FARM VENG A UPC LO AWM TAN DAN :

Farm Veng hi tuna AH & Vety Department-in an Department ram chhung, Joint Director Office bul mai, veng laili leh hmun rem tak maia Ar Farm an dah avang hian, Farm Veng hming hi lo pu ta a nih a rinawm. Farm Veng hi tun hma chuan Chanmari veng thler pakhat a ni a, khaw hrang hrang atang leh veng hrang hrang atang te-a lo pem khawmin, Chanmari area-a hmun awl awmna lam, Farm Vengah inbengbel zelin, chung pem khawm zingah chuan UPC member eng emaw zat an awm ve zel a, UPC member te chu an lo tam ve tial tial zel a ni.

BIAK IN HMUN NEIH DAN :

Kan sawi tak angin tun hma chuan Chanmari area kha a zau hle a, Chanmari huam chhung a mi, veng thenkhatte tan Chanmari Biak Ina lawi ho reng chu lawi theih loh hun a la thleng dawn tih hriain, Chanmari UPC Church Board Committee chuan, ‘Farm Vengah Biak In hmun te lo dap lawk ni se’ tiin ro a rel a. Chu rorel bawhzui chuan, khatih hun laia District Secretary, Treasurer ni lai Rev. H. Chalchhunga leh Lunglei South bialtu Pastor, Rev. Zalawma te chuan tuna Farm Veng Biak In dinna hmun, khatih laia Girls Hostel atana Sorkar-in a lo ruahman chu, Farm Venga UPC Biak In hmun atan dilna an thehlut ta a ni.

Kum 1984-ah Chanmari Veng atangin Farm Veng chu ‘Veng hrang’ ni turin, khawtlang huapin a lo indang ta a. Village Council hran neiin, rorelna hrang a lo nei ve ta a ni. Hemi hma lamah hian tuna Farm Veng UPC Biak In dinna te, Community Hall sakna te, Primary school leh Middle school awmna lai hi Girls Hostel sakna tur atana ruahman a ni a, mahse hmalakna erawh chu a chak lo hle a nih a rinawm. Chutiang a nih avang chuan Farm Veng Village Council chuan Girls Hostel hmun tur chu School hmunah leh Vantlang hmun pawimawh atan, Sorkarah an kherh a, he thu hi hriat a nih hnu kum 1985 khan, Farm Veng Village Council kaltlangin tuna UPC Biak In dinna hmun, tlang bawk hi Biak In hmun atan dilna theh luh nawn leh a ni ta a ni. Amaherawh chu hei hi chanchin hriat zui vak lohvin a reh ta vang vang mai a, hetih lai hian Farm Veng atangin Chanmari Kohhranah Rawngbawltu eng emaw zat an awm ve tawh a, Kohhran Upa phei chu Farm Veng a mi deuh vek an ni tawh nghe nghe a ni. Chung Upa leh rawngbawltuteho chuan Farm Vengin Biak In hran a neih theih dan tur ngaihtuahin, hma latu-ah tangin an theih ang tawk tawkin ruahmannate an siam a ni.

Kum 1987-ah Mizoram Politics kalphung inthlakin, Mizoramah MNF Party-in Sorkarna a lo chang a, hemi tum hian Lunglei District UPC-a kan District Pastor (District Superintendent) Rev. HL. Ruata chu Politics lamah lutin, MLA-ah a tling a, MNF Ministry-ah Minister chanvo a chang a. Ani hi Farm Veng Biak In hmun tur dil a nih thu leh mamawh dante hre chiangtu a nih avangin, beiseina kawl a eng thar leh ta a, chuti chuan Biak In hmun dilna chu theh luh nawn leh a ni a, hei hi Biak In hmun, pangngai taka dil vawi thumna a ni. Minister Pu HL. Ruata tawngkam atangin, Farm Venga UPC Biak In hmun tur pawh chu hmuh a beiseiawm hle a, mahse hetih lai hian thu dang dang a thang a, Biak In hmun tur an dil lai pawh chu Biak In sak phalsakna hmuh a nih tak mai loh avang chuan, Farm Venga Rawngbawltu awm ho chuan inhmuh khawm a, thumum deuh neia bawhzui chu tha a ti a, chuti chuan inhmuh khawm hun atan Ni 20.8.1987 chu an ruat fel ta a ni.

