COLLEGE VENG LOCAL CHANCHIN

College Vêng Local UPC Kohhran hi Ni 2 February, 1986 atanga Vênglai Local atanga in dang kan ni a. Hemi hma lam zawngah hi chuan Vênglai Local-ah lawiin kan vêng hming pawh hi College Vêng tih a la ni lo va, Bazar-II tih a ni thin.

KOHHRAN DIN TURA BUL TAN A NIH DAN :
Bazar-II (tuna College Vêng ni ta)-ah hian Kohhran pathum - UPC, Seventh Day leh Salvation te hian Biak In kan neih ve loh avangin vêng dang, Vênglai leh Chanmari-ah te kan lawi darh a. Keini UPC Kohhran te chu Vênglai-ah kan lawi thin. Hun eng emaw chen kan inlawi pawlh hnuin mahni-a in dan duhna kan lo nei ve ta a. Vênglai atanga kan in dan tak tak hma hian Bazar-II UPC tih hming hian vawi kua (9) dâwn lai mai Committee neih a ni. Ni 24 January, 1985 (Thurs) zana member 22 kal khâwm te chuan Kohhran hruaitu thlan lailâwkna (Acting-a hruaitu thlanna) an nei a, hetiangin - Acting Chairman : Upa PC. Biakmawia, Acting Secretary : Upa H. Hrângmuana, Acting Treasurer : Upa PC. Ngûrtâwna te an ni.

BIAK IN HMUN KAN NEIH DAN:
Biak In hmun neih dan chungchânga Upa H. Hrangmuana thu ziak hi han târlang ila : “Church Board Committee (Acting Committee) kan nei a, UPC Bazar-II hian Biak In hmun i dîl ve ang u, Biak In kan neih loh chuan Kohhran an rêm mai ang,” kan ti a. Biak In hmun dilna te kan siam ta a. Pu Lalhmingthanga, Revenue Minister (PC Minister) lo kal lai a ni hlauh mai a, a thlen Inah Upa PC. Biakmawia nen kan zuk kal a, recommend kan dil a ni, ani chuan min recommend ta a, kan lawm hle. VCP Pu K. Biaksânga hnênah Recommend kan dil bawk a, ani chuan, “In Biak In hmun dilah hian kawng a kal dâwn a, chuvangin, ka recommend thei lo che u,” a ti a. Revenue Office Lungleiah chuan kan theh lût ta a. Pu Vannâwla C.A.-in, “In Biak In hmun dilna pawh Revenue Aizawl a thleng tawh a, in hmu mai thei a, in hmu lo mai thei bawk. A chhan chu nangni Biak In hmun dilnaah khan Minister Lalhmingthanga Recommend-na chauh a awm a, in vêng VC recommend-na a awm ve lo tlat mai. Pu Thangzâwna, Chhipphir khuain a dil ve a, a dilnaah Pu Hminga Recommend-na bâkah in vêng VCP Recommend-na a awm bawk a, in tluk lo mai thei,” a ti a. A kâr hnihnaah kan hmuh loh thu leh Pu Thangzâwna, Chhipphir khuain a hmuh thu kan han hria chu rilru a na duh hle mai. Sorkar a lo inthlâk hnuah Biak In hmun tur chu dil that leh a ni a. Pathianin Congress Minister, Revenue changtu Pu Vaivênga hmangin min pe ta a, kan va lawm teh lul em! Lalpa chu fakin awm rawh se. Biak In hmun kan hmuh ni hi Ni 16 January, 1985 a ni a, dilna kan theh luh nî hi kan hmuh nî a ni.

Chutia Biak In hmun kan hmuh tâkah chuan a laih hnatlâng hmasa ber chu Ni 6 February, 1985-ah mi 17-in thawh tan a ni a (Hnatlângte chu – Pathiauva, H. Hrângmuana, PC. Biakmawia, PC. Ngûrtâwna, Rualthankhûma, PC. Vanlalsâwma, Tv. Lalhmingthanga, Vanlalruati, P. Vankûngi, Bualchhûngi, Chalkhawli, Nuthangi, Nunthari, Nuntluangi, Muantei (Lalmuansangi), Chuaubuangi, Lalrinzuali te an ni.) A hnuah Petromax chhiin inkhawm loh zanah kan lai thin a, kan phur bawk a, kan lai zo thuai a, sak kan duh ta mai a. Sum lamah kan harsa si a, Acting Church Board Committee kan nei a; kan Biak In hmun tuna mi hi kawngpui thlang a ni a. “Lamlian kawngthlang hi hmun hnihah then ila, i hralh ang u,” kan ti a. Haulawng khua mi pahnihin an lei ta a.

