Bualpui H hi Hemphunga Bualpui tihna a ni a, Thingsai chhim lam km 5 vel a awm a ni. Khaw hmun nuam tak niin, Bualpui khua atangin Saisih chhuah, Tiau leh Tuipui intawhna kawngpui zau tak maiin a pawh bawk.

A bul tan dan :

Kum 1979 hma lam tawh khan UPC ni sa Pu Zahaiha te, Pu Gurunga te an lo awm tawh a, mahse anni hian pawl dangah min kalsan leh ta a ni. Kum 1986 April-ah Burma ram Bungtlang atangin Kohhran upa ni sa, Chhanthawna te chhung leh Lalnghaka te chhung an lo pem a. Ni 24.4.1986 Pathianniah chhung inkhawm ang lekin hun an hmang a, a zawng a za-in inkhawmna an nei thei lem lo.

Hetih laia bialtu Pastor C. Darnghaka hovin, Thingsai lam unaute nen rawngbawlna an va nei zauh zauh a, Pu Buanthanga, Baptist lam rawngbawltu inah te inkhawmna an buatsaih thin. Ram lak a awm ngai lo va, member tlem tete chu UPC-ah rinawm takin an awm reng a. Kum 1987 atangin Pastor CS. Pachhunga’n a va tlawh thin a, inkhawmna te, Pu Chhanthawna inah a neih pui thin a, thlen inah a hmang bawk. A hrana ruat awm lo mahse; Pu Chhanthawna leh Pu Gurunga chu Kohhran upa anga hmangin hruaitu chan an chang reng a. Hemi kum hian Pastor CS. Pachhunga chu ni 2/3 chamin pawl dangte kawmin rawngbawlna a nei thin a, mahse ram lak a awm thei meuh lo a ni.

Member pun chhoh dan :

Kum 1988-ah PC. Dailova leh a Team ten Bualpuiah rawngbawlna an rawn nei a, mite pawhin an bawh hle. An rawngbawlna atangin Tv. Rochama, Biakhlua, Liansanga ten Bualpui H khaw chhuakah chuan Baptisma an chang hmasa ber a ni.

Kum 1989-ah PC. Dailova te team bawk chuan rawngbawlna an nei leh a, hetah zet chuan ram a kal ta zawt mai. Evan. Lalnghinga te, Pastor CS. Pachhunga te chahin rawngbawlna an nei a, an chamchilh rei bawk a. Ni 2.4.1989 Sunday chhun, mual inkhawmnaa Rev. CS. Pachhunga’n, II Timothea 2:5 ‘intihsiakna’ a sawi phei chu an ngaithla chikin an ei viau a ni. Hemi zan hian PC. Dailova ten au rinna hmangin thu an sawi a, an sawi hnuin Baptist lam hruaituten au rinna hmang bawkin thu an rawn sawi ve leh a, an inau khum tawn nasa mai a. Pastor hovin PC. Dailova ten an insawi chhawk zan khua a, indona thianghlim a ni ringawt mai a ni. Hetih hun lai rawngbawlna hi UPC-a an inpek nasat lai a ni. A hmaa member 25 vel lek kha, member 60 vel an tling chho ta a, Department pawh fu ke kimin an ding thei ta a ni.

Khatia an han pung hluai kha rinna lamah an la nghet tawk lo va, Baptist lam atangin beihna a nasa bawk a, chu a chhapah, a tam zawk chu thalaite an ni si a, mi 12lai an kir leh a, mahse mi 31 lai an rawn luh belh leh a ni. Kum 1993 thlengin member 70 vel an la ni ta reng a, 2021-ah khan member 120 vel an tling.

