VAISAM KHUA :

Vaisam khua hi Lunglei chhim thlang lam, Lunglei atanga Kilometer 27 bawr vela awm a ni. Lunglei, Luangmual atanga kalin Chithar khua a paltlang a, mihring chenna In leh School, Biak In leh Office chhiar vekin, a vaiin In sawmriat leh paruk (86) a awm a, mihring cheng mek hi zathum sawmli leh pathum (343) an awm tih, 2019 Census Record bu chuan a tarlang a ni. Vaisam khua hi tun hma chuan, ramhuai pawngtalna khua ti hialin an sawi thin. Amaherawhchu, tunah chuan Kristianna-in kan rama ramhuai a um bo an lo tih thin kha, a taka hmutu niin khaw nuam leh lungrual tak, thlarau mite tualchaina leh zalenna khua a lo ni ta a ni.

THAWKTU HMASATE :

Vaisam khuaa Kohhran din a nih theih nan hian, Pentecost pasaltha mi eng emaw zatin kut an lo thlak tawh a. Kum 1975 khan Thangte lam atanga mi pathum lo kalin, anni hian chanchin tha famkim hrilh hna chu an thawk ta a ni. Theih tawkin chanchin tha chu hril mahse; khaw mite chuan an lo ngaihsak teh chiam lo a, hemi tum hian kut bengin an haw ve leh ta a ni. Chung pasaltha hmasate hming chu Pastor Chuauruma, Upa Lallawma leh Pu Mawia te an ni. Hetih lai hian Pastor Chuauruma hi Mualcheng Section Pastor niin, Thangte atangin Mualcheng bial hi a enkawl a ni.

An haw hnu rei vak lovah, Mualcheng South lam atangin Evan. Thanhmunga, Evan. Saidawla leh Evan. Rochhunga te an lut ve leh a. Anni hi District tirh an ni a, an rawngbawlna hi Mualcheng khua a mi tho, Ngaihdama leh Lalsawmi ten an tawiawm bawk. Vaisam khuaa rawngbawl tura anniho luh dan hi han sawi thui deuh ila a tha awm e.

Kum 1975-ah Mualcheng Section P.Y.D-te chuan, Vaisama Kohhran a lo din theih nan rawngbawltu tur tirh an rel a. Chutih laia President ni lai Evan. Saidawla chuan, Agenda sawi fiahna a nei a, rorel palai mittui tla lo an awm meuh lo a ni. Rawngbawla kal tur tanpuina sum pawh cheng zasarih (Rs. 700) lai an hmuh nghal a. An rorel hi District Board-ah theh luh a, thawktu laksak turin an ti a, pawisa an hmuh dan te pawh an hrilh hre nghal a. Tichuan, District Board chuan an vei dan te hriatpuiin, a veitu ngei rawngbawla lak thain an hria a, Mualcheng lam a mi, Evan. Thanhmunga, Evan. Saidawla leh Evan. Rochhunga te chu Vaisama rawngbawl turin an tir ta a ni.

Anni hian Kum 1975 kum chanve hnu lamah, Vaisam khua chu lutin rawngbawlna an nei a. Vaisam te, Buknuam te leh Mautlang-ah te rawngbawlna an nei nghal bawk a. Mautlang khua atanga hnawh chhuah hial te pawh an tawk bawk a ni. Vaisam-ah hian kar khat chhung rawngbawlna an nei a, khaw mi tam zawk chuan an ngaihsak lem lo va, mahse Kohhran chu din mai theih tur ang erawh chuan ringtu mi tlem te an awm tawh. Heng Pentecost pasalthate hian, Vaisam khuaah hian Kohhran din chu duh viau mahse;rambuai, Major Operation avangin hemi kum hian Kohhran chu an din thei ta lo va, tawngtaipui chung zelin an hawsan leh ta rih a ni.

Kum 1976 a lo inher chhuak leh a, Evan. Hrangmawia te, Evan. Pachuaia te chu Vaisam khuaa rawngbawlna nei, tha leh tui seng nasaa sawi an ni leh bawk. Vaisam Kohhran din ni pawh hian, anni pahnih pawh hi Vaisamah hian awmin a dintute zingah an tel ve ve a ni.

VAISAM-AH KOHHRAN A LO DING TA :

Hun te a lo kal zel a Pentecost Pasalthate rawngbawlna leh inpekna te, an tawngtaina te chu a tham ral hauh lo. 1976 kum tawp lam, November thla a lo inher chhuah meuh chuan, Kohhran chu din theih hial niin a lang ta a. Tichuan District Pastor, chutih laia District Superintendent, Rev. H. Vankunga chuan Evan. Lalzuithanga (Lunglei) leh Evan. Saidawla (Mualcheng) te chu lehkha thawnin, Vaisama Kohhran din theih a nih thu leh kal hun tur te a hrilh a.

