Runtung khua chu :

Runtung khua hi Lunglei chhim thlang lam hreta awm, Hauruang atanga 8.5 Km vela hlaa awm a ni. Tun thleng hian Thingtlang khaw nuam tak, ngaw nei tha, Thing leh mau hmun tha tak tak awmna a ni. Runtung khaw hming put chhan hi hetiang hian an sawi thin. Runtung khawtlak lamah hian Pialtlep zaupui mai a awm a, chutah chuan Rul-fep nei, lian pui mai a awm thin a, chu Rulpui chu Pialtlepah chuan a intung ruah thin a, chu lai hmun chu ‘Rultung’ an ti thin a, hun a lo kal zel a, ‘Runtung’ an lo ti ta niin an sawi.

UPC lo din dan :

Kum 1957 March thlaah Hmar lam Tirhkoh, Lalthianghlima chu Lunglei lamah rawngbawlin a rawn zin a, hei hi a vawi hnih lo kalna a ni. Chanmari tlak lam, Tarmita khawthlir atang chuan Runtung lam chu a hawi a, Lalpa aw, ‘Runtung Kohhran tlu tawh tung ding leh seng khawm turin kal rawh’ tih thu a dawng ta a. Theiriat khua Pu Rohnuna te nupa a sawm a, Thangpuiah riak thlain, Pu Aithanga te nupain an lo tawiawm ve leh a, Thangte khua Pu Mangkhuma’n a zui bawk. Thangte atangin Runtung lamah chuan an kal ta a ni. Pu Lalthianghlima chu Runtunga UPC awm chhun, Baptist lama lawi mek, Pu Pachhunga inah a thleng a, Kohhran dang awm ta rih lo chu, Baptist Kohhranah rawngbawlna a nei ta zel a ni. A thiante hovin an haw zawhsan hnuah, theihtawp chhuahin a bei zel a, tichuan Pu Lalthianghlima rawngbawlna duhtu leh duh lotute an lo awm chho va, a rawngbawlna eitute chuan June ni 20, 1957-ah chuan Runtungah UPC chu an lo din ta a ni. A tir berah chuan member 10 emaw chauh an ni.

Kohran member hmasate :

Kohhran Upa hmasa ber chu JH. Pachhunga (L) a ni. Member hmasate chu : Laihnuni, Chuhveli, Darchuailovi, Zaiawni, Lianngengi, Lianvenga, Aimawii, ZD. Lalzuala, Hmingthanga leh Hmunthanga te an ni. Kum 1958-ah Hruaitu inruat tharna neih a ni a, chuta kohhran upa, hruaitu hmasate chu, Pachhunga, Lianvenga leh Hmingthangate an ni.

Biak in:

Kum 1959-ah Biak in hmasa ber Maurap Inin din a ni a, chuta tang chuan Kohhran phuisui tak a lo ni chho ta nghe nghe a ni. Hruai khawm hmain Biak in hi Maurapin vawi 2 an sa hman a ni. Kum 1968-ah Mizoram rambuai avangin, Hauruangah hruai khawm an ni a, heta tang hian khua a lo ram a, Runtunga UPC Kohhran pawh a lo tawp lailawk ta rih a ni.

Mahni khaw lama kir leh theihna an hmuh takah chuan, kum 1974-ah Hauruang atangin, Runtung khaw hlui lamah chuan, eng emaw zat an kir leh ta a, Kohhran pawh a pangngaiin a ding chho leh ta a ni.Tichuan Biak in pawh kum 1974-ah chuan Maurap bawkin sak leh a ni. Hun a lo kal zel a, a ruhrel thing zai veka sain, a bang Tile, a chung Rangva leh a Skirting pawh Brick-in an lo sa chho ve leh ta a, chu chu hun rei tak a ding nghe nghe a ni.

Hun lo kal zelah Biak in hmasa a lo hlui leh ta a, thalai ten Biak in mawi leh changkang zawk an lo beisei bawk nen, theih ang tawkin an intuak chho ve leh ta a, member-te thahnemngaihna leh inpekna avangin 2023-ah chuan Biak in chu RCC-a sain, a chung an chih chho veleh ta a, rei lo te-ah Biak in mawi leh tha deuh an sa peih mai dawn e. Tuna an Biak in sa mek hi, Runtunga UPC a din tirh atangin an Biak in vawi 6 sakna a ni ta a ni.

Rambuai chhovah khan, ruai but taka khua chhuahsan an nih avangin, document vawn that leh chhui zui tur awm lo va, chuvangin, khaw bu luah leh hnu atang chauhin chiangkuanga chhui zui tur a awm ta chauh a ni.

Kum 1974-a kohhran hruaitute :

Department hrang hrang chanchin :

• Sunday School : Sunday School hi kum 1979 January thlaah din a ni a, vawiin thlengin tluang takin Sunday school chu an kai chhunzawm ta zel a ni.
• Mission Department : Mission Department hi, January ni 20, 1985-ah din tan a niin, hruaitu turte form nghal a ni.
• LAD : LAD hi kum 1974 atangin form tan a ni.
• PYD : PYD hi kum 1990 atangin hruaitu turte ruat tan niin, hruaitute pawh hemi kum atang hian ruat tan nghal a ni.
• PCD : PCD hi a ding tlai deuh ber a, August, 1997 atangin hruaitu form tan a ni.

Tun dinhmun :

Kum 2025-2026 a Kohhran hruaitu ni mekte :