Kum 2025 February - December chhunga Lungsen Bial Mission Department-in, Home Missionary-a thawk tura a lak Rbt. C. Lalhriatzuala, Zion Local, Venghlun, Lunglei thawhna tur atan Chhumkhum Area tiin Chhumkhum, Phairuangkai leh Rotlang West te bial tura siamsak a ni a. Rotlang West hi In 150 bawr vel niin UPC Kohhran la din ngai lohna hmun a ni.

Ni 6 April 2025 (Sun)-ah, a vawi khatna atan Home Missionary Rbt. C. Lalhriatzuala ruahmannain, Phairuangkai Local te leh Chhumkhum Local te nena tangkawpin, Mual inkhawm neih a ni a. Chhun leh Zan hun hman niin Home Missionary Rbt. C. Lalhriatzuala hnen atangin Pathian pakhat/Isua Pathianna thu leh Chhandamna Thuthlung puan chhuah a ni. Innghahna tur leh han belh mai tur awm lohna hmun a nih avangin, haw chhuahsan leh lailawk a ni a.

Ni 11 April 2025 (Fri)-ah Home Missionary Rbt. C. Lalhriatzuala chuan, luh chilh lehin innghahna tur, thlen in tur atan Phone kal tlangin a la hriat ngai loh leh hmuh ngai hauh loh mi hnen atang a, Phone number leh hming a hriat chu biain an ina thlen te dilin an inbiak rem hnuah, Chhumkhum Local Chairman Upa Zodingliana nen, mahni ei in tur buhfai leh chawhmeh intuma thawk chhuakin an riah chilh ta a.

Tichuan, a rem dan ang anga mite kawmin Pathian thu te sawiin khawlaiah te, mi inah te, Lalpa Thuthlung vahvaihpuiin theihtawp chhuaha an beihna chuan mi thinlungah hna a thawk zel a. Ni 13 April 2025 (Sun) Chawhnuah, Rotlang West-a UPC Member hmasa ber ni turin, Rbt. C. Lalriatzuala thlen in, Sis. Nundami te nufa 4, (Sis. Nundami, Rosy Lalhruaitluangi, Irin Laltlansangi leh Alex Remlalpuia) te chu BBC Kohhran atangin Lal Isua hmingin lawm luh an lo ni ta a ni. Lawm luhna inkhawmah hian Lungsen Bial Pastor, Pc.Zion Rammawia chuan Member tharte lawm luhna a nei a, Rbt. C. Lalhriatzuala, Missionary chuan Pathian thuchah a sawi. He inkhawm hi Lungsen Bial Mission Department O.B te leh Phairuangkai Local ten an hmanpui a ni.

Lawm luhna inkhawm neih hma hian, lawm luh tura inpe mi 14 lai awm zingah, mi tam zawkin eng emaw avanga huaisen zo lovin phatsan mahse; Sis. Nundami te nufa 4 chuan huaisen takin Lalpa Thuthlung chu vuan turin thuthlukna an siam a, an fakawm tak zet a ni. Tichuan, lawm luhna inkhawm zawh lamah Pathian thu te sawia inkawm hona te neih zawm nghal niin, he inkawm hona kaltlang hian Lalpan Member 5, Believers Church atangin min pek belh leh ta a. Pastor Pc. Zion Rammawia’n anmahni inah ngei lawm luhna neiin, chumi hnuah Phairuangkai Luiah, Lungsen Bial Pastor Pc. Zion Rammawia chuan member 5, Lal Isua hmingin sual ngaihdamna Baptisma chantirin rawngbawlna a nei nghal a ni. Dodalna leh harsatna tam tak karah Lalpan ram neih a thulh chuang lo va. Ni 17 April 2025 (Thu) khan Rbt. C. Lalhriatzuala, Home Missionary chuan Member 2 Lal Isua hmingin a lawm lut leh bawk.

Tichuan, hun eng emaw chen chu member tlem te niin, khawhar takin mi hmuhsit leh diriam te,nuihsan leh deusawhna karah, rinawm takin Lalpa leh Kohhran tan an lo ding ve hram hram thin a. Chu an rinawmna chuan rah tha chhuahin mite thinlung pawh a hneh viau mai. Amaherawhchu, khawtlangah eng eng emaw harsatna leh buaina neuh neuh kan neih ve avangin, ram beih chhunzawm hlei thei lova kan awm ren rawn hnuin, Ni 17-23 November 2025 chhungin Bial Mission Department hmalakna leh, District Revival Committee te remtihnain, Rbt. C. Lalhriatzuala, Home Missionary hovin Maranatha Revival Team ten Rammut Crusade neiin Mual inkhawm te neih thin a ni a. An rawngbawlna Lalpan mal a sawm a, member thar eng emaw zat min pek belh leh ta a.

Tichuan, Indona leh member inchuhna karah, Lalpan a ram tun din zel a duh a. Home Missionary-in thut chilh zelin theih tawpin ram beih hna a thawk chhunzawm zel a, Lalpan member thar min pek belh zel bawk a. Ni 30 November 2025 (Sun) khan Lunglei District Headquarters atanga remtihna kan hmuh angin, Lungsen Bial Pastor, Pc. Zion Rammawia chuan Members 33 niin UNITED PENTECOSTAL CHURCH, Rotlang West chu Preaching point ni turin a Form ta a ni.

Hetiang hian Kohhran hruaitu tur Form nghal a ni.

Home Missionary Rbt. C. Lalhriatzuala chuan mi in sak lai la luah luh loh chu awmna atana hmangin, chu Inah chuan inkhawmna neih thin a ni a, hun remchang apiangah Pathian thu-a mite kawmin hun hman thin a ni. Lalpan member thar pawh min pe zel a. Ni 7.12.25 (Sun) khan member thar lawm luhna leh Nau hlan rawngbawlna te, Baptisma rawngbawlna te neih leh niin, tunah hian Rotlang West-ah UPC Member 41 kan awm mek a ni.