Hruaitu lo ni tawh te :

Kum 1989-ah Baptist Kohhran atangin rawngbawltu leh Sunday School Secretary ni bawk, Sawikhuma a lo lut a, Kohhran in-form dan pangngai anga an in-form hmasak ber chu, Ni 23.4.1989 a ni. Bialtu Pastor CS. Pachhunga leh Upa Thanzaua, Cherhlun ten hetiang hian an form a ni :

Kohhran tuamhlawmtu :

Kohhran ding tir te an nih avangin an mamawh hrang hrangte - Laltin, thawmhnaw, dawhkan leh sum leh tha te nen, Thingsai lam unauten an pui nasa hle bawk a ni. Bial Kohhranpuiin dar an pe a, an VCP Lianhrula’n No leh Petromax a ngaihtuahsak bawk. Vawiin thleng hian Bualpui Kohhran hi Lalpan min awmpui a, hmangaihtu pawh vawiin thleng hian kan ngah thin hle a ni.

BIAKIN DIN CHHOH DAN :

Bualpui H UPC te hi member tlem ngaihtuah chuan Biak in sa zing pawl tak an ni awm e. Biak in pathum ngawt an sa tawh a, tuna mi hi an pali sakna a ni.

Biak in 1-na :

Kum 1988-ah Pastor CS. Pachhunga’n Biak in neih zai a relpui a, VC-ah a hmun tur te ti felin, Ni 18.6.1988-a Crusade an va neih tumin, Ni 20.6.1988 (Monday) ah Biak in hnatlang hmasa ber chu an nei ta a. A ren-te la chawpin liang an zawm hman a, mau chu thlasik hun an nghak a. PC. Dailova team ten rawngbawlna an va nei a, a chung atan di an leisak a, a bang tur leh tul dangte an thawhpui a, tichuan April 1989 thlaah inkhawm theihin Biak in hmasa ber peih fel a ni ta a ni.

Biak in 2-na :

Biak in pakhatna kha Maurap in mai a ni a, vanduaithlak takin a kum leh mai, 1990 kum, To thlipui khan a nuai thluksak hlauh mai a. Biak in nei lovin, mi inah kum 2 lai an inkhawm phah nghe nghe a ni.

Biak in pahnihna chu Maurap maia sak duh tawk tawh lovin, Thingzai In ngeia sa turin an inbuatsaih a, Thing an zaitir a, an ur nasa bawk a, a hah pawh an hah hle a ni. Thingsai lam atangin Workcamp neihpuiin thingzaite an va thiarpui a, an lawm hle. Tichuan a chung tur atan, Bialtu Pastor Rev. PC. Doliana kaltlangin District lamah dil a ni a, District atangin Rangva 4 Bundles lai mai min pek bakah, Cherhlun thlengin min rawn dahsak a, Bialtu Pastor leh District chungah kan lawm tak meuh a ni. Tichuan, Cherhlun atang chuan Motor awm tawh hek lo le, ke hlirin kova puin Bualpui kan inpu thleng a ni. A hahthlak rualin khang hun te kha a ngaihawm hle a ni.

Kan inpeih thaw khat a, 1992 kumtir lamah Bialtu Pastor Rev. PC. Doliana kaihhruainain, Biak in pahnihna chu kan rel chho leh ta a. Kohhran tlem te kan nih avangin, Thingsai Local-in nu leh pa chan changin, Sum leh pai leh tha leh zung nen min buaipui nasa em em a. Tichuan mite tanpuina nen kum 1992 kum tawp lamah chuan, a chung Rangva, a rel zawng zawng thingzai leh a bang dapin, Biak in chu kan sa zo ve leh ta a ni.

Biak in 3-na :

Biak in pahnihnaah kum 8 lai hun kan hman hnuah, a ban atan thing tha kan hmang phak lo va, tin a bang dap mai a nih bawk avangin, a lo mawih tan a, hlauhthawnawmah a ding ta niin kan hria a. Tichuan Church Board rorelna angin, Ni 8th March 1999-ah Biak in chu thiah a ni.