Tichuan, Vaisam-ah an chhuk thla a, anniho bakah rawngbawla lo awmsa; Evan. Hrangmawia te, Evan. Pachuaia (Lungsen) te leh mi thenkhat, anmahni zuitu an lo awm ve bawk a. Tichuan, hmuhsitna leh deusawhna karah Ni 17 November 1976-ah United Pentecostal Church chu Vaisam-ah din a lo ni ta a ni. Kohhran a din tirh lai hian member sawmthum pali awmin Chairman atan Upa Mangnawla ruat a ni.

A din tirha hruaitute :
1976 - 1978 (Oct)
Chairman : Upa Mangnawla
Secretary : K. Thantluanga

BAPTISMA CHANG HMASATE :

Rev. H. Vankunga chuan Baptisma rawngbawlna chu Evan. Hrangmawia kutah a dah a, ani hian baptisma rawngbawlna chu a nei a. Isua hminga Baptisma chang hmasa ber chu Pu Mangnawla a ni a, a rual hian mi pahnih (2)-in an chang ve a, chumi hnuah Rozawna chuan a chang leh a, K. Thantluanga’n a zui ve leh a ni.

Kohhran din tirh laia Kohhran hruaitute chu :
Chairman : Upa Mangnawla
Secretary : Bro. K. Thantluanga

Tin, Rawngbawltu atan Pu Zasiama ruat a ni a, chumi hnu deuhah Pu Rawngbawla chu Upa atan lak leh a ni. A kum leh 1977 chawimawina neihah mi eng emaw zatin Baptisma an chang leh bawk. Baptisma chantirtu langsar zualte chu Evan. Lalzuithanga leh Evan. Thanhmunga te an ni.

Kohhran din a nih hnu, kum 1977 hian Evan. Thanhmunga chu Vaisam Kohhran enkawl tura rawih chhunzawm a ni a, Mualcheng atangin a bial a ni. Kum 1978-ah Evan. Zalawma chu Buknuamah Evangelist Teacher-in a awm a, ani hian Vaisam chu a bial chhunzawm ve leh nghal bawk a ni.

BIAK IN DIN A NIH DAN :

Ni 17 November 1976-ah Kohhran chu form fel a nih khan, Biak In a la awm loh avangin, Upa Mangnawla Inah inkhawmna an nei thin a, 1976 December thla-ah Biak In hmun tur te dilin V.C–ah dilna te an theh lut a. Bung hnuai chu V.C te chuan Biak In hmun atan an pe ta a ni. Tichuan, Biak In hmun chu laih a ni ta a, chutah harsatna lian tak an tawk ta tlat mai. Theihai kung Biak In hmuna awm chu kih a ngai, kih a nih loh chuan Biak In a sak theih dawn si loh. Chutah an kit ta a, Pi Laltluangi te chuan kan pa boral tawh hriat reng nana kan phun a ni tiin V.C Court-ah an pu lut ta a (Hetih lai hian Vaisam khua hian Lawnglawn V.C an tawm lai a la ni a, VCP chu Pu Thangkima a ni). Tichuan, ngun taka V.C Court-in a ngaihtuah hnu chuan Kohhrante chu thiam chantir niin, Biak In sak chu an chhunzawm leh thei ta a ni.

Tichuan, Kum 1977 April thlaah Biak In sak chu sak zawh niin, hemi thla vek hian an luah nghal a ni. Dap-rapa sak a ni a, Biak In thutthleng atan pawh mau pum pathum kham chu an hmang mai a ni. Tichuan, he Biak In hmunah hian kum li leh a chan ve (1977-1981 June) lai awmin, an sa tha a, an thuam tha ve zut mai a ni. Kum 1977 February ni 10-a Baptist Kohhran a mi, Pu Zaikunga chuan a vawk vulh lai chu UPC-ah chawmawina atan a pe a. Hemi ni hian Kohhranah lo lut nghalin, an nupa hian Evan. Lalzuithanga kutah Isua hmingin baptisma an chang nghal bawk a ni. Tichuan, Ni 25.10. 1978 hian Kohhran in-form a ni a, Pu Zaikunga hi Chairman atan thlan a ni. Chairman hna hi kum li (4) a thawk a. Chairman a nih lai hian ama In hmun laili leh nuam tak mai, khelmual bul chu Biak In hmun atan a pe a. Tichuan, 1980-ah Biak In thar sak tan niin Ni 6.6.1981 (Saturday) ah Biak In thar hawnna Programme hi an nei ta a ni.

