KOHHRAN DIN TURA HMA LAK DAN :

Kum 1989 hian upa V. Zadinga (MRP) te chhungkua chu, Hrangchalkawna awm tanin he khuaah hian UPC a la ding ve lo va, Pu V. Zadinga chuan a vei hle mai a,Pi Saithanchhingi (Pi Saii), kum 78 mi, UPC Kohhran lo ni tawh chu zawng chhuakin, V. Zadinga te chhungkaw member panga (5) nen chuan O.C Quarter-ah inkhawm ve-in bul an han tan ve ta phawt a. Hun rei vak lovah Pu H. Rothangliana, Pu K. Biakchhunga leh Pu Kawlthanga te chhung chuan rawn zawm ve-in hun hman chhoh a ni ta a ni.

Police OC Quarter bulah Police-ho choka chhia chu repair-in inkhawm nan hman thin a ni ta a, Lungpuizawl leh Vety Complex lam atang te-in member hui khawm zel a ni a. Biak in hmun te zawngin Lungpuizawlah a hmun tur te an han lai ve tan a, amaherawhchu, harsatna leh remchan lohna hrang hrang avangin pam tul a ni leh ta a. Lungpuizawl-ah Pu Vanlalpeka in ruakah inkhawmna neih thin a ni leh ta a, hetiang hian Hrangchalkawnah UPC Kohhran din a nih theih nan, harsatna hrang hrang paltlangin Upa V. Zadinga hian hma hruaiin nasa takin kum khat dawn lai chu a lo buaipui ta reng mai.

KOHHRAN DIN A NIH DAN :

Kum 1990 a lo her chhuak a, chutianga theih tawpa Pu V. Zadinga leh sawm khawm ho ten hma an lak hnu chuan, Rev. Saidawla, Headquarter bialtu Pastor hovin, Upa V. Zadinga in luah, Police Quarter-ah chuan Ni 20.01.1990-ah chuan United Pentecostal Church, Hrangchalkawn Local chu din a lo ni ve ta a ni. Kohhran hruaitu hmasaber atan heng mite hi ruat an ni :

BIAK IN NEIH DAN LEH SAK CHHOH ZEL DAN :

Kohhran chu din fel a lo ni ta a, chutih laiin thenkhat ten an han phatsan leh rih bawk a, amaherawhchu, member tha tak tak kum 1992-ah rawn pem lut ve lehin, Upa Pc. Lalthankima te chhung leh Upa F. Lalnghakliana te chhung an rawn lut ve leh a, Bro. Lalbiakliana te chhung rawn pem lut ve lehin, Kohhran pawh a nuam ve sawt khawp mai. Lungpuizawla Pu Vanlalpeka te ina inkhawm thin chu Upa F. Lalnghakliana In, Irrigation Quarter-ah chuan inkhawmna neih thin a ni ta a, Kohhran ding ve ta chu Biak In chu neih ve ngei a lo tul ta si a, Lungpuizawl lama an lo buaipui tawh chu remchan lohna hrang hrang avangin an pam tul ta si a. Upa V. Zadinga chuan a in hmun tura a lei sa chu Biak In hmunah a hlan ta tawp mai a, hlim takin Biak In chu 1993-ah sak a lo ni ve ta a ni. Lungpuizawl Vety Complex lamah Pu Vanlaltlinga te chhung te, Evan CS. Thasiama te chhungte, Upa Sailova te chhung te rawn awm belh ve zelin, member pawh an pung ve zel a, Biak In pawh kum 2005-ah Bawng te talhin ropui taka hawn a lo ni ve ta a ni. Biak in hi Rev. R. Lalrosanga hovin sak a ni a, Theiriat lam unau ten min tawiawm tha hle bawk a ni. Zobawk lam PYD ten Biak In hmun laih lai pawh hian min rawn pui bawk thin.

Hetih hun lai hian Lungpuizawl lamah member eng emaw zat awm ve mahse; Biak In te a hlat deuh avang leh rinna kawnga chak tawk loh avang te-in, Biak In thleng zo lo a tam zawk te an ni ta tlat mai a, Kohhranho ten theih tawp chhuahin Lungpuizawl hmunah ngei Crusade te neih chilh nimahse; awmzia a nei tak tak hlei thei lo a, member kan hlauh ta zauh zauh mai a. Vety Complex a mite nen hma la tlangin 2002 kumah member te humhalh nan pawimawh tur nia ngaiin, Hrangchalkawn atangin Lungpuizawl Local chu a lo in dang ve ta a ni.

Hrangchalkawn local pawh member sawmthum (30) awrh niin an thu leh ta ran mai. Chutih laiin 2003 kumah Tawipui N-II lam atangin Bro. Lalruata te chhung lo pem lut ve lehin, kum 2004-ah Vety Complex (Lungpuizawl) atangin Pu Vanlaltlinga te chhung an rawn lut chho ve leh ta bawk a, member pawh an pung ve leh ta hlek a.