Sum kan neih loh em avangin Biak in tur pual hian, mi hnuaiah kan inhlawh nasa em em a, Lui lamah kan kal thul, Envelope te siamin chhung tinte kan intuk bawk. Thiamhnang lamah kan thiam thil chi hrang hrang tahin, chung hmang chuan sum kan tuak bawk. Chutiangin Kohhranin sum kan neih loh em avangin, Thingzai thiam, Upa. Vanhlira leh Upa Vanlalnghaka te chu tha khat, tha hnih zela thleng/sut turin kan ruai ta a. Anni pahnih hian tlawmngaih chhuahin, Biak in pathumna ren zawng zawng min zai zawhsak vek a ni. Cherhlun Local PYD ten Work Camp-in, Thingzai min thiarpui a, District lamin min ngaihven a, Saiha inkhawmpui hialah te, kan Biak in sakna tur min khawnsak a, kan va lawm em. Dt. 1st May, 2000-ah Biak in rel tanin, 2001 kum tir lamah Biak in chu sak zawh a lo ni ta a ni.

Biak in 4-na :

Khawvel a lo changkang zel a, nun phung pawh a sang chho ve zel a, chuvangin kan Biak in pawh Assam-type mai duh khawp lohna rilruah a lo awm a, tin, District lam atanga tanpuina pawh a lo sang chho ve zel bawk nen. RCC ngeia din ve ni se, tiin Church Board Committee-in a rel ve leh ta rup mai a. Kum 2019 atangin, Biak in 4-na sa turin kan intuak chho ve leh ta a ni. Biak in tan mi hnuaiah kan inhlawh a, a changin Lui lamah kan fehchhuak bawk a. Chu bakah chhung tinah Biak in pualin, target (keimahni tawka sang tak tak) kan intuk bawk a. Kan bialtu Pastor H. Lallawmsanga’n Ni 15th June 2020-ah Biak in sak Lungphumna min rawn neihsak a, sak chhunzawm nghal a ni. Kan Biak in sak 4-na tur chu a dung feet 54, a vang lam feet 27-a rel a ni. Tunah a ban leh beam chu kan zo ve ta. Lalpa a lo la kal lo va, rem a ti a nih chuan Biak in tha tak neih ve ngei kan tum a ni.

Upa leh Rawngbawltu :

Bualpui H Kohhran a din atanga Upa, Rawngbawltu Licence Holder chhuak tawh te :

License Holder : Evan. Lalhriatmawia

Upa lo ni tawh te :

1. Upa Chhanthawna
2. Upa Hrangkipaa
3. Upa Gurunga
4. Upa C. Lalthangliana
5. Upa Vanlalnghaka
6. Upa Thatliana
7. Upa Sawikhuma
8. Upa Sianglinga
9. Upa Vanhlira

Rawngbawltu lo ni tawh te :

1. Rbt. Taikhuma
2. Rbt. Laldinmawia
3. Rbt. Tialkunga
4. Rbt. Lalzidingi
5. Rbt. Lalramenga
6. Rbt. Lalpari
7. Rbt. Vantluanga

Pathian Chawimawina :

Bualpui H Local a din atangin hriat theih chinah, Pathian hnena lawmthu sawi chawimawina nei tawhte chu a hnuai a mi ang hi a ni :

Bualpui H Local UPC a Pathian hnathawh ropui chu :

Silver Jubilee chungchang ah :

Bualpui H Local UPC te hian hmuhsitna leh sawi chhiatna chi hrang hrang karah Pathian hruaina kan chang nasa ve hle thin.

Dt. 4th April, 2014 kha Bualpui H Kohhrante, kan SilverJubilee hun a ni a, lawm kan duh si, Sum leh pai engmah kan nei si lo. Thla khat chiah a awm tawh tihah,Church Board Committee chuan, ‘Jehova Jire’ a ni, chutah chuan innghat ang. Zan 2 riakin kan daivak ang a, Lalpan tul a tih chuan Jubilee hmanna tur kan hawn em em ang’ tiin a rel ta tawp mai a ni.

