PUKPUI LOCAL CHANCHIN

Kum 1954 vel laia hmar lam atanga hlimna lo kal zel chuan, Pukpui pawh a lo thleng a, hlimna duh eng emaw zatin an lo tawiawm ve a. Baptist Biak in bak chu inkhawmna a la awm si lo va, Biak in-a Pathian faka inkhawm te an chak em em mai a, mahse, heng hun lai hian lam chu sawi loh, kut ben te, hla chang sawi te, hla sawi/sak nawn te hi chu a tina tin chi pawh a ni lo a ni. A tui fal deuhin Shawl bah hnuaia kut ben leh ban vai pawh an hre thei an ti thin. Mahse an hlim si a, kut beng te, hla chang han sawi te an awm tan ta a. Tum khat chu Good Friday ni hian Biak In (Baptist Biak In) a an inkhawm laiin, Pu Sapnghaka te’n Khuang te an lo pai ru a, ‘Thu mak ka sawi nin theih loh chu, Kalvari chanchin a ni’ tih hla an sak laiin, hla nawn awih loh tih kha hre rengin hla an sa chhuak chiah tihin mi hlimho, tlar hnung lam atangin an lo pen chhuak a, lengkhawm hla thlukin an rawn nawn lui ta a. Hun changtuin a tawngtai hnan ta hmiah mai, Biak in atang chuan an nam chhuak a, inkhawm banah Biak in kawtah inhnialna a lo awm ta a. Inkhawm bang e ti lo chuan, a inngam tlak deuh chu an intin ta uaih uaih mai, buaina lian tham chhuak lovin an tling tla thei ta hram a. Chuta tang chuan inkhawm ho thei an ni ta lo va, khatiang hun a lo thlen takah chuan, Kohhran hruaitute leh mipui an tang tlang bawk si nen, khatih hun laia hlimna thlarau tan tlattu te kha, ‘ramhuai thlarau’ titu, hmusit em emtute hmaah zahpui miah lo va, Pathian ring tlat chunga an han kal zel thei kha an hluin an zahawm a, Pathian ruat an ni e.

Kohhran din tura hmalak a nih dan : Hun a lo kal zel a, hlim lamna chuan mi tam tak thinlungah hnathawkin, Pathian thlarau thianghlim chuan mite rilru a hneh zel a. Chutiang a nih avang chuan Kohhran (Baptist) pakhata awm ho reng chu a rem ta lo va, kum 1958 atang chuan hlimna duh ho chu a hrangin, Pu K. Biakkunga Inah an inkhawm ta a. Thlamuang tak leh lungsi takin inkhawm hranna huaihawt a ni a, UPC a la ding lo va, mi hlim leh hlim loho (Baptist) tih kha inhriat hran dan chu a ni mai a ni. P. Lalbuka, Baptist Thalai hruaitu leh zaipawl hruaituin fiamthu ti takin, “Hlim loho han nih ringawt mai chu, kan chan chu a hnuai deuh a va ang ve,” a tih hi a hun lai chuan a dik viau ni awm tak a ni. Pawl hming pawh nei lovin, ‘Hlim sang pawl’ ti-a sawi an ni thin. Pentecost nia Thlarau lo thleng, Kohhran ding tir ang khan, rilru hmun khat puin, lungrual takin, Pathian thlarauvin a tawngtir ang zela tawnghriat loha tawngna nen, hlim takin hun an hmang a, hmun dang atangin tlawhtute an lo kal ve zel bawk a, tawngtai te an uar a, ‘Lalpa’ an tih fo thin avangte pawh a ni ang, hmuhsitna tawngkam tak in ‘Pa pawl’ tia hriatte pawh an ni.

Kohhran ( UPC) a lo ding ta : Pathian hriatpui an nih avangin zuih ral mai lovin an lo pung zel a, Kum 1959-ah UPC Pastor Zahlira, Pathian tirhin a lo kal a, mi hlimte nen chuan an inkawm khawm a, Pathian thu an sawi ho a, Isua Pathianna te, Isua hminga Baptisma chan te, Thlarau hlimna te, Thlarau thil pek hrang hrang te an sawi ho a, Mizoramah thlarau fate humhalhtu UPC Kohhran an awm thu te, Pastor Zahlira chuan a sawi a, mi hlimte pawh chuan zawmpui nei loa awm reng ai chuan, UPC Kohhrana awm chu an lungrual tlang ta a. Tichuan, Isua hminga Baptistma channa hmasa ber chu a lo awm ta a, mi 10-in Pastor Zahlira kutah Baptisma an chang nghal a, chungte chu :
1. Pu P. Hranghlira 2. Pu K. Biakkunga 3. Pu Hrangkhuma
4. Pu Reia 5. Pu Chalhlinga 6. Pu Rualchhinga
7. Pi Vanthangpuii 8. Pi Siakengi 9. Pi Darhliri
10. Pi Liani te an ni.

Ni 9.9.1959-ah Pastor Zahlira chuan Kohhran form nghalin, Pukpui-ah chuan United Pentecostal church (UPC) chu a lo ding ta a ni.

Hruaitu hmasate :
1. Upa K. Biakkunga 2. Upa P. Hranghlira 3. Upa Chalngura
4. Upa Zathianga 5. Upa Haukhama

Rawngbawltute :
1. Biakchhunga 2. Sapnghaka 3. Biakliana 4. Biakkima 5. R. Darhmingthanga

Church Board member :
1. Pu Chhuna 2. Pu Reia 3. CZ. Rawngbawla 4. C. Saikhenga 5. Taibawnga 6. Pahlira 7. J. Thansanga

Biak In neih hma zawng chu Upa K. Biakkunga Inah an Inkhawm a, member an pung chak em em a, a kum leh 1960-ah chuan member 300 lai an tling hman a ni.