In hmuh khawm vawi 1- na :

Ni 20.8.1987-ah chuan Upa R. Taikawla Inah, zan Dar 7:00 pm-ah, Rawngbawltute chu inhmuh khawm a ni ta a, chuta Member kalte chu Rev. Zalawma, Upa Neihhnuna, Bro. ZD. Lalhmingthanga, Upa K. Lianhnuna leh Upa R. Taikawla te an ni. Hemi zan hian thil kalphungte sawi fiah a ni a, “Biak In hmun tura kan dil pawh chu chan loh mai hlauh thawnawm niin hriat a ni a, chuvangin chuh hauh a tul tak zet a, Biak In hmun tur remchang dang a vang bawk si a, inkhawmnaah puan ni se la, Veng dang rawngbawltute pawhin min rawn enpui ve se, a hmunte hi lo sam fai ni se” tihte thlengin an sawi hova. Hemi zan hian beisei anga kal an tam loh avangin Ni 23.8.1987 Sunday chhun inkhawm banah kim deuh zawka sawi ho ni se tiin an tin tlang ta a ni.

Inhmuh khawm vawi 2-na :

Biak In hmun chungchanga inhmuh khawm vawi 2-na chu Ni 23.8.1987, Sunday School ban, chawhnu Dar Dar 2:00 pm-ah, Rev. Zalawma Inah neih a ni a, heng mite hi an kalkhawm a, Rev. Zalawma, Rev. Saidawla, Upa K. Lianhnuna, Bro. ZD. Lalhmingthanga, Bro. H. Dopuia, Bro. H. Lalmuana, Upa F. Neihhnuna, Evan. Zopianga, Upa.C.Chalsela, Upa Chawngzuala leh Bro. K. Papuia te an ni. Hemi tum hian Biak In hmun bawhzui dan tur bawk sawi ho a ni a. Chak zawka hmalak a nih theih nan Committee indin tha tiin, hruaitute pawh invuah nghal a ni a. Acting Chairman atan Rev. Zalawma, Acting Secretary atan Upa Neihhnuna ruat lailawk an ni. Biak In hmun tur chu bawhzui nghal thaa hriat a nih avangin tlawmngaia Aizawl lama bawhzui turin Rev. Saidawla leh Upa Lianchhunga te ngen leh ruat an ni a. Amaherawhchu, Aizawl lamah hian kal a ngai leh ta lo a ni. He inhmuh khawmnaa an thurel ber chu, “Tuna Girls Hostel hmun atana an lo ruat, Farm Veng Village Council te nawrna atanga UPC Biak In hmun tur, Minister-in hmu ve tura a sawi hi, thil chiang a awm theih loh avangin, thuneitute hnenah chak taka bawhzui a, a hmun min pekah hian kut thlak hma theih dan zawh fiah thuai a, tih fel hi he inhmuh khawmna hian tih puitlin ngei tumin chet vat hi tha kan ti tlang a, chan loh palh mai te pawh hi thil awm thei nia a lan avangin” tih a ni. Chuti chuan Committee chuan Ni 24.8.1987 Thawhtanni zingkarah, a hmun sam fai hnatlang neih tur thu a puang ta a ni. Hemi zing karah hian a hmun tur chu sam fai zawh vek a ni ta a, hei hi kut thlak meuhva tha thawh hmasak berna niin a lang a ni.

