UPC THILTLANG LOCAL

Thu hmahruai:

Thiltlang khua hi Hnahthial leh Pangzawl inkar, kawngpui dunga awm, in zahnih sawmnga (250) vel an ni. Tun hmaa Lungrang harhna an tih thin kha, he khaw bul tlanga an awm lai a ni a. Baptist Kohhran an tam ber a ni. Isua Krista Kohhran (IKK) an awm bawk. Tun hmain he khuaah hian UPC a la ding ngai lo va, Kohhranho ten UPC la din lohnaah hian Kohhran din veinaa kal zelah, he khua pawh hi thlan tel a ni. Kohhran bial thenah Hnahthial biala awm a ni. Tunah hian he khuaah hian Kohhran Member 7 lai an awm a ni.

KOHHRAN DIN TURA HMALAK A NIH DAN:

District Board vawi 97-na rorel No-21-na chuan Crusade neihna tur khaw pariat zingah a telh a, chutih laia Hnahthial bialtu, Rev. C. Darkhuma, Pangzawl bialtu Rev. Rochhunga Sailo leh Evan Hrangmawia, Rahsiveng, Lunglei te chu an ruat a, Hnahthial leh Pangzawl atangin Kohhranhote, a thei apiangin tawiawm tura beisei an ni. He rawngbawlna atan hian Rs. 1,000/- ruahman a ni.

Ni 28 January 1993 (Nilaini) zan atangin Crusade chu tan a ni a, zaikhawm nan IKK puithiam, Lalhluna te in an hmang a. Ni 31 January 1993 (Pathianni) te chuan chhimtu an tam viau nain, UPC-a lut duh an la hmu lo. Ni 1 February 1993 (Thawhtanni) chuan Pangzawl lam chu haw turin motor-ah an chuang a. Hetih lai hian Pu Lalhluna inah zaikhawm a ni a. Dar 10:30 am a ri tawh si. Pu Chhunruma, Pangzawl Khuanghlum chuan, “Khawi nge, ka’n tawngtai teh ang,” a ti a, a tawngtai a, “Lalpa, Thiltlang-a Crusade-a ka kal dawn a, i hnena ka tawngtai khan member hmu lo chuan i haw lo vang min ti a, tunah hian member hmu lovin kan la awm si a, ka mang a va ang em! Ka hnena thu sawitu Pathian kha, nangmah ngei hi i niin ka hre si a, nagmah hi i ni lo em ni?” tiin a tap zawih zawih a.

A Amen hnuah hla pakhat sak a ni leh a, chutah Pu Lalhluna a lo ding chhuak a, “Ka inthup thei tawh lo, kei leh ka chhungte chu UPC-ah kan inpe e,” tiin a rawn inpuang ta a. An thenawmah Rev. C. Darkhuma te chuan member inpete chu an han chhiar a, in 6, member 29 an ni ta a ni. Hnahthial lam chu Rev. C. Darkhuma hovin an la cham ta a, member inpete chu Rev. C. Darkhuma chuan UPC-NEI-ah a lawm lut ta a ni. Ni 2 March 1993 hnuah an hawsan ve rih a. Bialtu Pastor Rev. C. Darkhuma chuan Ni 7 March 1993 (Pathianni)-ah Kohhran a form nghal a, hruaitu hmasate chu hengte hi an ni :

BIAK IN SAK A NIH DAN:

Pangzawl atangin Pu Lianzuala te chhungkhua an pem phei a, an chhungkua te chauh chuan an UPC ve tawp a, Pu Lianzuala nupui chuan, “ina inkhawm aiah tiin kan pa-in thingtuai a pu a, Biak In chu kan sa ta a,” tiin. Khaw chhunga mi ang vak lo Zotawna’n a pui thin a, an phur ve thei em em mai a ni. Chutianga, thawk reng ta chu khawtlang mi thenkhat tlawm ngai ten, a chung chih tur di te an sah pui a, an chih a, a bang te pingin, an sak zawh chuan inkhawm nan Pathianni apiangin an chhungkua te chuan an va in khawm ve thin a ni.

Missions Field atan hman a ni :

Thiltlang Local hi, Local member tlem tê niin, Lunglei District Missions Department Conference vawi 41-na (Ni 4-6.12.2015) chuan Ni 1 January 2016, atangin Home Missions Field-ah a hawng ta ni.