CHAWNGTE SECTION HNUAIAH :

Kum 1979-ah Chawngte Section lo piangin, Pastor atan Evan. Saidawla chu ruat a ni a, Evan. Zalawma, Buknuama Evangelist Teacher-a awm pawh chu Pastor atan lak chhuah a ni ve leh bawk a. Tichuan Vaisam chu Chawngte Bial chhunga Local pakhat a lo ni ve ta a ni. Chawngte Sectional Board neih hmasak ber chu Ni 3 November 1979-ah a ni a, Vaisam Kohhran aiawhin Upa Mangnawla pawh a kal ve ngei a ni tih Chawngte Bial Secretary minute-ah a chuang.

Tin, Chawngte Section Conference hmasa ber chu, 1980 April ni 29-ah niin, Thangte khuaah hman a ni a, Vaisam Kohhran pawhin inkhawmpui thawhlawm atan cheng nga (Rs 5/-) an pe ve bawk. Thil pakhat huai taka kan sawi theih chu, 1978 atangin Vaisam Kohhran chuan Secretary minute bu neiin tha takin an enkawl a. BialBoard leh inkhawmpui te leh thawhlawm te an ngai pawimawh hle a, heng atang hian hetih hun laia Vaisam Kohhran hi tlem hle mahsela; Kohhran puitling tak an ni tih a hriat theih a ni.

VAISAM KOHHRAN HRUAITUTE HMING LEH AN NIHNA TE :

Hun (Term)	Chairman	Secretary	Treasurer
1976 - 1978 (Oct)	Upa. Mangnawla	K. Thantluanga	-
1978 (Nov) - 1981 (May)	Upa. Zaikunga	Rbt. C. Rosanga	-
1981 (June) - 1985 (June)	Upa. K. Thantluanga	Rbt. C. Rosanga	-
1985 (July) - 1990	Upa. Rawngbawla	Rbt. C. Rosanga	-
1991 - 1992 (July)	Upa. Rawngbawla	Rbt. V. Zathangvunga	-
1992 (August) - 1992 (Dec)	Upa. K. Thantluanga	Rbt. V. Zathangvunga	-
1993 (Jan) - 1994 (Dec)	Upa. Rawngbawla	Rbt. V. Zathangvunga	-
1995 (Jan) - 2000 (August)	Upa. K. Thantluanga	Rbt. Lalnuntluanga	-
2000 (Sept) - 2001 (March)	Upa. K. Thantluanga	Rbt. J. Engmawia	-
2001 (April) - 2002 (Dec)	Upa. K. Thantluanga	Upa. C. Rosanga	-
2003 (Jan) - 2006 (June)	Upa. K. Thantluanga	Upa. K. Thantluanga	Upa. K. Thantluanga
2007 (Dec) - 2008 (Dec)	Upa. C. Rosanga	Upa. C. Rosanga	Upa. K. Thantluanga
2009 (Jan) - 2010 (May)	Upa. K. Thantluanga	Rbt. B. Vanlalsanga	Upa. K. Thantluanga
2010 (Dec) - 2011 (June)	Rbt. B. Vanlalsanga	Bro. V. Vandailova	Bro. V. Vandailova
2011 (July) - 2011 (Dec)	Evan. Lalhmingsanga	Upa. B. Vanlalsanga	Upa. B. Vanlalsanga
2012 (Jan) - 2013 (Feb)	Evan. Lalhmingsanga	Bro. Pc. Lalfakawma	Evan. Lalhmingsanga
2013 (Mar) - 2015 (Feb)	Evan. Lalmuanpuia	Bro. Pc. Lalfakawma	-
2015 (Mar) - 2016 (June)	Upa. Pc. Lalthanliana	Evan. C. Lalramchhana	-
2016 (July) - 2016 (Dec)	Upa. Pc. Lalthanliana	Bro. Saizamliana Sailo	-
2017 (Jan) - 2018	Upa. Pc. Lalthanliana	Bro. Pc. Lalfakawma	Rbt. K. Lalchhinga
2019 (Jan) - 2020 (Dec)	Upa. K. Lalchhinga	Rbt. Pc. Rohmingliana	Upa. Pc. Lalthanliana
2021 (Jan) - 2022	Upa. K. Lalchhinga	Evan. R. Lalthlamuana	Upa. Pc. Lalthanliana
2023 (Jan) - 2024	Upa. K. Lalchhinga	Evan. R. Lalthlamuana	Upa. Pc. Lalthanliana
2025 - 2026	Upa K. Lalchhinga	Evan. T. Biaklala	Rbt. HT. Lallenmawia

VAISAM FIELD EVANGELIST TE HMING LEH AN THAWH KUM :

