CHENGPUI LOCAL KOHHRAN CHANCHIN

Chengpui khuaah hian, hun hmasa lamah Kohhran lo ding tawhin, Kum 1961 vel khan Pastor Zabuaia te hovin nung takin Kohhran an lo kaihruai tawh a. Hun lo kal zelah Rambuai avang leh khaw sâwi khâwm avang te-in, an tia-vai zo tawh a, Kohhran ang chuan ding tham awm lovin a awm ta reng a ni. Kohhran ding tawh lo mahse; rei tak chhung chu Pi Biakmawii te chhungkuain an mahni chauhin Pentecost thuthlung an vawng nung tang tang thin a, Zotuitlangah te an inkhawm ngat ngat thin.

KOHHRAN DIN TURA HMALAKNA

Thawh 1-na :
Hetianga UPC Kohhran ding ta lo reng chu, Haulawng bialte hian an vei em em thin a, Bial huap te leh Bial chhung Local hrang hrang pawhin an vei rawn em em thin a, rawngbawlna pawh an lo nei chamchi tawh thin a ni. Kum 2011-ah Haulawng bial Mission Department rorelna chuan ‘Chengpuiah Kohhran din tura hmalak ni se, chutiang tur chuan rawngbawltu rawih ni se’ tiin a rel a. Tichuan, Evan. F. Lalsanglura, Khawhri chu an ruai ta a ni. Evan. F. Lalsanglura chuan, bial mipuite beiseina hre rengin thahnemngai takin rawng a bawl a. Kum khat dawn, March - December 2011 chhung a awm chilh hnuah, Kohhran a din tak mai loh avangin, nasa leh zuala rawngbawlna lama inbuatsaih na ni pah fawmin, Pathian thu zir turin Shillong lamah a kalsan ta rih a ni.

Thawh 2-na :
Evan. F. Lalsanglura chuan Bible School te a lo zir zawh leh tak hnu chuan, a rilrua nung reng, Chengpui khuaah chuan August ni 17, 2015-ah tuma rawih lohvin, rawngbawl turin a ma sum sengin a lut leh ta a ni. Thahnemngai taka a rawngbawlna tih chak a, Crusade-a hmalak chhunzawm a nih theih nan, District Mission Department chuan Rs. 3,000/- a sanction-sak a, chumi hmang chuan a thiante, Evan. H. Lallawmsanga a chah lut a, ani hi Evan. PC. Lalremruata’n a rawn tawiawm bawk a. Tichuan, Evan. H. Lallawmsanga chu Main Speaker-a awmin, an thianho chuan theihtawp chhuahin rawngbawlna chu an han nei chho leh ta a. An rawngbawlna pawh a tla tha hle a ni. Tichuan, Ni 24.8.2015 (Thawhtanni) zanah chuan Rinnain Baptisma khur an hawng ta a. Hemi tum hian Lalpa hnathawh ropui tak a lo lang ta. Tumah chang tura insawi lawk awm si lo kha, mi 9 (pakua) laiin Evan. F. Lalsanglura kutah Lalpa Isua hmingin Sual ngaihdamna Baptisma an chang ta a. Thlarau thianghlim dawng thar te, Damna chang nghal te an awm ta nawk mai a, boruak pawh a tha hle a ni.

KOHHRAN DIN LEH BIAK IN SAK THU

Kohhran a ding ta :
Hetianga Kohhran member eng emaw zat kan lo neih takah chuan, hetih hun laia Lunglei District Superintendent ni lai, Rev. C. Darkhuma leh Haulawng bialtu Pastor, Rev. C.Hmingthanfala te chu kal vatin, Ni 25.8.2015 (Thawhlehni) zanah chuan Chengpui khuaa Pentecost mei mit tawh chu chhi alh thar lehin, ‘United Pentecostal Church (NEI), Chengpui Local’ chu din a lo ni leh ta a ni. Hemi zan hian member 9 (pakua) an ni a. Local Church anga Form rih lovin, Preaching point-a dah rih a ni. Tichuan, hun lo kal zelah, Ni 3 January 2016-ah Local Church Puitlingah Bialtu Pastor, Rev. C. Hmingthanfala chuan hlangkaiin hruaitute pawh a form nghal a ni.

Kohhran din a nih hnu hian, District lam thurawn angin Haulawng bial Mission Department chuan Evan. F. Lalsanglura chu September 2015 atangin a ruai chhunzawm leh ta a ni. January 2016 atangin Haulawng bial Mission Department chu District Mission Department-in chhawkin, Missionary a rawihsak ta a, vawiin thlengin Home Missionary-in an la thut chilh ta reng a ni.

Biak in tun din dan :

• A hmun thu : Chengpui khuaah Kohhran a lo din takah chuan, Biak in neih a nih thuai theih nan District lam hotuten theih tawp an chhuahpui a, District Board vawi 82-na chuan, ‘Hotuten a hmun tur lo enpuiin hma lo la se la, a tul angin lo lei mai sela’ tiin a rel a. Tichuan, Pu Thangliana in hmun chu a in ding lai chawpin Ni 11.12.2015-ah Rs. 1,00,000/- velin inlei fel a ni ta a ni.
• Biak in sak thu : A hmun te lei fel a nih hnu chuan, Lunglei District UPC-in ‘Kohhran ding thar chu Biak in saksak tur’ tih dana kan neih angin, District-in sum a sanction sa hnuaiah sa tura inbuatsaih a ni a. Tichuan Ni 17.2.2016-ah Rev. C. Darkhuma’n Biak in Lungphum a phum a, Bial chhung mipui ten an phurpui bawk a, kar lovah a ban RCC, a bang Tile, a chung Rangva-in kan sa peih ta thuai a. Ni 29 May 2016-ah Biak in chu luah luh a ni ta a ni.
• Home Missionary Quarters sak a nih dan : Biak in sak rual hian Home Missionary Quarters tur rel pah a ni a. Quarters hi District Mission Department leh Bialchhung local hrang hrangte leh mimal inpekna tlingkhawma sak a ni. Bial Mission Department Director, Upa Zamawia kaihhruaina hnuaiah Bial chhung Local hrang hrang ten, a inchawkin hnatlanga sak a ni.

KOHHRAN HRUAITU LEH MISSIONARY TE

Kohhran hruaitu hmasate (Church Board Office Bearer) :

• Chairman : Evan. F. Lalsanglura
• Secretary : Bro. R. Lalngaihsaka
• Asst. Secretary : Bro. R. Lalhmingsanga
• Treasurer : Evan. F. Lalsanglura
• Sawma Pakhat Treasurer : Evan. F. Lalsanglura

Home Missionary Awm tawh te :

• Evan. F. Lalsanglura : September 2015 – December 2018
• Evan. Simona : January 2019 – December 2020
• Evan. K. Lalhlupuia : January 2021 – till date

2025-2026 Kohhran hruaitute :

• Chairman : Evan. R. Lalrokhawma
• Vice Chairman :
• Secretary : Upa Pachunga
• Assistant Secretary :
• Treasurer : Evan. R. Lalrokhawma
• Statistician : Rbt. Lalthlamuana

TUN DINHMUN (2025)

Tunah (2025 ah) hian Kohhran hi chhungkua 7, member 30 an awm mek a ni.