Rev. Saidawla (Rtd), hetih hun laia Bialtu Pastor-in, Biak In hmun chungchanga a sawi dan chuan, “Biak In hmun dil chu hmuh mai a nih tak lohvah chuan, hma ka han la tha leh ta a. Revenue Department Office, Lungleiah kalin In hmun dilna Form ka lei a, Fill up sa vekin Minister HL. Ruata kutah ka dah ta a. Pu Ruata chuan Recommend-in, ASO-I hnenah a pe ta a, a tuk deuh lawk maiah chuan Revenue Department a mi, Surveyor Pu Aingenga chu a teh turin an rawn tir nghal a, Lalchungnunga a rawn hruai a, Biak In hmun chu min teh felsak ta a. Revenue Department chuan min teh felsak vek mahse; mi thenkhatten, ‘He lai hi vantlang hmun atan kan tih a ni a, UPC-ho hi vantlang an tling lo’ tia sawi buaiin, Revenue Minister hnenah an thlen a. Minister Pu Tawnluia lo kal lai a ni a, Circuit House-ah ka kal a, a hnenah ka sawi ve leh ta a. Biak In hmun chu min pe ngei turin ka dil lui tlat a. Tin, Minister Pu HL. Ruata hnenah ka kal reng bawk a, ani’n ‘Pek tur an ni’ a ti bur mai bawk si a, Pu Ruata pawh chu an huat phah ta reng a. ‘Pek an nih pawhin a mual phel hi ni se’ tiin an han dil leh na a, mahse Pu Ruata chuan ‘A mual pumpui hian pek tur’ a lo ti bur mai si a. Chuvangin a tlang pumpui hian kan chang ta a ni. Tichuan revenue Department lamin min teh felsak leh a, a pass pawh kan nei ta a ni,” a ti.

Inhmuh khawm vawi 3-na :

Hemi hnu hian Farm Veng bikte inhmuh khawmna neih a, Biak In sak dan tur ngaihtuah ho turin inkoh khawm a ni a, Ni 14.9.1987 Thawhtanni zanah, Pu L. Rintluanga Inah inhmu khawmin, heng mite hi an kal khawm leh a, Bro. Lianchhunga, Bro. ZD. Lalhmingthanga, Upa R. Taikawla, Bro. H. Dopuia, Bro. F. Rualzakhuma, Bro. Rintluanga, Bro. HT. Vanlalngura, Bro. R. Taithuama, Upa F. Neihhnuna te an ni. Heng mite inhmu khawm hian Building Committee din an rawt a, acting-in heng mite hi an ruat a ni.

Heng mite hi Building Committee inruat hmasa bera hruaitute chu an ni. Hemi tuma Meeting hian Meeting hmasa Acting Chairman leh Secretary an lo ruat tawh chu, ‘Chanmari Church Board-in in dan min phalsak hma loh chuan thiat rih ila, Acting Building Committee hian min kaihruai rih mai se’ tiin an rel a ni.

A hma chuan Biak In hmun chauh ngaihtuah a ni a, amaherawhchu Biak In hmun tur te sam faia laih tan a han nih chuan, Farm Veng UPC te rilruah chuan Chanmari-a bet reng lo va, Farm Veng UPC hming pua in dan thuai duhna rilru a lo piang tan ta a, hetih lai hian In 38 vel leh Member 200 chuang an ni ve tawh a, chu chuan anmahni pawh a tiphur leh zual a ni. Chutichuan Chanmari Church Board-ah In dan dilna chu theh luh an lo rel ta a. Acting Secretary atana an ruat Upa Neihhnuna kuta an dah angin ani chuan, Ni 2.10.1987 zanah in dan dilna chu a thehlut ta a. Chanmari Church Board pawh chuan ngaihtuah thuaiin, kumthar 1988-ah Farm Veng in dan chu an phalsak ta a, kum 1987 chhung ngeiin Acting-a an hruaitu tur lo inruat turin hriattir an ni nghal bawk. Krismas leh Kumthar erawh chu Chanmari Kohhranah a huhova hman rih tur a ni thung a ni.

Inhmuh khawm vawi 4-na :

Chanmari Church Board Committee-in in dan phalsak an nih hnua, Acting-a an hruaitu tur ruat tura tih an nih angin Ni 4.10.1987 Sunday chawhnu Dar 2:00 pm-ah chuan, Bro. Ng. Lianchhunga Inah, Rawngbawltute inhmuh khawm a ni a, chutah chuan Acting-a hruaitu turte an ruat leh ta a.

