Theiriat hi Lunglei khawpui chhunga awm, chhim lama tlang sang taka awm a ni. Mizoten ringtu hmasa an tih, Pukpuia awm te, Pukpui khaw lal Dara’n ringtu a hnawhchhuahte pem khawmna hmun a ni a, May ni 20, 1909-ah Theiriat khua hi luah tan a ni. Hetih hun laia ringtu hmasa an tihte hi Baptist Kohhran an ni. Thlarau mi inti leh Zawlneiin intite pawh an awm nawk hlawm.

Kum 1950 bawr vel-ah Theiriat khuaah hian harhna a lo thleng a, Thlarau thianghlimin a bual ât te, hlim rui kan tih ang chite an lo chhuak a. Baptist Kohhran hruaitute leh member thenkhatten an hre thiam lo va, an thlarau chan chu hre thiam lovin an mil lo tan ta. Heng mi hlimhote hi Biak inah an leng ve ta lo va, Pulpit hman te an inchuh a, mi hlimho hian khuangpui leh khuang tê lak luh an tum a, hlim ve lo ho chuan an phal thin si lo va. Biak in atangin an hnuk chhuak dawr dawr thin a ni. Theiriat khuaa Kohhran hruaitute chu BCM Headquarters-a an hruaitute pawhin, “Heng mi hlimhote hi rilru zau tak nen lo enkawl ula, an thlarau chan hi lo timit suh u la, lo tawngtaipui rawh u,” tia an thu chah pawh an ti hlawhtling duh lo a ni.

UPC NEI Din A Nih Dan

Hun a lo kal zel a, September 1952-a Pu Saihnuna, Tarpho-a rawngbawlna an neih zawh hian, Theiriat a pan leh a. Theiriat-ah hian mi hlimho chu an nek chep nasa hle mai a. Hlimna an chan avanga Baptist Kohhranin rawngbawlna an chawlhtir; Upa Rochhunga leh Senbuanga te leh mi hlimhote chuan inkhawm hran an lo buatsaih a. Chung lai chuan an boruak tawn nena inhmeh em em, ‘Ka buaina ram thlalerah hian’ tih hla hi an tuipui em em thin a ni. Theiriata mi hlimho hnenah chuan, “UPC zawm duh Vanlaiphai leileta District Conference neihnaah in lo kal ang a, in lo in-report dawn nia,” tiin thu a thlah a. October 1952-a District Conference, Vanlaiphai leileta neihah chuan Upa Rochhunga te chu an han kal nghe nghe a ni. September 1952 bawr vel atang hian Baptist Kohhran atanga chhuakin an inbawl hrang ta a ni. Hetih hun laia a khaipa deuh te chu :

1. Pu C. Rochana
2. Pu S. Kawlbenga
3. Pu P. Rochhunga
4. Pu K. Rohranga
5. Pu C. Chalnghaka

Heng mi hlimhote hi Pu P. Rochhunga, Pu Rohanga leh Pu S. Lalrema te inah an inkhawm thin a. Mi hlim ho ngai theft lotu ten tibuaiin an tawng nasa thei thin hle. Hetih hun lai hian UPC tih hming pawh pu lovin ‘Pa Pawl’ tih an ni thin.

Kum 1953-ah Pu Saihnuna chu Theiriatah kal lehin, Kohhran hmingchu UPC a nih thu te a hrilh chiang a. Member 30 vel an awm. Chhungkuaa UPC an ni hlawm lo va, kar chhuak an nih nawk avangin an tam lo a ni. Tichuan, Theiriatah hian Ni 4.10.1953-ah UPC NEI chu a lo ding ta a ni. Pu Saihnuna chuan puipa turte a ruat fel a. Chung mite chu :

Upate :

1. S. Lalrema, Head Deacon & Secretary
2. Rochhunga
3. Hranghnuaia

Member-te :

