United Pentecostal Church, Electric Veng Local, Lunglei a lo dinna tur hian mi thahnemngaite June 17, 1990 (Pathianni) khan an thu khawm a. He rorel inkhawm hmasa berah hian mi pakua (9) kalin, chuta an rorelah chuan hmalak zel te a tul dawn avangin Committee Body an din a, a hming atan ‘Electric Veng Pa-ho Committee’ an vuah a ni. Mawhphurtu turte hetiang hian an inruat nghal :

Hemi tum Pa-ho Committee hmasa berah hian, Acting Chairman R. Kawlzika niin, Secretary hi H. Laldinthanga te an ni a. Member dangte chu : F. Lalnghakliana, F. Thangliana, F. Thangnghilhlova leh LH. Rohmingliana te niin, LH. Lalthlamuana hi a tel lo thung.

Pa-ho Committee vawi 2-na, July ni 8, 1990-a neih lehah, ‘July - December 1990 chhungin Biak In pual atan target Rs.10,000/-neih ni se’ tih relin, Thawhlehni zan apianga sumtuaka fehchhuah thin tur thu te leh, sumtuak dan tur dangte rel a ni a. Committee vawi 3-na, Ni 7.8.1990-ah sumtuak nan Pukpui ram, Tlawng kawnga Mau sah hnatlang neih thu relin, Committee vawi 4-na, Ni 2.9.1990-ah Kohhran thar tur hi Chandmari atanga in dang ni lovin, veng hrang hranga lawi mek, hmun khata infin khawm tur kan nih angin inkhawm hona neiin ‘Electric Veng UPC’ tih ni tawp mai se tih thu relin inkhawm hran hun leh a hmun tur te chu thu dah a neih a ni ta a.

Committee vawi 5-na, Ni 9.9.1990-ah inkhawm hran hun atan Ni 16.9.1990 (Pathianni) ruat chhinin, a hmun atan Bro. R. Kawlzika in hnuai ni se tih rel a ni a. Bro. R. Kawlzika hian a in hnuai hi a la peih fel chiah loh avangin, nakina la mamawh tho tur a ni bawk a tiin Thingphel 20 lei ni se tih a ni a, peih fel a nih hma chuan Bro. PC. Siamkhuma In-ah inkhawm phawt ni se tih a ni.

Pa-ho Committee vawi 6-na, Ni 15.9.1990-ah inkhawm hran kan tum chungchangah, District Superintendent leh Bialtu Pastor ten, an thu ngaichang leh rih tura min tih thu sawi hovin, inkhawm hrang rih lova la ngaihchan leh rih ni se tih rel a ni a.

Committee vawi 7-na, Ni 16.9.1990-a neih chu District Superintendent Rev. H. Chalchhunga, Chandmari Section Pastor, Rev. Saidawla leh Section Secretary Evan. CH. Rongaia ten min hmanpuiin, hemi tum hian inkhawm hran neih hun thu rel a ni a. Hruaitute thurawn angin inkhawm hran neih hun atan, November ni 4, 1990 ruat a ni ta a. Programme tur pawh duan nghal vek a ni nghe nghe. Heng hun lai hian Electric Veng chhunga kan Kohhran awmte hi Veng hrang hrang - Chandmari, Farm Veng, Venglai leh Venghlun-ah te inkhawm thin kan ni a, mahni lawina theuhva inkhawmin, inkhawm banah Committee hi neih thin a ni.

Pa-ho Committee vawi 8-na, Ni 18.10.1990-ah inkhawmna hmun tur, Bro. R. Kawlzika in hnuai hi hnatlangin Ni 20.10.1990-ah siam ni se tih te relin, Committee vawi 9-na, Ni 21.10.1990-ah inkhawm hran tan ni, Ni 4.11.1990-a chhun leh zan lama programme chipchiar leh zuala siam a ni a. Thingpui in ho ni se tiin thingpui hmeh atan, chhung tinin Zo chhang fun lian tawk tak thawh theuh ni se tih thu rel a ni bawk. Member inchhiarna Ni 28.10.1990-ah neih ni se tih a ni.

Committee vawi 10-na, Ni 1.11.1990-ah, inkhawm hran hmasak ber nia thil tul turte sawi ho a ni a, chung bakah Biak In hmun dilna kal mek, Revenue Directorate, Aizawla thang mek bawhzui dan tur te rel a ni bawk.