Rawngbawltu zawng zawngte chu Acting Church Board Member atan ruat nghal an ni ta bawk a ni. Church Board Member te chu, Rev. Saidawla, Rev. Zalawma, Upa K. Lianhnuna, Upa R. Taikawla, Bro. ZD. Lalhmingthanga, Bro. Zamawia, Bro. Rualkhuma, Bro. H. Lalmuana leh Bro. Chaldaia te an ni.

Tichuan he an rorelna hian Building Committee an lo din tawh chu a thiat nghal bawk a ni. Ni 6.10.1987 zanah Biak In hmun laih hnatlang chhunzawm leh Bazar loh ni zingkarah, a tlawmngai thei apiang hnatlan zel ni se tih an rel bawk a, hei hi in dan phalsak an nih hnua Adhoc Church Board Meeting hmasa berin a relte an ni.

Biak In sa tura inbuatsaihna chu a kal mup mup a, in dan tumna chuan rilru a luah nasat em avangin, Biak In hmun lam lo chu rilruin a hawi tak tak thei lo va, hun awl zawng zawng hnawh khahna, hun awl kher lovah pawh Biak In hmun laih chuan hun tam zawk a ei ral lo thei ta lo va, zing, chhun, zan, eng lai pawhin Biak In hmun turah chuan hnathawk hmuh tur an awm deuh reng thin. Chhunah ni eng, zanah Electric eng leh Thla eng, zing daiah pawh thlan tla hluamin Biak In hmun chu an lai thin a ni. Biak In sakna tur sumtuak nan Bialtu Pastor Quarter (Biak In hmun bul) extend hna chu Farm Venga UPC hmingin thawh a ni a, chu bakah tuna LKM School bula District UPC Quarter hi Missions Director Quarter atan Lunglei District UPC chuan ruahmanin, chumi Quarter tur sak hnate chu thawh a ni. Tin, Vety Farm sira kawngpui kal chho hi Soil Department lamin siam thain Lung phah hnate chu Kohhranin thawh a ni bawk. Hemi bakah hian mimal, chhung tin hnenah Biak In sakna tur intuk a ni bawk a. Chutiang chuan sumtuak hna chu kalpui reng a ni a. Biak In ban tur banril chu Rawngbawltu chinin Tlabung kawng lamah an zawng a, ni lengin an zawng a, thenkhat phei chu an chau chhe der hial a ni. Chutiang chuan thahnem an ngai tlang em em a. Tin, a bik takin mimalah chuan Sist. PC. Sainghingi thahnemngaihna, Kohhranin a hlawkpui hle a, Biak In sak nan thingzai (chartin leh thing phek) a thawh mai bakah, Biak In chung tur Rangva leina a thawh a, Steel Chair pawh thawhin, sumtuak nan, a TV leh Video hmangin Film chi hrang hrang an chhuah nasa hle bawk a ni.

Biak In sak tan a ni ta :