1. Evan. T. Zahmingliana (Luangmual) — 2009 – 2010
2. Evan. L. Hmingsanga (Rangte) — 2011 – 2013
3. Evan. Muanpuia Colney (Haulawng) — 2013 – 2015
4. Evan. C. Lalramchhana (Vanhne) — 2015 – 2016
5. Bro. Saizamliana Sailo (Lungdai) — 2016 – 2017
6. Evan. R. Lalengzaua (Zotlang) — 2017 – 2019
7. Evan. H. Lalhriatmawia (Bualpui H) — 2019 – 2020
8. Evan. R. Lalthlamuana (Sekhum) — 2021 – 13 January 2026
9. Evan. T. Biaklala (Lunglawn Zaia Veng) — 13 January 2026 - till date

VAISAM FIELD EVANGELIST QUARTERS :

Kum 2009-ah Luangmual Section Bial Kohhranpui chuan Evan. T. Zahmingliana chu Vaisam Evangelist in a tir a. Kohhranpuiin a chhawr reng theih loh avangin, kum khat hnu, 2010-ah District Mission Department chuan Home Mission Field-ah puangin thawktu chhawr lai hi a chhawr chhunzawm leh ta a, a hlawh erawh District Kohhranpuiin a tum thung a ni. An chhungkua hian Vaisamah lutin, Pu Pc. Thanliana ramah thawktu Quarters hi bial lamin Work Camp neiin an saksak a. A ban leh relah Chhawntual thing an hmang a, a bangah dap, a chung Siallu-in an chih a ni. Tichuan, he an Quarters sakah hian an rawngbawl chhung kum 2009 - 2011 January thla pum an awm.

Tichuan, 2011 kum tir lam vek hian Vaisam Field- thawktu atan Evan. L. Hmingsanga Rangte chu lak leh a ni a, Quarter hmun atan Pu. Vanhnuaialha In hmun chu District Mission Department hian Rs 10,000/- in a lei a, tichuan In hi Quarters atan hman nghal a ni. Kum 2013-ah Evan. Muanpuia Colney chu Vaisam-ah hian chhawrin a awm leh a, kum hnih leh tlem awmin, hmun dangah sawn chhuah leh a ni. Evan. Muanpuia awm lai hian Evangelist Quarters thar tun din niin, a hahpui hle a, tun thleng hian hman a la ni ta reng a ni.

VAISAM KOHHRAN TUN DINHMUN TLANGPUI TE :

Members: Vaisam khuah hian United Pentecostal Church awmna In hi kar chhuak te nen, a vaiin In sawm leh pathum (13) niin, thawktu tiam lovin Kohhran member zawng zawng hi sawmli leh paruk (47) an awm a ni. Vaisam Kohhranah hian thawktu tiam lohin rawngbawltu paruk an awm a, Upa pahnih an awm bawk. Department hrang hrang te awmin hma lam a pan mek zel a ni.

Biak In : United Pentecostal Church Biak In anga hmun tha leh rem hi Vaisam khuaah hian a awm lo a. Pawl dang Biak In dang zawng zawng aiin a lawilen a nuam zawk bawk a ni. A tir lama kan sawi tak ang khan, Biak In hmun hi Upa Zaikunga’n Kohhran Biak In sakna atana a pek a ni a. Kum 1980-ah he hmunah hian Biak In chu sak tan niin, Ni 6.6.1981-ah hawnna programme hman a ni. Tichuan, hemi hmunah hian tum li (4) Biak In sak ni tawhin, tuna Biak In ding mek pawh hi a palina a ni a. Biak In sak hun lai pawh hian, Field worker Evan. R. Lalengzaua pawh a hahin a buai thei hle. Biak In hi 2017 April 18-ah District Mission Director, Rev. VL Hmuaka’n a lung phum phumin, sak tan a ni. Biak In sak thu-ah Kohhranhote an tangrualin an phur hle a, 2018-ah sak zawh fel a ni. Tichuan, 2019 January thlaah bialtu Pastor Rev. B. Kamliana’n Biak In hi hawngin, ruai ropui tak nen hun hman a ni. Hemi hnu hian chei mawi a, Ceilling a ni a, a mawi danglam hle.

Evangelist Quarters : Kum 2014-a sak Evangelist Quarters hi tha takin a la ding a. A pawn leh a chhung lam te rawng hnawiha chei thar niin, a hma lam Compound Fencing hi thir lenin District Mission Department chuan min hungsak a, hei hian Quartersramri chungchanga buaina lo awm zel thei leh, Football lo lutin bang a denkeh thinna lakah pawh min chhanhim bawk. Quarters chhung bungrua pawh mimal thahnemngaihna te, bial chhung leh pawn Department te inpekna azarah a chang tlung chho zel a. Quarters Property Record Book-ah bungrua te record fel vek a, vawn that a ni bawk.

---