KOHHRAN DIN CHHOH DAN

Lungrang khua hi Lunglei atangin KM 53 vela hla a ni a. Khaw thlang lam Chawngte Road-a khaw awm a ni. Khaw nuam tak leh khaw theng thaw nuam tak tlang chhipa awm a ni. Tun hma chuan Lungrang hi VC pakhat hnuaia awm an ni a. Khawvel hmasawn zelna avangin, Sawrkar lamin kawngpui chu khaw hnuaiah a kaltir ta a. Tichuan, kawngpui kalna hmunah chuan chhungkaw tam zawk an chhuk thla ta a (tun kan awm mekna hi). Tunah chuan VC pahnih a ding ta a. Kohhran pawh pahnih a lo awm ta a ni. Lungrang South Local atangin Chawngte lam kawngah Dinthar Local a ding leh ta bawk.

Mak deuh mai chu kawngpui lam pana chhuk leh khaw hmun nghaktute inkarah, a hun laiin inhriat thiam lohna thil deuh a lo awm pawhin, keini UPC Kohhran zingah chuan harsatna em em min thlen miah loh hi a vanneihthlak hle. Ni 22 January 1984 khan bialtu Pastor, Pastor Rodawla remtihnain Upa Patawia hovin Lungrang South Local chu din a lo ni ta a ni.

Tichuan Kohhran din tak chu Ni 22 January 1984 a lo ni ta a ni. Chutih laia hruaitute chu :

• Chairman : Upa Lalnghinglova
• Secretary/Treasurer : Rbt. Lalchawia

Tunah chuan a hun laia Kohhran hruaitu tam zawkte chuan mual min liamsan tawh a, Upa Lianzuala hi tunah hian Chawngte Local-ah awmin min la dampui a ni.

BIAK IN

Kohhran din a nih hma 1983-ah hian Biak in hi Dap rapin, a dung Ft 30 avangin 15 ft-in a lo ding tawh a, thutna te pawh Mau phuar khawm hman mai thin a ni.

Ni 22 December 1983 khan Mau rap Biak in chu sak zawh a ni a. Ni 25 December 1983 zanah luah luh a ni.

Biak in hmasa ber hi dap rap a ni a, a kum lawkah Semi Pucca-in an sa leh a, chu chu 1985-1989 thleng a ding. Chumi hnuah Assam Type-in 1990 khan sak leh a ni a. Tunah chuan RCC-in Biak in kan lo nei ta a ni. Biak in hmun hmasa ber hi a kal khân a nawm loh deuh avangin, Church Board Committee chuan VC hnenah, Pu Patawia kawm chhak Upper Lungrang pan chhohna kawngpui chung hi an dil a, an phal loh avangin tuna kan Biak in hmun hi dil leh a ni a. Ruahman dan chuan dawmdawi in hmun tur atana tih a ni awm e. Mahse, kan hruaituten thahnemngai takin hma an la zel a, tuna kan biak in hmun tha deuh hi kan lo nei thei ta a ni.

TUN DINHMUN

Tunah hian Kohhran member 282 (Kum 2025) chuang kan ni a. In 62 vel kan ni mek bawk. Department a ding kim a, report siam lai hian Sunday School Hall, RCC-in kawngpui kamah sak a ni a, a hnuai luah theiha siam a ni. A chung lam chu Sunday Hall-ah hmangin, Kohhran ten an tangkaipui hle a ni.

2025-2026 Kohhran hruaitute :

• Chairman : Evan M. Ramthianghlima
• Secretary : Evan J. Lalramchhana
• Treasurer : Upa C. Rinthanga
• Statistician : Upa C. Lalnunpara