. Lalthima’n a bial ang tih a ni.
• Chhimlam bial : Chanmari, Matuveng (tuna Ramthar), Lunglawn (tuna Ramthar AOC), Theiriat, Zobawk, Dawn, Thaizawl. He bial vawng tur hian Pastor tang lai atanga thlan ni se tih a ni a. Pastor hnathawk lai zinga naupang ber leh kum khat pawh la thawk pumhlum lo, Pastor Zalawma, Hnahthial bialtu pastor chu thlan a ni.

BIAL DIN A NIH DAN LEH HRUAITU HMASATE

District Board rorelnain Ni 1 March 1980 atanga Bial function turin Bialtu Pastor atana ruat chu, Ni 1 March 1980 atanga bial mawhphur tur leh March thla chhunga he bial thara pem lut tur hian a rel a.

Hetih hun lai hian inkal pawhna kawng te a la tha tawk lovin, lirthei tlan te a la awm mumal lo hle mai a. Bialtu Pastor hmasa ber tur Pastor Zalawma te chhung hi, a thawhna hmun Hnathial khua atanga lo pem tur a ni a, anni chhungkua pawh Hnahthial bial chhuahsana bial thara pem turin an inbuatsaih nghal a. Ni 4 March 1980-ah Hnahthial atanga lo chhuakin, hetih hun lai hian lirthei kal vel a vang hle a, Ni 6 March 1980 (Ningani)-ah Lunglei an lo lut a ni. Ni 8 March 1980 (Inrinni)-ah Thaizawl Biak in, Pathiannia hawng turin bialtu Pastor thar, Zalawma chu a chhuak leh ta a, hei hi he bial thara rawngbawlna hmasa ber chu a lo ni ta a ni. Bial thar hawnna programme hi tun lai anga a hrana buatsaih a ni lo va, District Board-in a lo rel ang hian bial mawhphurhna a lak tan nia ruat, Ni 1 March 1980 hi Headquarters Section din tan ni a pawm a ni.

Bial Chairman, bialtu pastor tih loh bial hruaitu turte hi khawpui chhung bial khat a nih laia inkhawmpui hnuhnungber (1980)-in a lo ruat tawh, bial hruaitu hmasa berte chu hengte hi an ni :

• Bial Chairman : Pastor Zalawma, Bialtu Pastor
• Secretary/Treasurer : Evan. C.H. Rongaia, Chanmari

Missions Department :

• Director : Evan. Sangkunga, Chanmari
• Secretary/Treasurer : Upa Sailova, Matu veng

Sunday School Department :

• Director : Evan. Darhmingthanga, Chanmari
• Secretary/Treasurer : Upa Neihhnuna, Chanmari

LAD :

• President : Sist. Lalrinliani (Puii), Chanmari
• Secretary/Treasurer : Sist. Vanlalngaii, Chanmari

PYD :

• President : Evan. C. Lianzika, Zobawk
• Secretary/Treasurer : R. Tlansanga, Chanmari

BIAL CENTRE NEIH DAN LEH QUARTERS SAK CHHOH ZEL DAN

Lunglei South Sectional Board Committee vawi 1-na, 15th March 1980 UPC Office, Chanmari-a neih tumah, Rorel No. 5-naah Sectional Pastor Quarters tur chungchang hi phawrh nghal a ni a, tun tum atan chuan ngaihtuah loh mai ni se tiin an rel a.

Hetia Quarters sak hmabaka an awm lai leh, bul an tan hma hauh hian khawpui bial khata an awm ho lai a, Sectional Pastor Quarters sakna atana District sum an lo puk, Rs. 801/- lai mai chu Rs. 400.50 hi lo rul ve u la tia thinna lehkha, North Lunglei Section atangin an dawng hlauh mai a. He thu hi Sectional Board vawi 3-na, 31st January 1981, Theiriat UPC Biak ina neih tumah, Rorel No. 2-na chuan ngun taka ngaihtuahin hetiang hian a rel a, “Rahsiveng Sectional Pastor Quarters hi kan awm ho laia beih tlan a ni a, chuvangin Rs. 400.50, District-ah lo rul ve tura min rawn hriattir hi rulh tha kan ti a, amaherawhchu, tuna Pastor Quarters chu bial khata kan awm laia sual tlan a nih ang ngeiin a Building senso pawh bill chhuakin a inzatin insem ni thei se tha kan ti,” tiin an rel ve rap mai a. North Lunglei Section lam pawh an ngawi zui ve ta mai a ni awm e.

