MUALTHUAM ‘N’ KHUA

Mualthuam ‘N’ khua hi Lunglei to Aizawl, World Bank Road kawngkama awm a ni a. Lunglei atangin 48 Km vela hla a ni. Khaw hlun tak niin, Thingtlang khuaah chuan khaw lian leh nuam tawk tak a ni. Tunah hian In pawh 370 niin, a khaw pumah mihring 1700 vel an awm mek a ni.

KOHHRAN LO DIN CHHOH DAN

Pu Saihnuna leh a rawngbawlpui, a thian ten kum 1961-ah Mualthuam ‘N’ khuaah hian Pathian thuthlung rawn pu lutin rawngbawlna nung tak an rawn nei a. An rawngbawlna chhanah, Ni 17.7.1961-ah UPC chu an din ta a ni. An din tirh hian member 68 vel an tling nghal a ni. Harsatna tam tak karah a din tirh atangin vawiin thlengin Pentecost mei mit tawh lovin, kan la ding chhunzawm zel a ni.

Mualthuam ‘N’ Venglai Local hi a tirah chuan Mualthuam ‘N’ Local UPC tih a ni a. Hun lo kal zelah Electrict Local an lo indan khan, ‘Mualthuam ‘N’ Vengchhak Local’ tiin a hming thlak a ni a, hun rei tak he hming hi a pu a ni. Hun a lokal leh deuh va, khawtlang inrelbawlna dung zuiin, Ni 3 February 2018-ah ‘Mualthuam ‘N’ Venglai UPC’ tih a lo pu leh ta a ni.

HRUAITU HMASA TE

Kohhran a din tirh lai hian, Kohhran member tlem te mah ni ila, Lalpan hruaitu tha tak tak min pe nghal a, chungte chu :

• Chairman : Upa. Taikawla
• Secretary : Upa. Lalhnaia
• Treasurer : Lalziki Sailo

BIAK IN SAK CHHOH DAN

Tuna an Biak in hmun hi Pu Darkhuma (L), Pu F. Zochama pa, Pukpui te chhungkuain, Biak in hmun atan phal taka an pek a ni a, Kohhranhote an lawm hle a ni. Biak in hi an sa nual tawh a, a hawi dan chungchangah an Zawlnei Pu Chhumhanga’n, “Khaw chhak lam hawi tur a ni,” a tih avangin a tir berah, khaw chhak lam hawiin an sa a, Biak in sak apiangin a hawi dan tih danglam a ni thin :

• Biak in 1-na : Kum 1962, Biak in sak vawi khatnaah khaw chhak lam hawia sak a ni.
• Biak in 2-na : Biak in pahnihna hi kum 1969-ah sak a ni a, hemi tum hian Hmar lam hawia sak a ni.
• Biak in 3-na : Kum 1981-ah Biak in pathumna tur sak a ni leh a, hemi tum hian, Ni chhuahna lam hawi tir leh a ni.
• Biak in 4-na : Biak in sak vawi li-na hi, Kum 1991-ah Assam type-in, a hun laia mawi leh tha ve taka sak a ni. Hei hi Hmar lam hawia sak a ni.
• Biak in 5-na : Biak in sak vawi 5-na hi Kum 2008-ah bul tan a ni a. Khaw chhak lam hawia sak a ni. RCC-a sak a niin tuna an luah lai hi a ni. Hemi sak nan hian cheng Nuai sawm leh pasarih (Rs. 17 lakhs) lai an seng a ni.

KOHHRANA THIL THLENG CHHINCHHIAH TLAK TE

Kohhranin buaina a tawh lai : Ni 13.3.1996 (Nilaini)-ah Kohhran chhungkuaah buaina a awm avangin, Biak in khar a ni a. Thu buaiah hnuh luh a ni. Biak in khar chhung hian heng kan unaute Inah hian inkhawm thin a ni :

1. Bro. Zazawna
2. Upa. V. Vanlalngena
3. Upa. PC. Lalzuithanga
4. Rbt. Vanhluna
5. Bro. C. Lalhruaia

He tih lai hi Haulawng biala an beh tawh hnu a ni. Bialtu Pastor chu Rev. PC. Nghakliana a ni a. Hun rei tak Biak inah inkhawm thei lovin an awm a. Ni 9 June 1996 (Pathianni)-ah Interim Order hmuin hun rei lo te Biak in hawn lailawk a ni a. Chumi hnuah Ni 21.1.2000 (Zirtawpni) tlai dar 3:00-ah an Biak in chungchangah Judgement Order chhuakin thu buaiah thiam an chan thu hriat a ni a. Biak in hi hawn mai a la ni lo va, thu buai theh luttute tan appeal-na hun ni 90 chhung pek leh rih an ni. Appeal-tu an awm tak loh avangin, Ni 21 May 2000 (Pathianni)-ah chuan Biak in chu Rev. Zalawma’n hawngin inkhawmna neih nghal a ni.

Ni 22 May 2000 (Thawhtanni)-ah chuan Biak in hawn lawmna leh Pathian hnena lawmthu sawi Chawimawina, sa ruai nen hlim taka hun hman a ni. Hetianga Biak in an luah lehna tura Judgement Order siama tih chhuahsaktu, Pi Lucy-i, ADMJ chungah pawh Kohhranhote an lawm hle a ni. Pathian kaihruaina hnuaiah Kohhranhote chu tluang takin tun hun thlengin an kal chho ve ta zel a ni.

Golden Jubilee : Kohhranhoten an din tirh atanga a kum 50-na (Golden Jubilee) chu tluang taka thleng chhovin, Ni 17.7.2011 khan ‘Golden Jubilee’ lawmna hun hman a ni. Kha tih laia District Secretary, Rev. C. Vanlalena’n Jubilee Lungphun hawnna a han neihsak a, tisa lam ruai nen, thlarau lam ruai nen, he hun hi hlim takin an hmang a ni.

Diamond Jubilee : Pathian hruainain an din atanga a kum 60-na pawh, dam takin Pathianin a hruai thleng leh ta a, Covid-19 hripui len hnu, Ni 17.7.2021 hian an kum 60 (Diamond Jubilee) tlin lawmna chu hlim takin an hmang a ni.

TUN (2025) DINHMUN LEH HRUAITUTE

Tun (2025) dinhmun : Tunah (2025 ah) hian Pentecost Kohhran hi chhungkua 33, member 146 an awm mek a ni.

2025-2026 Kohhran hruaitute :

• Chairman : Upa V. Vanlalngena
• Vice Chairman : Rbt. A. Lalramzuava
• Secretary : Rbt. R. Lalrozuala
• Asst. Secretary : Rbt. H. Lalchawimawia
• Treasurer : Rbt. ZD. Kaptluanga
• Fin. Secretary : Rbt. R. Lalmuanpuia
• Statistician : Upa PC. Lalzuithanga