Tichuan, ruahman lawk angin, November 4, 1990 (Pathianni)-ah Electric Veng UPC te chuan, Bro. PC. Siamkhuma inah inkhawm hun hmasa ber chu hlim takin hman a ni ta a ni.

Local Church Committee anga inhmuh khawm hmasa ber chu, Ni 5.11.1990 zanah Bro. PC. Siamkhuma inah neih a ni a, hetah hian Bialtu Pastor Rev. Saidawla’n rorel inkhawm a kaihruai a. Kohhran in-form tak tak hma atan hruaitu lailawk (Adhoc) atan heng mite hi ruat nghal an ni :

Maichama Thuhril rawngbawlna nei turin hengte hi ruat an ni bawk :

1. Upa Challianthanga
2. Evan K. Siamkunga
3. R. Lalsawimawia
4. Raltawnluia
5. R. Tlansanga
6. Vanlalthanga
7. R. Kawlzika
8. B. Kapmawia

Meeting Chairman atan hengte hi ruat an ni bawk :

1. Upa Challianthanga
2. Evan K. Siamkunga
3. R. Kawlzika
4. B. Kapmawia

Rawngbawltu baka Church Board member atana ruatte :

1. PC. Dailova
2. R. Lalduhawma
3. PC. Siamkhuma
4. LH. Lalthlamuana
5. F. Thangnghilhlova
6. F. Thangliana
7. C. Lalhmingliana
8. H. Lalhmangaiha

Heng bakah hian PYD hruaitu leh LAD hruiatu turte pawh Committee-ah hian ruat nghal a ni bawk.

Church Board Committee vawi 2-na, Ni 11.11.1990 chuan inkhawm thawhlawm khawn hun bi leh, Committee kutken chungchang thu relin, Committee vawi 3-na, Ni 20.11.1990-ah Krismas hman dan tur leh a kaihnawih tul hrang hrangte relin, Kohhrana inpe lut thar Evan. Darhmingthanga chungchang thu-ah, License Holder a nih angin rawngbawlna leh Local Church Board member dinhmun nei nghal se tih rel tel a ni.

Church Board Committee vawi 4-na, Ni 2.12.1990-ah Krismas ruai buatsaih dan tur te, Thingpui lum chungchang thu leh zaikhawmna In atan Bro. PC. Siamkhuma in ni se tih te relin, Ni 18.12.1990-ah Committee vawi 5-na neiin Krismas Programme chipchiar taka duan a ni. Bro. PC. Siamkhuma te nupain, Pathian chawimawina neih an duh thu sawiin, a hun atan Ni 22.12.1990 chu ruat a ni a, chawimawi nan hian Bawng talh tum a ni a, a ‘dar’ hi Pathian ram (Sawma Pakhat) a lut tur a nih avangin, a man atan Rs. 200 ni se tih a ni.

Hetiang hian Electric Veng Kohhranhoten hun hmasa lamah hlim taka hun hmang chhovin, Kohhran ding thar tih takah Committee pawh kan nei zing thin hle.

Kum te a lo thar a, Local Church Board form hmasak ber chu Ni 5.1.1991 (Inrinni) chawhnu dar 1:00-ah, Bro. R. Kawlzika Inah, Bialtu Pastor hovin member 14 kal khawmin neih a ni a. Hemi tum hian Bialtu Pastor Rev. Saidawla hi Rev. P. Rodawla, District Missions Director leh Bro. H. Lalmuana, Farm Veng ten an rawn tawiawm nghe nghe a ni.

A hmasa berin Bialtu Pastor-in, rawngbawltu mi 9-te hian rawngbawlna nei chhunzawm se tih a rawt chu pawm tlan a ni a, anniho bakah rawngbawltu thar mi 2 - Bro. PC. Dailova leh Bro. F. Thangnghilhlohva te lak belh nghal an ni bawk. Kohhran Upa mi 3 neih ni se tiin Upa. Challianthanga bakah midang 2, Bro. R. Kawlzika leh Bro. B. Kapmawia te chu Upa atan thlan nghal an ni.

Local Church Board Office Bearer atan hengte hi thlan chhuah an ni bawk :

Heng bakah hian Department hrang hrang PYD, LAD, Missions, Sunday School hruaitu turte pawh ruat tel nghal vek an ni. Church Board Committee member chu a pangai rin rih ni se tih a ni bawk.

