NEW HAULAWNG KHAW CHANCHIN

New Haulawng hi Haulawng khawper, Haulawng khua atanga hmar lam 3 Km-a hla, Aizawl kawngpui dunga awm a ni. Haulawng VC hnuaia awm a ni. Kum 1992 kumah Haulawng Lalveng atangin In leh lo te sa a, pem khawmte an ni.

KOHHRAN LO DIN DAN

Hun eng emaw chen chu Haulawng Lalveng lamah an lawi chho thin. Mahse, veng kar te a hlat tham em avangin, kum 1994 atangin Baptist Kohhrante nen hmun khatah lawi hovin an awmna lamah chuan an inkhawm hrang ve ta a ni. Hun a lo kal zel a, thurin inang ta lo chu hmun khata lawi khawm reng a lo harsa a. Tichuan Ni 16.2.1996 (Sunday) zing inkhawm ban atangin UPC Kohhran lam chu an inla hrang ta a, an infin khawm laia an thawhlawm tling khawm sa pawh chu insemin, UPC lam hian Rs. 201.25 an chang a ni.

Hun rei lo te-ah mahnia lawi hrang thei nia inhre lovin, Haulawng Lalveng lamah an lawi chho leh ta a ni. Haulawng Lalveng Kohhrante hian rilru zau taka lo dawngsawngin, Baptist Kohhran nen an infin laia rawngbawltua lo awm tawhte pawh chu, rawngbawltu puitlingah an lo pawm a ni.

Hun lo kal zelah, veng kar te a hla thamin, inkhawm reng a lo buaithlak a, a awm ang angte inhmu khawmin, Kohhran a hranga din ve mai thain an hria a, United Pentecostal Church, New Haulawng chu Ni 5 February 2005-ah din a ni. Local puitling anga awm nghalin, khatih laia Haulawng bialtu Pastor, Rev. Ralkapkunga Khiangte chuan Kohhran a form a ni. Chutih lai chuan Kohhran member 25 an ni a. A din tirh hian rawngbawltu pali (4) chiah an awm a ni.

Kohhran fahrah ni mahse, Haulawng Lalveng Local atanga pem khawm leh in dang chan chang an nih avangin, Haulawng Lalveng Kohhrante hian an hmangaihin an tuam hlawm nasa em em a ni.

HRUAITU HMASA TE

A hnuai a mi ang hian, Kohhran din tirh lai a, Kohhran hruaitute chu an ni :

• Chairman : Upa. R. Laldingliana
• Secretary : Upa. B. Rosanga
• Treasurer : Rbt. R. Lalkhuma

BIAK IN DIN DAN

Kohhran a din tirh hian Biak in neih a nih nghal mai loh avangin, Chairman Upa. R. Laldingliana te inah inkhawmna neih thin a ni. Inkhawmna in neitute inpein inhawng hle mahse; Biak in nei lova kal reng theih a ni bik lo va, chuvangin Biak in nei turin hmalak a ni ta a ni.

• Biak in 1-na : Biak in pakhatna (a hmasa zawk) kha, Rev. Ralkapkunga Khiangte, Bialtu Pastor-in a lungphumna neiin, Biak in sak bul tan a ni a. A dung 30 ft leh a vang 18 ft-a liana rel a ni. Kohhran member tlem te mah ni se, an inlungrualin an phur em em a, Lalpa hruainain Assam type pangngai takin an sa puitling ta mai a. (Tichuan, 13th April, 2006 Good Friday inrinni zanah Evan. R. Lalthlamuana leh Bro. Valthanmawia ten, Lalpa zanriah sacrament buatsaih pahin an luah luh pui a ni.) Ni 5 April 2007 (Good Friday dawn zan, Sacrament sem zanah Bialtu Pastor, Rev. PC. Lalrosanga, District Mission Director-in hawngin Pathian hnena hlanna a nei a, aniho hian an luah lut ta a ni.
• Biak in 2-na : Pathian hruaina a zarah member te an lo pung ve zel a, Biakin pawh an inkhawm kim chuan an leng ta lo hle mai a, chuvangin Biakin sak that zai rel leh in, Ni 10 January 2016-a Church board Committee chuan Building Board te a din a. Tichuan kawng hrang hrangin sumtuakna te neiin hma an la chho ta zel a.
  
  Tichuan, Ni 3 March 2018 ni chuan, Bialtu Pastor. Rev. C. Hmingthanfala’n Biak in Lungphum phumin, Biak in sak chu an tan leh ta a ni. Biak in thar hi RCC-in rel a ni a, a dung 40 ft leh a vang lam 22 ft-in sak a ni. Tunah hian la peih famkim lo mahse, mawi taka khawr pum tawhin an luah mek tawh a, luah chungin an bei kal zel a. Pathian zarah ropui taka hawn a nih ngei an inbeisei a ni.

TUN (2025) DINHMUN LEH HRUAITUTE

Tun (2025) dinhmun : Tunah (2025 ah) hian Kohhran hi chhungkua 8, member 37 an awm mek a ni.

2025-2026 Kohhran hruaitute :

• Chairman : Upa B. Rothanga
• Secretary : Rbt. B. Lalngaihawma
• Treasurer : Upa B. Rosanga
• Statistician : Upa R. Lalkhuma