Sumtuak kal reng karah, Biak In sak hna chu tan phawt thaa hriat a nih avangin Ni 1.2.1988 zana Church Board Committee chuan Ni 6.2.1988 chu Biak In sak/rel tan ni atan a ruat ta a. Hemi ni hi Biak In sak/rel tan ni chu a ni ta a ni. Biak In hi a dung ft 36 leh a vang ft 26, Assam Type-a sak tura rel a ni a, member te pawh an phur tlang hle. Biak In sak chhung hian Mistiri-te chu tlawmngaih chhuaha Tukverh frame leh Kawngka/Tukverh biang (Chokut), a thlawna siam tura beisei an ni a, chu bakah In tinah Biak In sakna tur thawhlawm intukin khawn kal reng a ni. Tin, Chanmari Church Board pawhin Rangva bundle 1 an rawn tum ve bawk a, a bang atana Tile leina tur pualin fehchhuahte an nei nasa hle bawk. Chanmari Local Church Board-a an dil ang leh phalsak an nih angin, Ni 4.10.1988 Sunday inkhawmnaah Biak In sakna tur pual thawhlawm an khawn bawk a ni. Chutih lai chuan mahni Biak In ngeia inkhawm ve chu a chakawm tawh bawk a ni ang, PYD leh LAD Joint Committee chuan ‘October 1988 thla chhung ngeiin inkhawm hrang ve tawh ila’ tih chu Church Board-ah an thehlut ta a. Chanmari Church Board-ah dil zui nghal a ni a, anni’n an rawn phalsak angin, ‘Inkhawmna neih tum ve ngei ni tawh se’ tiin Church Board pawhin a rel ta a ni. Tin, Biak In thutphah siamna turin mi eng emaw zatin an thutphah te, thingphek leh pawisa te an thawh a. Kohhran member-te chak em em angin inkhawm hranna (Kohhran in dan tanna) chu ni 13 November 1988 (Sunday) hian neih ni se tiin Ni 30 October 1988 zana Church Board Committee chuan thu a ti tlu ta a ni.

Farm Veng Local a piang ta :

Chutia inkhawm hran ni tur lam ruat a lo nih takah chuan, inkhawm hran huna Programme tur pawh hetiang hian duan nghal a ni :

Hun	Chairman	Thuhriltu
Zing dar 9:30 am	Rev. Saidawla, Bialtu Pastor	Rev. H. Chalchhunga, District Superintendent.
Chhun dar 1:30 pm	Evan. C.H. Rongaia, Bial Secretary	Pastor Saithanga, District Secretary
Zan dar 6:30 pm	Rev. P.R. Dawla, Director, Missions Department	Rev. Zalawma, District Treasurer

Ni 13.November, 1988 Sunday-ah chuan lo ruahman lawk angin, Farm Veng UPC Biak In chu luah tan a lo ni ta a. Hemi ni hi Farm Veng Local UPC din tanna ni atan hman a lo ni ta a ni. Inkhawm tan dawnah Pulpit thar, Bro. H. Dopuia siam chu Rawngbawltu ten Biak In chhungah an zawn lut hmasa a, mipuiin pawnah an lo nghak a, Pulpit an dah fel hnuah Khuangpui leh Khuangte nen zaia lam mup mup chungin, Biak In chhungah chuan an lut ta a ni. Inkhawm boruak a thain an phur tlang bawk a, zai apiangin member-te an lam mup mup mai a, Thlarau lam boruak pawh a tla tha a, inkhawm nuam takin an hmang a ni. Inkhawmnaah chuan Lunglei District UPC Superintendent, Rev. H. Chalchhunga chuan, “Vawiin Ni 13.11.1988 Sunday hian United Pentecostal Church, Farm Veng chu a lo piang ta,” tiin Kohhran pakhat kan nih ve tak thu chu a puang a ni. Inkhawmnaah hian he Biak In hmun min petu, Hon’ble Minister, HL. Ruata leh a nupui Pi H. Vanlalngaii te chu, sawm an nih angin an rawn inkhawm a, Pu Ruata pawh thu sawina hun pek a ni. Tin, Pi Ngaitei hian Kohhran thar lo piang chu a lawm nan Bucket leh thingpui inna no min pe nghal bawk. Inkhawm banah thingpui tui tak leh a hmeh semin hun hman a ni.

Biak In hmun sam faia thawh hmasak ber ni chu Ni 24.8.1987 a ni a, chuta tanga rei vak lo, Ni 6.2.1988-ah Biak In ban phun a ni a, Ni 13.11.1988 (Sunday)-ah Chanmari Kohhran atangin in dan a lo ni ta a ni. He Biak In tung ding tur hian Pathianin Kohhran member-te mal a sawm a, hriselna leh phurna te, inlungrualna tha tak te a pe a, member 210 lai maiin Biak In thar tha tak mai chu an lo luah lum ve ta a, Member te pawh an phur tlang hle.