Pukpui khua hnawh darh a ni: Pukpui hi sipai thut hmun a nih avangin, kum 1966-a rambuai kha a tuar nasa ber khua an ni awm e. Vai sipaiin Pukpui in zawng zawng an hal vek a, Pukpui khua chu tuna BSF hmun pheiah sawn 1967 - 1968 chhung, kum 2 chiah an awm leh a, Zotui-ah (Pukpui khaw luh tirh) Biak in, thingtuai renin a chung rangva hlui, mei kang ut thual tawh hmangin sak leh a ni a, an hlim viau zel mai.

Ni 19 January, 1969 (Sunday) zing inkhawm laiin, sipaiin khaw laiah mipui an khalh khawm leh vek a, Zobawkah chhungkaw 28 phurh phei an ni a, a tuk Ni 20 January, 1969-ah, a bakte chu an in thiatin khaw hrang hrangah Pukpui chu an awm darh ta a. Rambuai kan tawrh avang hian kum 1969-1972, kum li chhung chu Pukpui UPC tih chu a reh ta rih a ni. Mahse Pukpui khua hi luah leh rinna lian tak a awmvangin, Pukpui UPC Committee chu a la ding reng a, a remchan dan ang angin Committee an nei fo thin a ni.

Rambuai te a reh hnu, Ni 19.10.1972 khan Pukpui khaw thar hi luah a ni a, kum 1973-ah mi tlem te-in Kohhran chu din leh nghal a ni a, member 90-a bul tanin, a kum leh 1974-ah chuan member 224 zetin an pung leh nghal a, Biak In sak hma chu Pi Darhliri Inah an inkhawm thin a ni.
Kum 1973-1974-a kohhran hruaitute chu :
Chairman : Evan. K. Biakkunga
Secretary : Pu. Ronghaka
Treasurer : Pu. R. Lalthuama
PRZ Treasurer : Pu. R. Lalthuama
Vice Chairman : Pu T. Lalsanga
Asst Secretary : Pu C. Lalkima
Rawngbawlrute : Pu CZ. Rawngbawla, Pu K. Biakchhunga, Pu R. Lawmzuala, Pi Danziri.

Biak in neih dan leh sak chhoh dan: Pukpui hmun hluia Biak In sak thu:
A din tan tirh atanga rei lo te-ah member hi 300 lai an tling nghal ta mai a. Tuna Pukpui hmun hlui UPC Biak in hmun hi Biak in hmun atana pek a ni a, thingtuai banin bawk te-in sak phawt a ni a, an peih thuai mai. 1961-ah thing zaia tuak a ni a, Group te insiamin thingzai ren pawh rei lo te chhhungin sak a ni leh thuai a, 1962 kumah a dung feet 40, a vang feet 25-in sak a ni a; USA atangin Missionary EL. Scism a lo kal a, Pukpui a rawn tlawh a, Biak in chung rangva leina a pe leh ta mai a, rangva chung Biak in a lo awm ta a ni. (Pukpui khaw hluia Biak In hmun hi Centenary Lungphun thlang, kawng kual zau lai Eucaliptus thing awmna mual tawp lai hi a ni).

Pukpui khawthar-a Biak in sak thu :
1. 1975-ah thingtuai banin a bang dap, a chung di-in sak a ni a, Ni 13.4.1975 (Sunday) ah Bialtu Pastor Rev. H. Chalchhunga’n a hawng.
2. 1976-1977 kumah a dung ft. 40, a vang ft. 25 thingzai renin a bang Tile-a sak a ni a, Bialtu Pastor Rev. H. Chalchhunga’n Ni 26.6.1977-ah a hawng.
3. 1994 September thla atangin Concrete-in a dung ft. 70, a vang ft. 36-a sak tan a ni a, Cement that tawk loh avangin repair leh a ni a, 2008 kumah sak zawh a ni a. Rev. R. Lalrosanga, District Superintendent-in a hawng a, Kum 2014 vel atang khan a hnung lamah hian 12 ft-a zawm leh a ni. Tuna Biak In len zawng chu 82 ft x 36 ft a ni.
4. Kum 2020 atangin Biak in thar sakna atan hian Building Committee din niin, thawhlawm khawn a ni a, hmalak chhoh mek zel a ni. Tunah hian Biak in RCC a sak chu luah a ni ta a ni.

Biak in lungphum hi Rev. C. Darkhuma chuan a phum a, Biak in lungphum ni hi Ni 8.11.2022 a ni. Biak in sakna atan hian Nuai 180 vel hman a ni. Biak in hi Ni 8.11.2025 khan hawnna hun neiin, Rev. H. Rothuama, Bialtu Pastor chuan a hawng. Ruai nen ropui takin hun hman a ni. Biak in len zawng, a dung feet 86 a ni a, a vang hi feet 53 a ni.

Tun dinhmun : Pukpui Local hi tun dinhmunah hian member 821 (kum 2025 report) ah an awm mek. Upa - 11, Licence Holder - 6, Sr. Upa - 3, Rawngbawltu - 9 an awm mek. LAD member - 188, PYD member - 256, PCD member - 174, PMD member - 94 an awm mek bawk.

Kum 2025-2026 chhunga Kohhran hruaitute : Chairman : Rev. PC. Nghakliana
Vice Chairman : Upa PC. Lalduhthlanga
Secretary : Rbt. C. Lalrosanga
Asst. Secretary : Upa R. Zoramchhana
Treasurer : Upa T. Lalzidinga
Statistician : Rbt. P. Samson Vanlalfela