UPC Office Press

Bul Tan Dan Lunglei District-in Printing Press kan neih theihna tura hnarkaitu leh hma la nasa bertu chu Evan. Lalthanzauva (Tuna Mizoram Assembly Speaker Pu. Lalbiakzama pa hi) hi a ni kan ti thei ang. Kum 2002 December thla a amah Evan. Lalthanzauva sawi dan chuan: “Khatia Dt. 22.5.1966-a District anga thalai pawl a lo dina, President atana min han ruat khan, ka rilru a lian ber chu Printing Press neih kha a ni a. Remchang apiangah ka sawi a, sum leh pai harsat em em laia khatiang thil lian tham nei tura ka sawi thin leh hma kan la kha, tam tak chuan an ngaithei lovin, min nuih deuh tute pawh kha ka tawng nual mai. Chawlhni vawikhat chu a bul tan nan tiin, Rahsiveng a kan inkhawmnaah khan thawhlawm ka khawn ta a, tah chuan Rs. 32 chiah ka hmu a ni. Mahse, beidawng mai lovin theihtawp ka chhuah ve zel a. Hemi atan hian Aizawl lama kan hotute hnenah tum thum ngawt kut ka va dawh a, tichuan Rs 2000/- lai kan ngah chho ve ta a ni,” a ti. Kohhran Leh PYD Hmalakna Kohhran a lo din chhoh khan, member-te leh hruaitute thinlungah Printing Press neih duhna kha a lian hle mai a. A bik takin thalaite ah a lian zual ni te pawhin a lang. District PYD Conference hmasa ber Dt 17 - 21.10.1968 a Thehlep hmuna neihah pawh Agenda hmasa berah neiin, ‘Printing Press nei tura a theih anga hmalak nise’ tih a ni. Tichuan, Printing Press nei tur chuan theihtawp chhuah chhoh zel a ni a. 1968 atanga 1972 thleng hian District PYD Conference Agenda-ah neih chhoh zel niin, kumtin a tuak chho ta zel a ni. Tichuan Kohhranpui District Conference vawi 8-na Dt. 22 - 25.2.1973 rorel palinaah chuan ti hian kan hmu: “Printing Press lei thu : Hei hi hun rei tak chhunga kan lo er tawh kha a ni a. Tunah hian PYD South Mizoram UPC in lei an tum mek a. Tunah Fund Rs 4000.00 vel a tling tawh a. Chu chu chhunzawmin Printing Press chu lei ngei nise tih Evan. Hrangmawian a rawt a, Rev. Ralliangan a pui a, hnial kan awm lova rem kan ti tlang.” tiin. Khawl Hmasate Lei Hmun Leh Hun Tichuan kum 1973 July/August thlaah Printing Press chu Guwahati-ah chah a ni ta a. A kum leh 1974 February thla ah a lo thleng ta a ni. He Printing Press hi a lian pangngai a ni a. Hemi khawl chauh hi hun rei tak hman a ni. Tichuan, hun a lo kal leh a, hna tenau zawk thawhna tur khawl te deuh zawk mamawhna a lo awm tak avangin, Press Board vawi 13-na Dt. 21.1.1984 rorel No. 2-na chuan Khawl te zawk lei nise tiin a rel a. Amaherawhchu, lei nghal mai theih a nih loh avangin kum 1987 tawp lamah lei theih chauh a ni ta a ni. Heng kan Printing Press-te hi engzat chiahin nge kan lei tih erawh kan hre mai ta lo a ni. Offset Printer Leh Khawl Tharte Tichuan, heng khawl pahnih hmang hian kum tam tak UPC Press chu kalpui a lo ni ta a. Amaherawhchu, khawvel hmasawnna leh changkanna ang zelin Printing Press aia awlsam, changkang leh tha zawk Offset-Printer alo chhuak leh ta a. • 2004 October: Offset khawl thar ‘ROTAPRINT’ chu cheng nuai 6 singnga chuangin lei a ni ta a ni. Khawl thar ngang a ni a, a hman thuah pawh eng emaw chen chu harsatna kan tawk deuh a, mahse hma kan sawn zel a kan hmang tangkai chho ta hle a ni. Kum 6/7 a lo vei chuan khawl pawhin hlui lam a lo pan leh ta a. • 2010 November: Khawl thar dang AUTO-PRINT chu cheng nuai 5 chuangin lei leh a ni a. • A hnuah: Khawl lian zawk leh paper hlai zawk print theihna SAHIL -125 chu cheng nuai 10 in lei a ni leh ta a, heng khawl pahnih te hi vawiin thlenga kan hnathawhna ber an ni ta a ni. Cutting Machine Leh Khawl Dangte Printing Press atan a pawimawh ber pakhat chu Cutting Machine hi a ni. Paper cut zung zungna a awmloh chuan hnathawh a harsa em em a ni. Tichuan Cutting Machine nei tur pawh hian District PYD bawkin hma la leh in, kum 1980 atangin target ah an nei a. Kum 1983 alo her chhuah chuan Rs. 6028 lai an lo ngah ta a. Kum 1993 District LAD Conference ah hemi pual hi khawn ni bawkin Rs. 3000/- hmuh a ni bawk a. Heng zawng zawng belhkhawm hian General Secretary Rev. H. Vankunga leh District Pastor Rev. HL. Ruata ten hma la nghal in Kolkatta lamah an chah ta a. Dt. 30.6.1983 chuan Guwahati atangin an lo thawn ta a. Dt 20.7.1983 ah Lunglei lo thlengin Dt. 25.7.1983 ah hlanna neih a ni ta a ni. He Cutting Machine hi kum 40 lai tangkai taka hman a ni a. Amaherawh chu a angle thuah te duhthusam lohna a awm tak avangin a thar lei tura hmalak leh a ni a. A hmaa kan neih aia tha leh changkang zawk chu kum 2022 ah Cheng Nuaili sengin lei leh a lo ni ta a ni. Heng mai bakah hian kum eng emaw zat kan it leh duh em em Perfect Binding Machine (Lehkhabu kawm vuahna) chu kum 2024 ah Cheng Nuai 12 (Completed) sengin lei a ni leh ta a, kan phuisui phah ta hle a ni. Heng kan han sawi bakah hian mamawh chi hrang hrang Xerox khawl te, Computer set te, Printer chi hrang hrangte lei a ni bawk a ni. Tun Dinhmun (Staff) Tun dinhmunah hian thawktu panga (5) Full Time-3 leh MR-2 an awm mek a ni.