1. Rochana
2. Kawlbenga
3. C. Chalnghaka
4. Rohanga
5. Paduma
6. Senbuanga
7. Saikaia
8. Bawlpuia
9. Liankhuma

Hetianga Kohhran pangngaia a din hnu hian Pu Lalringa, Pu Kaptlaia leh Pu Satzauvate pawh an lo lut ve nghal a. Hetih hun lai vel hian Minute bute an la nei rih lo va, rorel thu khawm tur pawh inkhawmnaah an puang a, paho chin zawngin ro an rel mai thin a ni. An rorelte chu rilru lamah vawngin an bawhzui mai thin niin a lang. Hmuhsitna leh diriamna, chil chhak khumna leh deuna tinreng karah Lalpa Isua hming tantute chuan zam lovin Lalpa leh A Kohhrante tan ke an pen zel a. Rev. H. Chalchhunga, khawpui bialtu a nih hnuah Ni 25.4.1971 khan Kohhran hi a form a. Hetiangin :

Upate :

1. Rohnuna
2. S. Biakkima
3. Rochhunga
4. Lianbuka

Committee Member-te :

1. Tlangthanga
2. Lalrema
3. Biakchhunga

Office Bearers :

Kum 1971 velah hian Kohhran member 100 vel an tling tawh a. Hetih hun lai vel hi chuan kum tin an inthlang tha thin. Pu C. Vannghaka’n Theiriat Dawrzawl bulah Biak in hmun tur pe-in Biak In sak a ni.

Kum 1972 bawr vel atangin Department kim - PYD, LAD, Sunday School, Missions Department, PCD te an nei thei tawh a. Kawng hrang hrangin Kohhran pawh a thang chho zel a. Ni 1 June 1990 atangin Headquarters Bial atangin Theiriat Bial a lo in dang ve leh ta a. Theiriat hi Pastor Quarter thut, Bial Centre niin tun thlengin a la ni ta reng a ni. Theiriat Bialtu Pastor hmasaber chu Pastor R. Lalrosanga a ni.

Inkaihhruaina Dan Lam

Theiriat bial a lo din Ni 1 June 1990 atangin, Constitution leh District inkaihhruaina behchhanin tualchhung inkaihhruaina dan bu siam a ni a, thianghlimna beihpui thlak nghalin ‘Rawngbawltu chinten zuk leh hmuam nghei vek tur’ tih chu pass-in vawiin thlengin vawn nun reng a ni. Tualchhung inkaihhruaina hi siam rem chhoh zel a nih bakah a huam pawh tihzauh a ni ta zel a. Tun dinhmunah tualchhung inkaihhruaina dan bu chang tlung tak neih a ni.

Biak In

Kum 1996 atangin Biak in sak that hna hi tan a ni a, Kohhran chhung tin te, Department hrang hrangte thahnemngaihna leh inpeknain a ban leh beam, a bang te nen RCC-a sak niin a chung Rangva a ni. Hei hi hun rei tak luah chhovin kum 2018 thleng, Kohhran member 340 bawr velin Pathian biak inkhawm nana hman thin a ni. Kum 2018-ah vek hian Biak in sak that tura ruahman a ni a, biak in thiatin a hmun hi JCB hmanga laih hniam vek a ni a. Biak In sakna tur atan hian Bank-ah Loan lak a ni a, District atangin Biak In sak tanpuina dawn a ni bawk. Biak In hmun laih a nih lai hian Evan. C. Chawnthuama Inah inkhawm thin a ni. A hnuai hi kum 2020 kumtir lamah luah luh a ni leh a. Tunah hian Biak In sak hna hi, Church Board Committee te hmalaknain thawh mek a ni a. Bank-ah loan lak belh a, kumin 2026 chhunga sak peih a, luah luh hman ngei tura hmalak mek a ni.

Tlangkawmna

Tun dinhmunah UPC Theiriat Local-ah hian member 367 awm mekin Kohhranpui hnuaiah hian Department leh Committee 3 a awm mek bawk a. Tualchhung inkaihhruaina angin Department leh Committee hruaitute, Committee member te leh an plan & Budget te hi Kohhranpui Committee-in a pawmpui thin a. Department leh Committee ten Kohhranpui zai ngaia hma an la thin chu, Kohhran kalphungah a fel faiin chhunzawm zel tlakah an ngai.

Tun Dinhmun

Theiriat Local-ah hian Member 367 (kum 2025 report) an awm mek a, Upa - 6, Licence Holder-3, Rawngbawltu - 6 an awm mek.

Kum 2025-2026 Chhunga Kohhranpui Hruaitute