Darzo khua :

Darzo khua hi khaw upa leh hlun tak a ni. Hnahthial atangin khaw chhak lam 40 Km-a hlaa awm a ni a, Darzo khuaah hian In 250 chuang awm mekin mihring 1300 vel an awm a ni.

UPC kohhran lo din tura hmalak tawh dan :

Lunglei District chhunga khaw lian leh pawimawh tak pakhat a nih avangin, Kohhran a din ve ngei theih nan, Lunglei District Kohhranpuiin a hmuna awm chilha rawngbawl turin, Evan. J. Thanhmunga, S. Mualcheng a lo dah tawh thin a. Tin, a hnu fe-ah Rev. Saithanga Sailo te, Evan. C. Vanlalena te, C. Vanlalzamveli te, C. Vanlalrawni te, Evan. C. Lalnunmawia ten theih tawp chhuahin rawngbawlna an lo nei tawh thin.

Kum 2008-ah Evan. R. Lalmawia Hnahthial chu an Department (Forest Dept.) lam hna, Hall sain a awm reng a, ani chuan a vei em em a, chhun lama hnathawk pahin zan lamah mi inah lengin a kawm a, a ti tipui thin. Ani rawngbawlna atang hian mi rilru a hneh nual hman a. Ni 11.2.2008-ah, chutih laia District Treasurer, Rev. R. Lalrosanga leh Hnahthial Bialtu Pastor C. Lalhriatpuia te chu Crusade nei turin an rawn lut ve leh a, Evan. R. Lalmawia’n theih tawpin a tawiawm bawk. Anni rawngbawlna chhanah chuan Kohhran chu Adhoc-in din a lo ni ta a. Chumia hruaitu atana ruat te chu :

(Adhoc a din leh hruaitu ruatte hi thui an kal lova, Kohhran puitling ban phak lovin an zuih leh ta rih a ni)

Kohhran a ding ta :

Ni 2.5.2008 chuan Rev. Ralkapkunga Khiangte, District Secretary thar chu Speaker-a hmangin, Crusade neih leh a ni a, mi 12 laiin an tawiawm a ni. Chumi hnuah Ni 7.6.2008-ah Rev. C. Lalhriatpuia, District Treasurer thar leh Hnahthial Bialtu Pastor thar, Rev. PC. Nghakliana te Crusade-in an lut leh a, Evan. R. Lalmawia leh mi thenkhatin an tawiawm bawk. Hmangaih taka rawngbawlna an neihna atang chuan Kohhran chu a lo ding ta a ni. Kohhran puitling ni turin Ni 8 June, 2008-ah Rev. PC. Nghakliana chuan a form ta a ni. Chuta hruaitu te chu :

Biak in hmun thu :

Kohhran te a lo din takah chuan Biak in hmun tur zawn nghal a ni a. Tichuan Pu Rohmingliana in hmun hlui chu, leiah dil a ni a, inbiak rem hnuah Rs. 14,000/- in leisak a ni ta a ni. Biak in hmun leina hi Forest R.O Upa PC. Lalthankima’n a tumsak a, a chungah Kohhranhote an lawm hle a ni.

Biak in hmun an lo neih takah chuan, Rev. Ralkapkunga Khiangte, District Secretary hovin mi eng emaw zat Lunglei lam atangin Biak in hmun buatsaih turin an chhova, Hnahthial lam atangin eng emaw zat chho bawkin Biak in hmun chu an han lai ta a, anmahni chhanah Kohhranhote pawh an phur hle a ni.

Biak in din chhoh dan :

Biak in 1-na :

District-in a phalsak angin an Biak in sakna tur hian khawpui chhung hmun hrang hrangah thawhlawm khawn a ni. Heng thawhlawm khawn hi Hnahthial bial hruaitute leh Evan. C. Lalnunmawia ten an buaipui a ni. An Biak in chung hi District Kohhranpuiin a tumsak a, a bang tur hi LDF Cable neitu, Pu Lalduhthlanga’n a tumsak bakah PA Set tha deuh mai a leisak bawk. Kohhranhote an lawm tak zet a ni. Pathian hruaina hnuaiah Biak in pawh Assam type-in tha takin an sa zo ve ta a ni.

Biak in 2-na :

Tuna an Biak in luah lai mek hi Ni 17 December 2016 khan Bialtu Pastor Jerry Lalmuanawma chuan a lungphum phumin, sak tan nghal a ni a. District atangin sak tanpuina Rs. 1,50,000 an dawng bawk a ni. Kohhranhote an hah hle a. Chumi hnuin District Board pawhin tum hnih Rs. 50,000/- ve ve-a tanpuiin tun hun hi an thleng ta a ni.

Kohhrana thilthleng chhinchhiah tlak langsar zual te :

Kum 2010-ah Pu CL. Neihkhuma inah Pu Biakmawia hova kan zaikhawm tumin, Thlarau boruak a tla thain, Thlarau thuamna nasa tak kan chang a, Zan Dar 6:00 pm atanga thlarau lam hlaa kan zai chu, Zan Dar 10:00 pm-ah kan tawp thei chauh a ni.

Kum 2014-ah Upa R. Ramhluna te ina zaikhawmna an neih tumah, thlarau lam ruai puar taka kil a ni a, hemi hunah hian Upa leh rawngbawltu zawng zawng ten, thlarau lam hmingthar an nei vek a ni.

Ni 8 June, 2018-ah Kohhran din cham kum 10-na (Tenth anniversary) hlim taka lawm a ni.

Tun dinhmun:

Report siam lai (2025) hian member 62 an ni.