S. Vanlaiphai khua :

S. Vanlaiphai khua hi Mizoram khawchhak lam Lunglei atanga Km 98 vela hla, Hnahthial District-a awm a ni.

UPC Kohhran ding tura hmalakna :

Kum 196- a S. Vanlaiphai pem lut, Rualzakhuma leh pem lut ve tho, Pu Tawnliana Khawlhring (Dawrkai) te chhungkuain, kum 1962-ah UPC Kohhran hi an din a, Ni 20.12.1962-ah inkhawm hranna hmasa ber chu an nei a ni. Biak in pawh nei lovin Pu Rualzakhuma Inah an inkhawm mai thin. Hun lo kal zelah, Pu F. Vanzika te chhungkua, Pu K. Lianhuaia te nupa leh Pu Budena te chhungkua an tel ve leh ta bawk.

Kohhran a din tirh hian member 10 emaw chauh an ni. Mi dang hruaitu hran awm lovin, Pu Rualzakhuma leh Pu Tawnliana chu hruaitu an ni tawp rih mai a ni. Hun a lo kal zel a, dan pangngaia Kohhran form tharna hmasa ber chu Ni 22 September 1977-ah Bialtu Pastor, Rev. Ralianga’n a form a ni.

Hruaitu hmasate :

Kum 1977-a Kohhran form a nih tuma hruaitute chu hengte hi a ni :

Biak in hmun thu :

Biak in tun din dan :

Kum 1969-ah chuan Biak in pawh an sa ve ta hial a ni. Kohhran dang pawh ngai bik lem lovin, hlim takin an inpawl ho thin a, an hnatlang ho thin a ni. Thu sai sa deuhtute chu Pu Rualzakhuma, Pu Tawnliana leh Pu F. Lalengate an ni.

Evangelist (Home missionary) lo awm tawhte :

S. Vanlaiphaiah hian member an tam loh avangin, Bial Centre-a hman a nih hmain Evangelist/Home Missionary dah reng thin a ni a, a hnuaia mite hi an lo awm tawh dan a ni.

Evangelist te hian Kohhran hmangaihna nasa tak nen rawngbawlin, Biak in leh Quarters sak leh Repair ngai te an hun lai theuha a tul ang zelin, hnathawkin ram lak hnathawh nen an buai thei hle a ni.

Biak In sak chhoh dan :

Kum 1969-ah S. Vanlaiphai UPC Kohhran Biak In hmasaber chu sak a ni a, a hnu kum 1973 velah chuan sak that leh a lo tul tak avangin hralh a ni (Biak in hi sak that a tul tawh avangin, Evan. Tawnliana hnenah Rs. 40 (sawm li)-in hralh a ni). Kohhranin inkhawmna in kan mamawh dawn avangin, a in extend nan a hmang ang a, ‘Biak In sak that a nih hma chuan Kohhranhoten inkhawm nan leh pun khawm nan kan hman bawk dawn avangin Rs. 40/- in kan pe mai a ni’ tiin 1973 minute bu-ah a lang. Tichuan Biak In chu sak tumin an inbuatsaih a, a châk - Thing phaw te lain an hnatlang thin a, Biak in chu an tung ding ve leh ta a. Hun a lo kal zel a, Lunglei District lam atangin Evangelist te dah a lo ni a, Kum 1988-89 bawr vel khan Biak in hi sa tha lehin, a dung Ft-30, a vang Ft.18-a zau niin, District atangin Biak in chung chu Rangvain an khuhsak ta a ni. Hun a lo kal leh deuh a, Biak in chuan sawp rawp lam lo pan lehin a lo awn ta deuh a. Kum 1992-1994 vel khan Biak in awn chu ti dingin chei that a ni a, a bang pawh thing phelin thlak a lo ni a, Assam type pangai takin din a ni.

Kum 1997-2000-ah phei chuan Biak in Compound-ah Evangelist Quarters rel hial a lo ni ta a, heng hun lai hian Quarters chu sak zawh hma deuhin khaw tlang hruaitute atangin harsatnate an tawk a Quarters pawh an chawlh phahin an khaihlak fo a ni. Kum 2001-2007-ah chuan Quarters te sa zovin, Biak in pawh thuam that ngai lai ang ang te thuam thain, a bang pawh Tile hman a ni ta ni. Hun lo kal zelah pawh, Evangelist awm apiang te hovin Biakin leh Quarters chei that hna, extend te thawkin hma an la thin a ni.

Tuna Biak in sak a nih dan :

Kum 2015-ah Bial Centre-ah S. Vanlaiphai chu dah a lo ni ta a, Bialtu Pastor Jerry Lalmuanawma’n thut chilhin, tuna Biak In luah lai mek hi sak a lo ni leh ta a ni. He Biak in hi a dung feet 45, a vang feet 21 a ni a, Ni 10 January 2018 khan Biak in Lungphum hi Rev. R. Lalrosanga, District Superintendent-in phumna a nei a, Pawisa neih lawk sa an neih lem loh avangin, khawpui Local Lunglei College veng leh Hrangchalkawnah appeal neih a ni. A sak chhung hian Theiriat Bial Missions Department-in Work Camp neiin kar khat an sa a, Local bakah Bial chhung Kohhran member ten nasa takin an thawhpui bawk. District atangin tanpuina Rs. 2,30,000 hmuh a ni bawk a, Ni 10 January 2019 khan Rev. R. Lalrosanga, District Superintendent, Lunglei District chuan hawnna a nei a, Bial huapa ruai buatsaihin hun hman a ni bawk.

Kohhrana thil thleng chhinchhiah tlak :

1. Kohhran din tirh lam, kum 1973 vel hian member 46 vel an ni.
2. Kum 1978-ah Rs. 6/- in Kohhran Seal siamtir a ni. (Pu Vanzika Pawisa Pukin)
3. Kum 1989-ah Biak in Dar hi Thingsai a mi lak a ni.

Tun dinhmun :

Report siam lai (2025) ah hian member 33 an ni mek.