Sethlun Local Chanchin

Thingsai atangin Pu Sapchhawna te an pem lut a, anni hi UPC hlang an ni. Anmahni chauhin eng emaw chen UPC an ni a, Luangmual Local-ah te an zuk lawi dawrh dawrh thin. Chung te avang pawh chu a ni ang e, Lungmual bial ten Sethluna Kohhran a din theih nan hian thahnem an ngaiin an vei thin hle a ni. Bialtu Pastor hovin Crusade te neiin, a changin an rammu bawk thin. Mahse, ram a har em avangin Kohhran a ding lawk thei lo va, Pu Sapchhawna te chhungkua pawh chu an lo upain, Luangmual lama inkhawm reng te an tan a lo harsa a, BCM lamah an awm leh ta nge nge a ni.

UPC a lo ding ta :

Hun a lo kal zel a, kum 2018 a lo inher chhuak a, Theiriat Local-a kan rawngbawltu, Unaupa Lalrokima Chhangte chuan a ei zawnna a nih angin, Sethlunah hian Dak lehkha a sem kual thin a, chutia a kual velnaah chuan, an kawngka lu chunga thil intar atangin UPC in pakhat a hmu a, an khawtlang a’n zirchiang deuh chu, UPC member ni thin , UPC-a lawina tur awm loh avanga Baptist Kohhran lama lawi ta an awm nual a ni tih a hre ta a. A vei ta em em a, tichuan UPC In awm chhun, Unaupa Hnehzova, Zaia veng Local lama lawi ta te nen rem ruat hovin, Chutih laia, Luangmual bialtu Pastor, Rev. B. Kamiana leh Theiriat bialtu Pastor Rev. R. Vanlalenga te be rawn chungin, theihtawp a chhuah a. Bialtu Pastor ten a din theih mai an beisei thu District lamah an thlen ta a ni.

District Official-te chuan ngun taka thlirin, Bial hnih bialtu Pastorte nen inbe rawn zelin, Sethlun local din tur chuan hma an la chho ta a ni.

Tichuan a hun leh ni tur te ruat felin, Dt. 18.10.2018 (Oct) Thursday Zanah chuan, Unaupa R. Lalhnehzova In, Sethlunah, Rev. C. Vanlalena, Lunglei District Secretary hovin ‘Sethlun Local UPC’ chu din a lo ni ta a ni. District Board-in an awmna bial tur a ngaihtuah hma atan, Luangmual bial chuan a lo bial a, lo enkawltu (Care taker) atan ruat lailawk an ni. (District Board vawi 194-na December 2018) chuan Luangmual biala awm turin a tinghet ta nghe nghe). Hemi zan hian Luangmual leh Theiriat bial atang tein an bialtu Pastor hovin, mi eng emaw zatin an rawn tawiawm a, Lunglei Ramthar AOC Local atangin eng emaw zatin an rawn telpui bawk a, hemi zan hi hlim takin an hmang a, a lawmna thingpui te an in ho dar dar a ni.

Hruaitu hmasa te :

Kohhran din zan hian hruaitu turte ruat nghal an ni a, a hnuai a mi te hi, Kohhran hruaitu ruat hmasa berte chu an ni :

Ni 25.10.2018-ah Bialtu Pastor Rev. B. Kamliana hovin Kohhran rawngbawltu leh LAD hruaitu tur an ruat leh a ni. Hetiangin :

Biak in neih dan :

Sethlun Local hian Biak in kan neih nghal mai loh avangin, hun eng emaw ti chhung chu Upa R. Lalhnehzova Inah inkhawm a ni thin. Anniin zo takin Kohhrante min dawl thin a, an inpekna a ropui hle a ni.

Sethlun khaw hmawr a, Pu Ricky-a (Ramthar veng) khawl In hmun chu, hralh a phal tih hriat a ni a, thiam ang tawkin dawr chhin a ni a, a lo phal ngei a, amaherawhchu, In pahnih dinglai leh a hmun zaupui mai a nih avangin a man a to hle mai a, Nuai sawmhnih lai a chhiar a ni. District-ah thlen tawp mai ila tiin rel a ni a, kan bialtu Pastor Rev. B. Kamliana hovin dilnate siamin District Board-ah theh luh a ni a. District Board Vawi 194-na chuan kan awh em em chu Biak in hmun atan min leisak ta a ni.

Kohhranhote kan lawmin kan phur em em a, District remruatpuina leh an phalnain Building ding lai chu Biak in atan kan chei ta mup mup mai a. Kan din atanga thla thumna lekah Biak in tha tak kan han nei nghal mai kha kan va hlim em. Chu kan Biak in chu kan phak ang tawka chei belh hlek hlekin, tun thlengin kan la luah ve ta zel a ni.

Kan Biak in Building sirah hian Quarters pakhat, District-in a lei tel a ding bawk a, chu pawh chu Sunday School Hall atan te, a chang leh Choka atan te, a changin Zaikhawmna In atan te kan hmang thin a, kan hlim ve em em thin a ni.

Tun dinhmun :

Sethlun Local-ah hian member 46 (kum 2025 report) an awm mek a, Upa - 2 , Rawngbawltu - 4 an awm mek.