Biak in pawh Assam type-a sak mai a nih avangin a lo chhe ve leh tan reng tawh bawk a, Pulpit lamah 6ft-a extend niin hun eng emaw chen chu luah leh hram hram a ni a, sak that hun tawh hle mahse; a hmun chu a zim deuh avang leh a tlak birh deuh avangin Biak in hmun tur dang zawn reng a ni a. Hun rei tak zawn a nih hnuin, Hrangchalkawn hmun laili tak, kawng chhak lam chu Upa PC. Lalthankima chuan lei turin a be fel ta a. Revenue te lo kalin pawh fel kan han tum a, amaherawhchu kan lei tum lai tak chu Pu Zokaia, Aizawl lam mi ram a lo ni a, a chhak lama insawn chho hretin a ram neitu te nen, kan lei tur area te teh felin, a man hi Upa Pc. Lalthankima hian Rs. 2,00,000/-, ama pawisa pe-in Biak in hmun chu Biak in hmun hlui chu Biak in hmun leitu Pu Pc. Lalthankima kutah kan hlan ve leh thung ta a ni.

Biak in hmun thar tur teh fel ni hi Ni 14.11.2012 a ni a, Ni 26.11.2012-ah member 21 zet hnatlang chhuakin sam fai tan a ni a. Ni 27.11.2012 hian a panna tur kawng JCB darkar nga (5) lai ruaiin laihtir a ni. A sakna hmun tur chu ni hnih (2) laih chhunzawmtir leh nghalin, a hmun pawh laih zawh a lo ni ta a ni. Ngawrh taka hnatlang neih chhunzawm zelin Biak in sakna tur hmanrua thiar luh a ni a, kawng atangin head load-a thiar ngai vek a nih avangin,kan hah ve thei hle a ni. Ni 13.08.2013 (Tuesday) ah ban khur laih tan a lo ni ta a, hemi ni hian Rev. C. Vanlalena, District Secretary-in hunserh te hmangin, Rev T. Aichhunga, Theiriat bialtu Pastor ten min tawiawm bawk a. Theiriat local atangin Upa Zakiana, Sis. Nunmawii, Sis. Lalhriatpuii leh Evan. C. Remruatkima ten min hnatlanpui bawk a ni.

Biak in sak chhung zawnga Theiriat bial chhung Local hrang hrang min puitute chungah kan lawm hle. Biak in hlui zawk hi a sawp rawp tawh em avangin luah hlan kan nghakhlel hle a, sum neihin a tlin si lo a, Apex Bank-ah Rs. 3,00,000/- puk a ni a, Upa Pc. Lalthankima hian eng emaw zat, a mimal pawisa a seng reng bawk a, District lam atangin a chung tur Rs. 42,580/- (Singli Sanghnih Zanga Sawmriat) lai mai Ni 24.02.2014-ah kan dawng a, Upa Pc. Lalthankima hian rawng hnawih nan Rs. 35,00,000/- (Sing ThumSang Nga) leh a chung tur Steel Structure atan 1,60,000/- (Nuai Khat leh Sing Ruk), a mimal sum a hmang leh a, Biak in sak nan hian a mimal sum sen ral zat hi hriat vek sen a ni lo. Chhung tin te pawhin theih tawp tak meuhin tan kan la vek a, theih tawpa kan han tan sauh sauh hnu chuan Ni 21.09.2014-ah Biak in chu luah luh tan a lo ni ve ta a. Biak in hi luah lut mah ila, hawnna programme hun hman a la nih loh avangin, ruai nena hawn ngei kan duh ve si, loan rulh ngai bawk si, sum khawl ngah a harsa khawp mai a, Ni 10.10.2016 (Monday) 11:00 am-ah Biak in chu hawn a lo ni ve ta a ni. Hawngtu Rev. C. Vanlalena, District Treasurer niin Biak in chhung inkhawmah Chairman atan Rev. VL. Hmuaka, Theiriat bialtu Pastor a ni a, tlai lamah ruai theh nghal a ni.

Biak in hawn ni hi Monday a nihna chhan chu Section Mission Conference, Dt.07.10.2016 – Dt. 09.10.2016-ah Hrangchalkawn Local-ah hian neih a nih avangin, Monday hian Biak in hawnna hi hman nghal a ni ta a ni. Biak in hawn ni hian District Choir leh mimal solo, report hrang hrang ngaih thlak a ni a, Financial report petu Upa Pc. Lalthankima hnen atangin Biak in sak nan hian Rs. 12,00,000/- (Nuai Sawmpahnih) vel hman a nih thu report ngaihthlak a ni.

Tun dinhmun :

Hrangchalkawn Local-ah hian tunah member 65 (kum 2025 report) ah an awm mek a. Upa - 3, Rawngbawltu - 5 an awm mek.

Kum 2025-2026 chhunga Local hruaitute chu :