Sunday School Zirtirtu, Building Committee leh PCD hruaitu tur ruat chu, Church Board kutah dah a ni a. Ni 8.1.1991 khan mawhphurhna pawh inhlan nghal a ni ta a, hemi zan hian Church Board Committee nei nghalin, Sunday School Zirtirtu leh PCD hruaitu turte ruat fel nghal an ni. Church Board thla thar Committee vawi 1-na, Ni 15.1.1991-ah neiin hetah hian Building Committee hruaitu insiam nghal a ni a, hruaitu atana ruatte chu :

Bro. F. Doliana, Building Treasurer hi thla thar Committee vawi 3-na, Ni 10.3.1991-a neih chuan Church Board Member atan a la thar a ni.

Biak In sak/neih chhoh dan :

Inkhawmna In atana hman Upa R. Kawlzika In hi March 1991 atangin a remchang ta lo va, inkhawmna tur remchang dang hriat hmaa inkhawmna atan Bro. PC. Siamkhuma’n an in a thawh a, a lawmawm hle. Bro. PC. Siamkhuma Inah hian Ni 13.2.1991 zan atangin inkhawm nghal a ni.

Sawrkarah Biak In hmun dil niin hemi bawhzui turin, Ni 10.3.1991-a Committee chuan Bro. H. Lalhmangaiha leh Bro. F. Thangnghilhlova te a ruat a, kan hmun beisei hmuhna tura Revenue lam atanga thurawn kan hmuh angin, Education Department atanga ‘No Objection Certificate’ pawh lak ni se tiin, anni kutah hian dah nghalin Aizawlah anni hi tirh nghal an ni ta nghe nghe. Hemi tumah hian Rs. 800/- chiah an paichhuak ve a ni.

Bro. H. Lalhmangaiha te thian dun Aizawla va kal hi an rawn hlim haw hle a, report te an pek hnuah Aizawlah Biak In hmun hi tihfela lakchhuah mai theih a lo ni dawn ta a. Bro. H. Lalhmangaiha bawk hi amah a inhuam tho avangin Rs. 600/- pai tirin tirh leh nghal a ni a, he mi hnu lawk hian Biak In hmun chu tihfel a ni ta a, a lawmawm hle.

Biak In hmun lai hian hnatlang hmasa ber Ni 20.5.1991 khan thawh a ni a, a hmun laih zawh thaw khat a nih hian mi ina inkhawm kan nih avangin, inkhawmna atan ‘Bawk’ tal sak nghal phawt mai ni se tiin, a ren tur lain Ni .23.7.1991-ah Pachang ram lamah hnatlan a ni a. Tichuan a dung 30 ft. leh a vang 15 ft.-in Bawk chu sak a lo ni ta a ni. Bawk sak hma hian tum 4 vel zet ren laa hnatlang thawh a ni.

Bawk hi peih a lo ni ta a, Ni 25.9.1991 (Missionary Day) lawmna ni pahin, LAD-te bul tana awm ni khamin ruai siam ni se tih nen, Biak In thar (Bawk) lawmna ni pah fawmin Ni 24.9.1991 (Thawhlehni) zan atangin inkhawm ni se tiin Ni 8.9.1991-a thla thar Committee chuan a rel a, inkhawm nan hman zui a ni ta a ni. Biak In (Bawk)a kan inkhawm hmasak ber zan hian, Upa B. Kapmawia, Chairman niin Speaker chu Bialtu Pastor, Rev. PC. Rosanga a ni.

Biak In thar sak anih avangin Bawk hi Ni 22.9.1995 khan thiah a lo ni ta a. Ni 29.9.1995 khan Biak In thar hi tlabal takin luah tan a ni. Biak In sakna kawngah hian mimal tin leh Department tin te, kan tang tlang thin hle a. Target rit tak tak intukin kum tin hmalak tlan a ni a, Inrinni tin hnatlangte puangin harsatna tam tak karah Biak In sak hna hi thawh puitlin a ni.

Kum 15 chuang zet Biak In hi luah niin, khawvel thang chho zelah member-te lo pung chho ve zelin, Biak In hian min dawl zo ta lo deuh a, Biak In hi sak that tura ruahmanna siam niin Kum 2011 bawr chho atang khan hmalak chhoh tan a ni a, Biak In luah lai chhung khungin Biak In sak that hna thawh chhoh a ni ta a. Bank Loan te pukin Biak In sak that hna chu thawh chhoh mawp mawp a ni a, a dung 45 ft leh a vang 85 ft velin Biak In hi sak chhoh a ni ta a. Biak In hlui chu thiatin Kum 2020 atang khan Biak In thar hi luah chhoh tan a ni ta a ni. Ni 5 November 2020-ah Rev. C. Hmingthanfala, Headquarters Bialtu Pastor chuan hawnna pawh a lo nei tawh a ni.

