KOHHRAN DIN CHHOH DAN

Kum 1958 khan Lungrang South-I Local (Lungrang ‘S’ Local tih hi a hming hmasa a ni a, an khaw hlui/ hlun zawk a ni. Tun thlengin he khua hian Lungrang South tih hming an la pu a, 2024 khan Lungrang South-I tiin Village Council tan a hming an thlak ta a ni. Kohhranah erawh Upper Lungrang tih niin, 2024 atangin UPC Lungrang South-I tiin Disrict Board chuan a pawmpui ta a ni. Lungrang ‘S’ Local hming neitu erawh kawn lama tla thla ten an pu chhunzawm ta zawk a ni). Hun hmasa lamah chuan In 100 khua vel a ni a. Chung hun lai chuan, Baptist Kohhran leh Seventh Day Kohhran chauh an awm thin. Kum 1958-ah hian an khuaah hlimna a thleng nasa hle.

Kum 1961, June thlaah Pastor Laltluanga, Tirhkoh Chuauruma, Tirhkoh Zahlira, Bro. Aithanga, Bro. Aitluanga, Bro. Lawmkunga te leh an thian eng emaw zatte nen an zu kal a, inkhawm leh zaikhawm an neihpui thin. Chawlhkar khat an champui hnuin Ni 5.6.1961-ah Baptisma khur hawn a ni a, Pastor Laltluang’n Baptisma a chantir. Baptisma chang hmasate chu Tlangval Buaithanga, Bro. Suakhranga leh Sis. Chalperi te an ni.

Kohhran atanga dodalna:

Hetianga Baptisma chang an lo awm takah chuan, Kohhran Secretary thu puangtu chuan hetiang hian a puang ta a, “Tun tuma Isua hminga Baptisma chang zawng zawng khan lo hria ula, tun atang chuan heng khuang, dar leh Kohhran ro thilah te reng reng hian chanvo in nei tawh lo ang tiin ka puang e. Tin, Sawnga (Evan. LH. Lalbiaksanga pa) pawh, Isua hmingin Baptisma chang kher lo mahse, Baptisma khurah phur taka, Haleluiah, Lalpan a hmu leh ta a tih a, bengthlenga a bawp a khai avangin, upa a nihna te leh heng khuang leh dar leh Kohhran ro thilah te reng reng hian, engmah chanvo a nei tawh lo tih ka hriattir bawk e,” tiin inkhawm tam lai takin a puang.

An inkhawm hrang ta:

Hetia dodalna a awm takah chuan an inkhawm hrang ta a, Pu Rawnala chuan Biak in an neih theih hma chuan an in chu inkhawm nan a pe a, an lawm hle. Khuang an nei lo va, Tin an vua a. Dar an nei lo a, Baptist Dar ri chu an ring ve mai thin bawk. An inkhawm hran hun hi Ni 11.6.1961 Sunday zing a ni. Hemi tuka an inkhawm hla sak chu, Mission lamin, “Ka rin chu sual thliin nuai mahse, a chuai chuang lo” tih a ni a. Keini lamin “Ka vengte leh ka chhungtein min duh lo mahse” tih hla kan sa a, an tui dun hle a ni awm e. Hetia inkhawm hrang hi Kohhran member zat ve deuh thaw niin an sawi. He khua-ah hian Pentecost Kohhran Pastor hmasa, Pastor Zabuaia’n lu a phum nghe nghe.

Kohhran hruaitu hmasate chu:

• Upa Sawnga : Baptist Kohhran Village Pastor
• Upa Zazawna : Baptist Kohhran Committee Chairman nilai)
• Rawngbawltute : Bro. Suakhranga, Bro. Lalchawia, Bro. Pathima
• Chairman : Upa Zazawna
• Secretary/Treasurer : Lalchawia

TUNA KOHHRAN DINHMUN

A khaw mihring tam zawk, kawn vengah an tlak tak avangin a khaw hlun zawk hi, In 80 vel chauh an lo ni ta a ni. Biak in tha District tanpuina bakah, Kohhrante inpekna avangin Concrete Biak in feet 45/ Feet 21 an sa tawh a. Kohhran In 17 kan nei mek a. Member chhiar hnuhnung ber (2025) ah member 65 an awm mek a ni. PYD tih loh Kohhran Department pawh a ding kim.

2025-2026 Kohhran hruaitute :

• Chairman : Upa Lawmawma
• Secretary : Upa Rindika
• Treasurer : Upa Dengngura

Kohhran hming thlak :

Kum 2024 atang khan Upper Lungrang tih thin chu Lungrang South-I tih a ni ta a. Kohhran hming pawhin a pu zui ta a ni.