Kohhran Property lam :

Chanmari Kohhran atanga in dan a lo nih hian Chanmari Kohhran hian bungrua eng emaw zatin an in dan a, hriat theih chinah in dan laia Kohhranin bungrua (Property) a neihte chu hengte hi an ni :

Biak In hawn tuk inkhawmah hian thawhlawm Rs. 187.90 hmuh a ni a, zan inkhawmah Rs. 119.85 hmuh a ni bawk. Chanmari Church Board-ah Belpui - 2, Dekchi - 1, Almirah - 1, Thleng - 60, Blackboard - 2, Chair - 2, Petromax - 1 leh Dawhkan - 1 te dil a ni a, heng dilna atang hian Belpui - 2, Thutphah - 10, Blackboard - 1 leh Petromax - 1 te chu phal takin min rawn pe a ni. Tin, in dan hma sum reng reng, Department te pawh huapin hmun thuma thena hmun khat sem ve tura Farm Veng Church Board-in a dil pawh insem a ni bawk a ni.

Kohhran kal zel dan :

Biak In luah a nih meuh chuan mahni kut kawiha engkim awm a tul dawn ta a, Bial leh Districta chhun luh tur target hrang hrang te a lo nei ve ta a. Chumai bakah, Biak In hnung lam chu extend a ni ta zel a, Biak In hmun pawh chu tlang pawng rawt a nih avangin humhalh a remchang a, Barbed wire-a hung chhuah a ni ta pup mai a, hmun hma pawh a phuisui chak khawp mai. Mahse Biak In luah hma khan Biak In sakna tur thil tam tak kha, a remchan dan angin a baa lak a ni hlawm a, chungte chu rulh a lo ngai a, member-te an rim tlauh tlauh hle a ni. Hetih karah hian thil dang dai ve tak mai pakhat chu, Farm veng LAD-in an target te tha taka an tlak theih avanga, Pathian hnena lawmthu sawina ruai siamna tur, Church Board-ah sum an theh luh chu Ni 9.8.1989 zanah ngaihtuah a ni a, Ni 12.8.1989-ah ruai nen hlim taka hmang turin Kohhranin a pass a ni. He lawmthu sawina ruai hi hlim taka theh a niin thlarau boruak a thain, hemi tum hian chawimawina vawi 7 lai maia chhunzawm a ni.

Kum 1993-ah Sunday School Hall saka luah a ni a, Kum 1998, September thlaah Farm Veng UPC din atanga a kum 10 tlinna (10th Anniversary) hlim taka lawm a ni bawk. Ni 31.1.1999-ah PMD din a lo ni ve leh ta bawk.

Biak In hmasa chu a lo upat ve tak avang leh, Kohhran Member-te kan lo pun zel avangin, Biak In thar sak tula hriatna a lo awm leh ta a. Building Committee dinin, an niho hmalakna hnuaiah chuan ni 12.5.2001-ah ban pathum phunin Biak In thar sak hna chu tan a ni ta a ni. He Biak In lungphum hi Rev. H. Chalchhunga, District Superintendent Retired-in a phum nghe nghe. Biak In hlui chhung khungin Biak In thar chu sak kal a ni ta mup mup mai a, Kohhran sum awm sa bakah, Mizoram Co-operative Apex Bank, Lungleiah Rs. 3,50,000/- puk a ni a, Biak In hi a dung ft 60, a vang ft 34-a sak a ni. Hetih hun lai hi chuan, Lunglei khawpui chhunga UPC Biak In lian ber leh tha ber pawl tia chhal ngam hial khawpa tha, Concrete Building mawi tak mai a ni. Biak In hi a sak kum hian luah theiha peih nghal a ni. Biak In ren hlui chuan Biak In bulah Quarter sak a ni a, hei hi mi luah hawh atan sak a ni. Tin, kum 2002 kum khan Biak In bulah Store sak a ni bawk.