Kohhranin harsatna nasa tak a tawk :

Rin loh leh beisei hauh loh, mumangah pawh kan man phak loh, kan Kohhranah harsatna lian tak a lo thleng ta phut mai a. UPC of Mizoram boruak nasa tak, Aizawl lama thleng chuan kan veng a rawn chim ve ta pung mai a, a lungchhiat thlak hle mai. Hetih lai hian PYD bultumin Camp buatsaih tum a ni a, he camp hi Ni 14-16 December 1995 chhung awh tura ruahman niin, inbuatsaihna pawh peih thaw khat tawh a nih laiin, Ni 11.12.1995 (Thawhtanni)a Krismas thing phurh hnatlang neih ni-ah, thingphurhnaa kal ve lo, in lama awmten rem an lo ruat lawk nge ni, hemi zan, PYD & LAD Joint inkhawm zan hian kalphung pangngai lovin, Sis. Nuchhungi chuan Chairman hun chu Upa B. Kapmawia a lo pe diam a. He inkhawmah hian kan unaute chuan UPC of Mizoram zawm duhin, ban an phar ta thup mai a ni. A zawm duh lo lam ban inphartir awm tawh chuang lovin, tam zawk leh chak zawka inngaiin a duh lo lam te zai ngaihna awm tawh miah lovin, kan Biak In leh bungraw thenkhatte chu UPC of Mizoram ta-ahngaiin, Ni 14.12.1995 (Ningani)-ah Camp buatsaihtu pawl ten, thahnemngai taka hna an thawh mup mup laiin Sorkar thuneihna hmangin, kan Biak In chu khar/kalh a lo ni ta der mai. UPC of Mizorama awmte chuan kan tam zawk an inti a, keini’n tam zawk deuhvin kan inngai ve bawk a, goal-a pet luh tumin kan inkhel ta mup mup a ni ber mai. Khatih hun laia Kohhranin harsatna kan tawh kha, a hrehawm hle tih hian a sawi fiah phak lo tak zet a ni. Mahse Pathian hruaina leh awmpuina chuan min kalsan ngai lo a, kan Biak In kalh pawh chu Magistrate thuneihna hmang vekin, Ni 23.12.1995 (Inrinni) 10:00 am-ah hawn a lo ni leh ta a ni. Biak In kalh a nih lai hian Bro. K. Thangdailova Inah, inkhawm thin a ni a, hemi kum Krismas pawh hi anni hian an dawl ta nghal nghe nghe a ni.

Biak In chu an kalh ni nena chhiarin Ni 10 chhung chiah kalh a ni a, hetih hun lai hian kan Biak In hi a la tlabal hle a. Dawrah Rs.17,000/- chuang ba kan nei a, tukverh, ventilation, kawgkapui leh skirting te pawh dap-a pin phui deuh mai mai an ni hlawm a ni. Chutiang chu ni mah ila, Pathian malsawmna kan dawng nasain, Pathianin min awmpui tlat a ni tih mitin a hmuh theih a. Biak In saknaa ba leh la peih loh te chu, zawi zawiin chin fel chhoh a ni ta zel a ni. Harsatna nasa tak karah Lalpan a mite hi min kalsan ngai lo va, Kohhranhote leh Department-te tanrualna, Lalpan mal min sawm a, target tlak loh nei ngai lovin, inkhawm thawhlawm te pawh a hma zawng aiin a lo pung chho ta mah mah mai a, Pathian hnenah lawmthu kan sawi mawlh mawlh a ni.

Tun dinhmun :

Electric veng Local-ah hian Member 456 (kum 2025 report-ah) an awm mek. Member 343 permanent member niin, member 113 temporary member an ni. Upa - 6, Rawngbawltu - 11, Senior Upa - 1, License Holder - 2 leh Bible Women - 1 an awm mek. Department member lam ah : PYD member - 168, LAD - 79, PCD member - 84, PMD member - 21 an awm mek bawk.

Kum 2025-2026 Local hruaitute chu :