Pastor Quarters sa tura kan inbuatsaihna kawnga kan harsatna tawh hmasa ber leh, a hun laia thupui fun zet ni mahse; kan hruaitu hmasate fin a inchen tlang a, keini thangtharte tan chuan kan chanchin tingaihnawmtu a chang ta. Section Board vawi 3-na chuan Sectional Pastor Quarters chungchang hi sawi chhunzawmin, Building Committee a din a, Committee member-te chu hengte hi an ni :

1. C. Lalawma, Zobawk
2. C. Lalmuana, Matu veng
3. Thankhuma, Lunglawn
4. Rochungnunga, Theiriat
5. Zopianga, Chandmary

Biak in hmun tur hi la nei lo mahse; hmalak bul tanna atan target Rs. 4,100/- siamin hetiang hian an sem a :

• Chandmary : Rs. 1,200/-
• Theiriat : Rs. 800/-
• Zobawk : Rs. 650/-
• Lunglawn : Rs. 600/-
• Matu veng : Rs. 450/-
• Dawn : Rs. 200/-
• Thaizawl : Rs. 200/-

Section Board vawi 4-na, 13th June 1981 Hqr. Biak in, Chandmary-a neih, rorel no. 4-na chuan Sectional Pastor Quarters hmun chungchang hi ngaihtuahin, Chandmary Local lo ngaihtuah fel atan dah a ni a. Evan. Zopianga (Chanmari) ram, Farm veng a mi chu Rs. 2,500/- a lei a ni ta a.

Bial ding thar an ni bawk a, an phur hle. Section Board vawi 5-na, 6th February 1982 rorel no. 2-na chuan, Quarters target te bial chhung Local tinah sem belhin, June 1982 ral hmain pek vek ni se tiin a rel a. Quarters sak hna hi chak taka bawhzuiin, 1982-ah Pastor Zalawma te chhungkua chuan an luah lut ta a. Bial Centre chu tuna Headquarters Local hi a ni.

Hun a lo kal zel a, Headquarters Local atangin Farm Veng Local hi Ni 13 November 1988-ah a in dang a, Pastor Quarters bul maiah hian Farm Veng Local Biakin hi sak niin, Farm Veng Local huam chhungah a awm ta a. Section Conference vawi 13-na, Ni 5 - 7 February1993 rorel no. 3-na chuan, “Section Pastor Quarters hi Bial Centre-ah ngei awm se,” tiin District Board-a thlen turin a rel a. District Board-in, “A hmun tur tak dilnaah hian a chiang tawk lo va, a hmun tur chiang zawka an rawn thlen leh hunah ngaihtuah nawn leh ni se’ tiin a rel a. Section Board vawi 27-na, 14th April 1993, rorel no. 3-na chuan a hmun tur atan Headquarters Compound (Biak in bul hnai)-ah ngei dah ni se tiin a rel leh a. Hei hi District Board chuan a remtihsakin, tuna Quarters hmun hma erawh chu District kutah awm se, a Building erawh chu Section kutah awm se tiin a pass a. Quarters Building tihral dan tur chungchangah an beisei anga thil a kal tluan tawk loh avangin hmalakna a chawl hlek a. Section Conference vawi 17-na, Ni 1 February 1997 rorel no. 5-na chuan Quarters hi sawn leh loh mai ni se tiin a pass leh ta a ni.

Hetiang hi a lo nih takah chuan, Quarters thuam that hna an thawh mek pawh target te insiam belhin a tir a mi an lo thuam thathte chhunzawm chho zelin, RCC ban leh a bangte pawh Brick-a thlak chhovin, Quarters tha tak an nei chho ta a ni. He Quarters hi hun eng emaw chen luah a nih hnu leh, Quarters sawn chhuak tura hmalakna thar a awm tawh loh hnu-ah, District hruaitute hnen atangin bialtu Pastor chu sawn chhuak a, kan District Headquarters-a kan Quarters pakhat chu Bialtu Pastor luah tura tih a ni ta a.

Hetih laia bialtu Pastor hi Rev. C. Darkhuma a ni a, anni chhung hi Ni 25 July 2005-ah, District Headquarters Building, tuna Bialtu Pastor Quarters atana hman laiah hian an insawn chho va. Farm venga Quarters chu District kuta awmin, District Headquarters Building-a Quarters pakhat, Over-bridge zawn chiah, tuna District Conference Hall atana kan hman kawtzawl hnuai chiah floor hi pek kan ni ta a.

Hetia Section Pastor Quarters atana pek kan lo nih takah chuan, Section hmalaknain chei leh thuam that zel a ni a. Electric wiring leh Ceiling te siam that a ni a. Pindan bang te pawh thlaka rawng te pawh hnawih that thin a ni a. Tin, chimney te thlaka kitchen cabinet te siam thain, tui khawihna te siam that a ni a. Gas thuk hnuai tanky ni thin chu belbawm siam niin, a chhuat pawh floor tile phah a ni a, Quarters nuam tak a ni ta a ni.