Dt. 3rd March, 2014 (Thawhtanni) zingah chuan, Jubilee ruai thehna tur zawng tur chuan, Jehova Jire-a innghat ngam mi 9 te chuan ram lam kan pan ta. Silai 3, Len pangngai 3 leh Lenkhang 3 kan keng a. Mihring lama thlir chuan a beidawnthlak hle. Mahse, Lalpan Jubilee min lawm tir ang tih beiseiin, chung lam thlirin Tiau lui panin kan liam thla ta a ni.

Tiau lui kan thleng chu rilru a beidawng ru hle. Kan hmaah Baptist Kohhran BMP mi 20 lai mai, an neih ang ralthuam famkim kenga kalin, zan thum lai an lo riah tawhna leh an lo hlawhchhamna riah bukah ngei chuan, riah run kan rem ve ta ngawt mai le. A tuk khawvarah kan Pasaltha pathumte chu sa pelin an chhuak ta. Zing dar 7:00 velah silai a ri ta dur mai a, kan lo ral hlim em em ringawt mai. Unaupa Ruallianmawia’n Sakhi pachal a rawn kap a lo ni.

A Sakhi kah dan :

“Ka sa channa turah ka thu fel chiah a, Sakhi pachal hi a lo kal a, ka kap ta a ni. A tlu ta mai si lo va, a thisen far atangin ka chhui a, ka zui zel a, a hnu ka bo ta hlauh mai a, mangang taka ka hawi vel laiin, a rawn hram ta a, chu lamah chuan ka zui leh ta a. Chutiang chuan vawi thum ka bo va, min rawn ko zel a, ka zui zel a, a tawpah kan buk bul kan inzui thleng a, ka kap tlu ta a ni. Phurh ngai miah lovin, amah zawkin buk min hruai thleng a ni,” a ti. A sa channa (a va kah tan tirhna) leh Buk inkar hi 2 Km lai a ni.

Tlai lam Dar 2:00 pm velah sa chang turin an chhuak leh ta. Zan dar 12:00 velah khaw bul lawka Darnam sih tlan, Sazuk chal lian em em chu Unaupa Biaknawla’n hmanhmawh takin a kap thawi a, a hlau tlan chhia chu a thlang feet 40 vela sangah a zuang thla a, Lalpan a tan thang a lo kam ni ngei tur a ni. Thing, ui pum rual tur pahnih karah a zuk tla zep a, a ke-in lei rap phak si lovin, a lu chauh che theiin a tang ta tlat mai a. Hmun leh hmunah, a silai kaw hmawra a chal hawlh chilhin a kaphlum ta a ni. Hmun hlaa phurh hah ngai lovin, Lalpan dai hnaiah a rawn khalh chhuahsak a ni. Kohhranho mi 50 vel zetin a sa an phur a ni.

Chung an sa kahte chu sumah chantirin Rs. 30,000/- (Singthum) chuang hmuh chhuah a ni a. Jubilee chu Bialtu Pastor R. Lalsangzuala’n hawngin hlim takin ruai nen kan hmang ta a ni. Bial chhung khaw hrang hrang leh Burma Bungtlang Kohhrante tlawhin hlim takin kan hmang thei ta a ni.

Kan Khuangpui ei chhetu Ui chu :

Biak in pakhatna kan sak zawh hlim deuhah, mi hmusitna nasa tak kan tawrh mek laiin, kan Khuangpui kaih thar tha deuh mai, Biak in chhunga kan dah chu, a savun a lo la hring deuh bawk nen. Pu Tawka uiin a lo pet thler vek mai a, kan thin a rim a, kan zak bawk a, rilru a na hle. Mahse, Lalpan kan hreawmna te min hriatsak a, a tuk zingah khawvar rualin kan Kohhran pa, Pu Gurunga Sakuh thangah a lo awk hlum der mai a, mak kan ti hle.

Kum 2025-2026 Bualpui H Local hruaitute :