Immanuel Local hi Zobawk bial chhunga awm a ni. Zobawk North khaw chhunga awm niin, Immanuel Local ding tur hian kum 1993 - 1997 khan Zobawk Local hmalaknain Zobawk North (Vengthlang lam tia sawi a ni thin bawk) ah hian biak in sak a lo ni tawh a, chu chu luah a nih hmain thliin a tihchhiat avangin thiah leh a ni. Kum 2002, Rev. Zalawma (L) District superintendent a nih laiin Vengthlang lama biak in sak chu a rawn rawt thar leh a, hei hi a chhan chu Zobawk khua hi khaw lian leh khaw dung sei tak a ni a, biak in pakhat chauh a lawi khawm hi veng kar hla tan a hahthlak hle a, chuvangin vengthlang lama kan Kohhran mi leh sa tam tak kan lo chan thin vang a ni.

Zobawk Local Church Board Committee vawi 3-na, Dt. 17 March, 2002-ah bialtu Pastor Rev. P. Rodawla (L) hovin hmalak dan tur rel a ni a, hemi kum vek hian hmalak nghal a ni. Dt. 1 February, 2004 (Sunday) ah Zobawk Local Church Board Committee vawi 2-na, Rorel No. 3-na thu angin, Rev. Ralkapkunga Khiangte, District Treasurer-in Local thar hawnna a nei ta a ni. A tuk thawhtanniah Bawng, Vawk, Ar, Sangha te nen ruai ropui takin theh a ni. Dt. 11.5.2004-ah biak in chhuat Cement zut a ni.

Zobawk Local Church Board Committee Vawi 3-na, Rorel No. 1-na, Dt. 31.1.2004-a neihah Rev. PR. Dawla (L), bialtu Pastor hovin Local hruaitu turte ruat an ni. Hetiangin:

Heng baka form la tulte chu bialtu Pastor hovin ruat tharte nen lo ruat/form chhunzawm tura thu dah a ni. Dt. 15.2.2004-ah Emmanuel Local Church Board Committee vawi khatna leh a hmasa ber neih a niin, hetah hian tualchhung rawngbawltu leh Church Board Member tur mi 8 (pariat) ruat an ni a, Department pahnih Ladies Auxiliary Department (LAD) leh Missions Department hruaitu turte ruatna neih a ni. Dt. 15 February 2004 zanah Department hruaitu turte ruat zawm leh a ni a, Pentecostal Youth Department (PYD), Pentecostal Children Department (PCD) leh Sunday School Department hruaitu te leh zirtirtute ruat nghal an ni.

Biak in hawn a niin Kohhran hruaitu turte pawh ruat fel a ni tawh a, Zobawk Local Church Board Committee vawi 4-na Rorel 1-na thu angin, Dt. 14.2.2004 (Inrinni) zan atangin inkhawm hran tan a ni a, Dt. 15.2 2004 (Pathianni) zingah Biak inah inthlahna programme siamin, hmun khatah inkhawm ho vek a ni a, heihi Kohhran in dan ni atan hman a ni ta a ni. Zobawk Vengthlang lamah Local thar a lo din takah chuan, Vengthlang Local tia lamrik mai thin a ni a, mahse vengchhak lam (Venglai leh Vengthar) atangin lawi an tam zawk bawk si avangin, Church Board-in Local hming tur hi ngaihtuahin, hetih laia Local Secretary, Rbt. V. Darthuama’n a lo ruahman chhin ‘IMMANUEL LOCAL’ tih chu Church Board Committee vawi 3-na, Dt. 29.2.2004-a neih, Rorel 3-na chuan lungrual takin Pathian hnena inhlan chungin Local hming atan pawm a ni ta a ni.

Tuna Kohhran dinhmunah leh Term kal mek Kum 2025 - 2026 chhunga Kohhran hruaitu te hetiang hian an ni :

MEMBER LEH BIAK IN DINHMUN :

Immanuel Local hi a din tirh atangin Zobawk North lamah hian member an tam hran lo a, a ram ri anga inthen a rem chiah lo a, chuvangin Zobawk Local-a Kohhran puipa thenkhat leh chhungkaw eng emaw zat chu Immanuel Local lamah tawiawm a, lawi turin ngen leh sawm an ni a, in dan tirh hian member 87 niin, in dan kum a lo tawp meuh chuan member 104 an tling. Kum 2005-ah member 111 an ni a, kum 2006-ah chuan member 137 an ni. Dt. 15.7.2007-ah member 120 niin, kum a lo vei hret hret a, member pawh an pun rualin Zobawk Local lamah min haw chhohsan ve ta zel a, tuna he thu ziak a nih thleng (Dt. 6.5.2025) hian member 60 niin, kiamna chhan hi sawi tak ang khan Zobawk Local lama lawi ta te leh pem leh thi te avang a ni tlangpui. Immanuel Local hian rawngbawltu tha tak tak te, bial hruaitu fel tak tak leh Licence holder pawh mi pathum lai mai a lo chher chhuak tawh a, rawngbawlna kawngah zau zawka ke pen zelin Kohhran leh Local lian zawkte tih theih ang ti ve vek thei lo mahse; District leh Section atanga target leh thawhlawm lo kal thin angah te chuan, theih tawp chhuahin tlak ngei zel a tum thin a, Local hming ang deuh hian member te mah ni se, Pathian awmpuina tun thlengin kan la chang zel a ni.

Local din tirhah khan Biak in hi Assam type-in a bang tile, a chung rangva leh a chhuat Cement-a zutin sak a ni a, kum eng emaw chen luah a ni a, Building Department hmalaknain Biak in thar sual a ni ve a, District atanga puihna pawh Rs. 2,00,000 hmuh a ni bawk. Dt 24 October, 2021-ah khan biak in thar pawh luah luh a ni.