BIALA THIL THLENG CHHINCHHIAH TLAK TE

1) Bial hming chungchang thu : District Board-in khawpui chhung bial khat ni thin, bial hniha a then lai khan ‘Hmar lam bial’ tih leh ‘Chhim lam bial’ tia then a ni a. Saptawng hmang uar Kohhran kan ni bawk a, ‘North Lunglei Section’ leh ‘South Lunglei Section’ tiin khawpui bial chu sawi leh ziak a ni ta zel a. ‘South Lunglei Section’ tih kan ni a. He hming hi a pu rei lo va, kum hnih vel chauh a pu hman a ni. Bial inkhawmpui vawi 2-na, 27th March 1982 chuan Chanmari Bial tia thlak ni se tiin, District Board-ah a thlen a. District Board vawi 59-na, Ni 6 - 7 October 1982 chuan pawmpuiin ‘Chandmary Bial’ tih a lo ni ta a. Hei hi kum sawm dawn lai a pu hman. Bial inkhawmpui vawi 11-na, 6th March 1991 chuan ‘Headquarters Bial’ tiin thlak ni se tiin a rel leh a. District Board vawi 91-na, Ni 4-5 July 1991 chuan pawmpuiin ‘Headquarters Bial’ tih a lo ni ta a, hei hi kum 30 chuang zet a pu ta a, he thu ziak a nih thleng hian a la pu ta zel a ni.

2) Bial then thu : Headquarters bial atang hian bial lian tak tak pahnih hawngin, bial hnih lai a lo hring chhuak tawh a, chungte chu hengte hi an ni :

• Theiriat bial : District Conference vawi 25-na, 27th April 1990 chuan he bial atang hian bial thar hawngin, ‘Theiriat bial’ a lo piang a. Theiriat bial thar hi 3rd June 1990-ah hawn a ni. Theiriat bial thar hawn a nih hnuah hian Chanmari bial huam chin chu Chanmari, Farm Veng, Electric Veng, Luangmual, Ramthar I, Ramthar (AOC), Sethlun, Thangpui leh Thangte a ni a. Heng Local te bakah hian, District Board vawi 113-na 16th-17th December 1996 chuan an dil angin, January 1997 atangin Vaisam khua chu Chanmari bialah hian a dah tel ta bawk a ni.
• Luangmual bial : District Conference vawi 34-na, 27th February 1999 chuan bial then a pass leh a, Conference rorel bawhzui hian District Board vawi 121-na chuan, Headquarters bial chu thenin Luangmual bial a lo piang leh ta a. Luangmual bial hi 1st April 1999-ah in dangin 4th April 1999-ah Luangmual biak inah bial thar hawnna hun hi hman a ni. Luangmual bial a lo in dan leh tak hnuah hian, Headquarters bial chuan heng - Headquarters, Farm Veng, Electric, Ramthar leh Ramthar AOC Local te hi a la chang a ni.

3) Silver Jubillee : Kum 2005-ah Silver Jubilee, ruai nen hlim taka hman a ni a. Silver Jubilee Souvenir te buatsaihin he lehkhabu hlu tak atang hian, Bial leh tualchhung Kohhran chanchin pawimawh tak tak thlir let theih kan lo nei ta a. Tun tuma Bial chanchin ziakna atan pawh tangkai taka hman a lo ni ta a, a lawmawmin he Silver Jubilee Souvenir hi a hlu hle a ni.

Bial hruaitu lo ni tawh te :

Bial Chairman/Bialtu Pastor :

1) Rev. Zalawma	01.03.1980 – 31.03.1986
2) Rev. Saidawla	01.04.1986 – 28.02.1991
3) Rev. P.C. Lalrosanga	01.03.1991 – 31.12.1994
4) Rev. Rochhunga	01.01.1995 – 29.02.1996
5) Rev. C. Darnghaka	01.03.1996 – 11.10.1998
6) Rev. P.R. Dawla	12.11.1998 – 31.12.1998
7) Rev. P.C. Doliana	01.01.1999 – 15.03.2004
8) Rev. C. Darkhuma	16.03.2004 – 14.03.2006
9) Rev. P.C. Nghakliana	15.03.2006 – 15.03.2008
10) Rev. C.S. Pachhunga	15.03.2008 – 13.03.2009
11) Rev. C. Vanlalena	14.03.2009 – 31.12.2009
12) Rev. C. Lalrintluanga	01.01.2010 – 15.07.2013
13) Rev. P.C. Nghakliana	15.07.2013 – 31.12.2013
14) Rev. C. Zohmingliana	01.01.2014 – 01.04.2018
15) Rev. C. Lalrintluanga	01.04.2018 – 15.05.2018
16) Rev. C. Hmingthanfala	15.05.2018 – 20.07.2023
17) Rev. LH. Lalchhandama	20.07.2023 – till date

SI. No. 6. Rev. PR. Dawla, SI. No. 11. Rev. C. Vanlalena, SI. No. 15. Rev. C. Lalrintluanga te hian Part time-in Bialtu Pastor hna hi an chelh.

Bial Secretary :

1) Evan. C.H. Rongaia	01.03.1980 – 31.12.2000
2) Evan. R. Ropianga	01.01.2001 – 31.12.2012
3) Evan. F. Lalhmangaiha	01.01.2013 – till date

Bial Treasurer :

1) Upa H. Chhawntluanga	01.01.2011 – 31.12.2012
2) Evan. R. Ropianga	01.01.2013 – 31.12.2024
3) Evan. Saithangpuia	01.01.2025 – till date

Note: Bial Treasurer hi Ni 1January 2011 atang khan a hrangin kan nei tan a, a hma zawng chuan Bial Secretary ten an chelh kawp thin a ni.