Hnahthial Bial Chanchin

Hnahthial Khua

Hnahthial khua hi Lunglei chhak lam, Tuichangral thlang lam tlangdung a awm a ni. NH-54 (Lunglei to Aizawl) kawngpui dunga awm, Lungleia atanga 68KM-a hlaah a awm a ni. District Capital niin, In 1500 chuang leh mihring pawh 7500 chuang an awm a ni. Lehkha thiam tamna niin, lehkhathiam rate pawh 97.24% a ni.

Hnahthial bial

Hnahthial bial hi May 1966-ah District Board-in siamin, bialtu hmasa ber atan Rev. Ralianga chu a ruat a ni. Chutih lai chuan, ‘Hnahthial bial’ ti lovin, ‘Tarpho bial’ tiin sawi a ni thin. Tarpho hi UPC dinna hmasa leh a bialtu, Rev. Ralianga awmna khua a nih vangte pawh a ni awm e.

Bial huam chin hmasa

Hetih lai hian, a bial thenin a huam chin chu, khaw chhak lamah, Cherhlun leh Thingsai te khi a huam vek a, Hmar lamah Bungtlang (Pangzawl bial) a huam a, Chhim lamah chuan Leite, S. Vanlaiphai leh Muallianpui thlengin a huam a ni.

Hnahthial bial hming put chhan

Tichuan, Mizoram buaiin a nghawng, sâwi khâwmah Tarpho leh a chheh vel khuate chu Hnahthialah sâwi khâwm an nih tak avangin, Tarpho bial tih thin chu, sâwi khâwm avang chuan, ‘Hnahthial bial’ tih a lo ni ta a ni.

Pastor Quarters chungchang

Hnahthial Section hi Hnahthial bial tiin, 1971 atanga inenkawl tan chhovin Section Conference pawh neih tan a ni a, bialtu Pastor hmasa ber Rev. Ralianga chu Pastor a ni chhunzawm zel a ni. Rev. Ralianga’n a pastor chhung hian pastor quarters hran nei lovin, ama chenna In atangin a enkawl mai niin a lang. Kum 1979-ah tuna pastor quarters hmun Peniel veng, NH-54 kawng an hi VC hnenah dil a ni a, VC atang pawhin an lo pe fel nghal mai a ni.

Pastor quarters sa tur hian hmalak chhunzawm nghal a ni. Bial chhung Local hrang hranga mawhphurhnate inpein hma la chhunzawm mahse; chuti mai chuan an sa peih mai thei lova, kum 1980-ah te pawh, zawi zawia chhunzawm chhovin 1981-ah, luah theiha peih niin, Rev. C. Darnghaka te chhung chuan quarters hmasa ber hi an luah tan a ni. Pastor quarters hmasa ber hi Maurap In la niin a chung pawh Di a la ni nghe nghe a ni.

March ni 22, 1986 Section Conference Rorel No. 1-naah, ‘Pastor Quarters hi Tarpho veng chhungah sawn ni se, Tarpho (H) Local church Board-in a hmun tur lo zawng se’ a ti a. Tarpho (H) Local Church Board-in a hmun tur an hmuh mai loh avangin, Section Board kutah an dah let leh a. Section Board chuan ‘a hmun ngaia sak mai ni se,’ tiin a rel leh ta a ni. March ni 28, 1987 Section Conference chuan ‘Quarters hi a chhiat tawh deuh avangin sa tha turin target te siam ni se, Section Board-ah bawhzui ni se’ a ti a. Kum 1988 Conference-in bawhzui lehin target te siam belh leh a ni a, hemi kumah hian Assam Type-in sak a ni leh ta a, hetih hun laia bialtu Pastor hi Rev Lalchhara a ni.

Hun a lo kal zel a, February ni 22, 1992 Section Conference chuan Pastor Quarters extend ni se tiin, a hma lam leh a sirah te extend a ni a. Kum 1993 Conference-ah bawhzui lehin, a hnuaiah Committee Room te siamin a theih ang anga thuam zui zel a ni.

Kum 2000 february ni 5 Section Conference Rorel No. 7-na chuan Pastor Quarters hi sak that ni se, a structure pawh Concrete/RCC ni se tiin target te siam nghalin bawhzui a ni a, kum 2001-2002-ah te Quarters sakna tur tuak chho zelin, September ni 29, 2003 Thawhtanni zing karah hnatlang hmasa ber, Rod chhut ngil hnatlang neih tan a ni ta a, hetih laia bialtu Pastor C. Vanlalena kaihhruaina hnuaiah 36 x 21 Semi Pucca-a sak a ni ta a, Pastor Quarters tha leh mawi hnai tak neih chhoh a ni ta a, tun thlenga kan luah lai hi a ni ta a ni.

Pastor Quarters hnuai Committee Room te leh a Building thuam zui thu-ah, bial hmalaknain chhunzawm chhoh zel a ni ta a ni. Kohhran hmasawnna leh thanlenna kal zelah Pastor Quarters pawh Major repair tula hriain, District Board-ah dilna thlen a ni a, Ni 12-14 December 2022 District Board chuan Hnahthial bial Pastor Quarters repair nan Rs. 8,00,000 (nuai riat) min pe ta hlauh mai a, chumi hmang chuan a chhuat slab, a chung Rain-gutter chhun te leh a bang RCC-a rem te leh a remchan dan ang anga a tha thei ang bera repair hnathawkin, tun dinhmun hi thlengin Quarters tha tak kan nei ta a ni.

Hnahthial bial atanga bial dang piang tate

Hun a lo kal zel a, Kohhranin hma a sawn nasa em em a, member te pawh a lo pung zel bawk si a, tichuan hetiang hian bial dang chu a lo piang ta a ni :

Thingsai bial : District Conference vawi 11-na, Rorel No. 4-na chuan Hnahthial bial chu thenin, Thingsai bial hawn chu a ti tluin, kum 1976 March thlaah Thingsai bial chu a in dang a. Mahse, kum 1983-ah Cherhlun bialah a awm tak zawk avangin, Cherhlun atangin kum 1999-ah Thingsai bial chu a in dang tha leh a ni.

Cherhlun bial : Kum 1983 atangin, Thingsai Pastor Quarters chu Cherhlunah sawnin, Cherhlun bial tih a lo ni ta a ni.

Pangzawl bial : Kum 1985 District Conference chuan, Hnahthial bial thenin, Pangzawl bial chu a lo piang leh ta a ni.

S. Vanlaiphai bial : District Conference vawi 50-na, March 2015 Rorel No. 11-na chuan, ‘S. Vanlaiphai Centre-a hmangin, Tuipuiralah bial thar hawn ni se,’ a tih angin kum 2015-ah S. Vanlaiphai bial chu Hnahthial bial atangin a in dang leh ta a ni.

Hnahthial biala Pastor lo awm tawhte leh an awm hun chhung

Bial Secretary/Treasurer lo chelh kawp tawhte

Bial Secretary a hrang ani tawh leh nimek te

Treasurer a hrang a lo nitawh leh nimek te