Kum 2005 a lo her chhuah meuh chuan, Biak In hawn lohva luah reng chu Kohhran rorel khawl chuan tha ti lovin, Biak In hawn chu a rel ta a. Tichuan engkim peih fel a nih hnu Ni 14 May 2005 chuan Biak In hawnna chu buatsaih a ni ta a, Farm Veng Kohhrana lo lawi tawh zawng zawngte, an awmna chin la hriatte chu sawm vek an ni a, Bialtu Pastor lo ni tawh zawng zawngte nen, District hruaitute leh Bial chhung Local hrang hrangte nen, Biak In hawnnaa tel tur hian sawm vek an ni. Biak In hi Rev. CS. Pachhunga, District Superintendent-in a hawng. Tin, hemi kum hian Sist. Laltawni boral avangin, amah hriatreng nan a faten Sound Speaker te pahnih Kohhran an rawn pe a, Kohhran te kan lawm hle a ni.

Kum 2013-ah Biak In hma lam sak chhunzawm a, Gallery siam chu Project-ah neiin Mizoram Rural Bank-ah Rs. 8,00,000/- puk a ni a, Biak In hma lam leh Gallery chu siam a ni ta a ni. Tin, Sist. Lalrammawii te chhungkua chuan an Pa, Rbt.TC. Lalrinawma, kum 2011-a boral ta hriatreng nan Kohhranah Dar pawh rik chi chu min rawn pe a, an chhungkaw chungah kan lawm hle a ni.

Ni 13 November 2013-ah Kohhran din atanga a kum 25-na (Silver Jubilee) chu, ruai nen hlim taka lawm a ni. Tin, hemi kum hian Kohhran Dan anga inneih that dil Nupa tuak sarih (7) te chu Rev. C. Lalrintluanga’n a inneih thattir a ni. Kum 2014-ah Committee Room-a hman tur Plastic Chair 30 Nos. lei a ni a, Kum 2015-ah Joint Committee ten Pulpit hnung siamna tur bul an rawn tum a, Kohhranin bawhzuiin Pulpit hnung chu mawi taka siam a ni.

Kum 2016-ah Bro. C. Lalkima te nupain an fapa boral ta, Bro. C. Lalawmpuia hriatreng nan Pulpit-a hun tur thutthleng (Sofa), Kohhran te min pe a, anni chhungkua hian Kohhran tan Sound leina tur Rs. 1,00,000/- min pe bawk a, kan lawm hle a ni.

Kum 2016 hian Biak In hnung lamah Committee Room tur, a dung ft 34, a vang ft 15-a zau sak a ni a, hei hi a kum leh 2017-ah luah luh a ni.

Kum 2017 hian Rawngbawltute Bio-data chu siam thar vek a ni a, Biak In hma lam chokut, thinga siam chu PMD ten Alluminium frame-in an thlak a. PYD ten Kohhran hman tur Water Cooler tha tak mai an rawn pe bawk a, Kohhranin Commercial Gas Connection neiin, Commercial Gas hi bur 4 neih a ni, hemi kum hian Revival Camping neih a ni bawk.

Kum 2017 hian Kohhran Choka sak nan Mizoram Rural Bank-ah Loan Rs. 12,00,000/- puk a ni a, Kohhran Choka sakna turah hian Building Committee siam a ni a, hengte hi Building Committee puipate an ni.

Kohhran Choka hi kum 2017 hian sak zawh nghal a ni.

Kum 2018-ah Biak In Tukverh zar chu a thara thlak a ni a, Biak Inah hian Wall Fan 15 dah a ni a, Stage siam that a ni bawk. Kum 2019-ah Biak In kawt zawl chu Cement-a chhun a ni a, a kum leh Kum 2020-ah Biak In panna kawng chu Cement bawka chhun a ni leh a, Biak In Gate pui siam thar a niin Kohhran hman tur Computer Set lei a ni bawk.

Hruaitu hmasate:

Tun dinhmun:

Farm Veng Local-ah hian member 473 (kum 2025 report-ah) an awm mek a, Upa - 7, Licence Holder leh B/W nen - 5 an awm. Rawngbawltu - 12 an awm mek. PYD member - 169, LAD member 118, PCD member - 74, PMD member - 39 an awm mek.

Kum 2025-2026 Local hruaitute chu :