A man chuan thingzai te kan trip a. Kan la sak hmain Pu Lalmawia Haulawng khua, kan Biak In chhak leitu chuan ‘Pata’ a duh tlat mai a. Revenue Office-ah kan han kal ta a. Officer Pu Kapliana chuan, “Biak In sak nan chauh ka pek che u a ni a, hralh kan remti lo, kan cancel mai ang,” a ti a. “Ka pu, kan hralh vek dawn hlei nem, Biak In sakna tur chu kan lai zawl duai tawh a. Biak In ram chin chu awih pang thui tak thleng khi a ni dawn a. Kan rethei si a, thawhlawm atang ringawt chuan engtinmah kan sa thei dawn lova, khawngaih takin min hre thiam hram teh,” ka ti a. Pu Kapliana chuan, “Biak In bula In awm hi kan rem ti lo, Biak In atanga mi thawm hriat theih hi a tha lo,” a ti leh a. “Ka pu, Loan lakna chi chauh a ni a, In han sakna em chi a ni lo, a bir lutuk,” ka ti a. Ka ngenna chu min phalsak ta a ni. Tichuan, Venglai kan lawinaah in dan te kan han dil a. VC hran ram tea awm kan nih avangin ui hle chungin min phalsak ta a ni,” tiin.

COLLEGE VENG (BAZAR-II) KOHHRAN A PIANG:
Biak In hmun tur te neih a lo nih takah chuan Ni 21 January, 1986-ah Bazar-II UPC Joint Committee neih niin Kohhranpui, LAD leh PYD, mi 21 kal khawmte chuan Kohhran In dan chu an rel ta a. Ni 2 February, 1986 (Sunday) zing dar 10:00-ah inkhawm hranna hmasa ber neiin, College Veng (Bazar-II) UPC Kohhran chu a lo piang ta a. Ni 30 January, 1989 atangin Veng hming pawh thlak niin College Veng tih a lo ni ta a, heta tang hian ‘College Veng UPC Kohhran’ tih a ni chhunzawm ta zel a ni. Ni 2 February, 1986 (Sun)-a inkhawmna hmasa ber hi Government Primary School-ah neih niin, Pukpui Bialtu Pastor hmasa ber Rev. P. Rodawla kaihhruaina hnuaiah Lunglei District Pastor Rev. HL. Ruata’n hawnna a nei a. Ni 2 February, 1986 (Sun) zan atangin Bro. Lalbedinga In hnuai sak zawh hlim, anmahni pawhin an la luah loh-ah chuan inkhawmna neih chhunzawm nghal a ni.

Kan in dan atanga Bazar-II Local Biak In hmasa ber pawh, Ni 8 March, 1986 leh April 1986 chhunga vawi sarih hnatlang neiin, a dung Feet 36, a vang Feet 24-a liana sak zawh a ni ta a. Ni 18 February, 1987-ah Rev. Zalawma’n a hawnna a nei a ni. (2021-a kan Biak In hi a dung Feet 78, a vang Feet 30-a lian a ni) Kohhran In dan atanga Church Board Committee hmasa ber hi Ni 3 February, 1986-ah neih niin member pasarih (7) an ni a, chungte chu : Upa Pathiauva, Upa PC. Biakmawia, Upa H. Hrangmuana, Upa Zanghinga, Upa PC. Ngurtawna, Bro. PC. Vanlalsawma, Bro. Rualthankhuma te an ni a. A tuk Ni 4 February, 1986-ah Bialtu Pastor Rev. P. Rodawla kaihhruainain Kohhran pawh mumal taka form fel nghal a ni .

HRUAITU HMASA TE :
Kohhranpuiah : Chairmana : Upa PC. Biakmawia
Secretary : Upa H. Hrangmuana
Treasurer : Upa PC. Ngurtawna

Missions Department : Director : Upa Zanghinga
Secretary/Treasurer : Pc. Vanlalsawma

Sunday Sschool Dept. : Superintendent : Upa Pathiauva
Secretary/Treasurer : RT. Rozawna

LAD : President : Zasuaki
Secretary : R. Kawlhnuni
Treasurer : C. Chalnghaki

PYD : President : PC. Rokima
Secretary : RT. Rozawna
Treasurer : Biaksangi

Tun dinhmun : College Veng Local hi tunah hian member 422 (kum 2025 report) an ni. Upa -7, Licence Holder - 2, Rawngbawltu - 5, Sr. Upa - 3 an awm mek. He Local member atang hian Pastor Rev. Jerry Lalmuanawma a awm tawh bawk. LAD member - 116, PYD member - 157, PCD member -77, PMD member - 33 an awm mek.

Kum 2025-2026 Local hruaitute: Chairman : Upa V. Lalsiama
Vice President : Upa Lallawmawma
Secretary : Evan. R. Lalnunthara
Asst. Secretary : Rbt. PC. Lalhnehzova
Treasurer : Upa V. Zothanga
Fin. Secretary : Upa H. Lalrohlua
Statistician : Upa C. Vanlalsanga