MUALTHUAM UPC DIN DAN

Kum 1961 hma lamah, Mualthuam ‘N’ khuaah U.P.C a la ding ngai lo va. Rev. Saihnuna leh a rawngbawlpui te, Pi Lalchhumi, Pi Ngaihthangi, Pi Lalthlamuani (L), Pi Rothangi leh Pi Vanngengi (L) Pukpui khua vekte chu Ni 23 July 1961 (Inrinni) ah Mualthuam ‘N’ an rawn lut a. Ni 24 July 1961 (Pathianni) an cham a. Pathianni chawhma-in an inkhawm lo va, chawhnu-ah Mual Inkhawm an nei a, Baptisma chang an la awm lo.

Ni 25 July 1961 (Thawhtanni)-ah zingkarah Baptisma chang an awm ta a. U.P.C Kohhran din a lo ni ta (Hei hi Rev. Saihnuna tawngka ngei kan dawn atanga ziah a ni). Kohhran hruaitu - Chairman hmasa ber chu Pu Taikawla a ni. Heta tang hian vawiin thlengin Pathian zarah Pentecost Kohhran chu khaihlak awm lovin a ding chho ta a ni. Tuna Venglai Biak In hmunah hian Biak In, a chung rangva (District pek) a bang dap, a Skirting thingphel hmanga theih ang tawka thain sak a ni.

MUALTHUAM ELECTRIC LOCAL DIN DAN

Mualthuam ‘N’-a U.P.C Biak In chu theih ang tawka din nimahse; a kawmkar deuh a, mimal In a hnai bawk si a. Skirting a chhe tawh a, vawk leh Ar te an lut thei a. Sak that an tum rilruk mek laiin, hmun dang, mimal in hnaih lo deuh, kangmei chhuah palh pawha him tur zawn a tha lo maw tiin Building Board rorel chuan Church Board-ah a thlen a.

Church Board chuan thu ti tlu mai lovin, Pathianni tukah mipui chhuah darh hma, thawhlawm pawh lilam hma, inkhawm ban veleh inkhawm zawng zawng ngaihdan leh lungrualna thu lak tha a ti a. Chutiang chuan Pathianni tuk hun remchang hmasa berah, Member zawng zawng ngaihdan lak a ni a. A hmun sawn ni se tih chu an duh dan a ni ta.

Biak In hmun tur zawn nghal a ni a. Tuna U.P.C Electric Local Biak In hmun, Pu PC. Challiana Thingpui huan, A puzawn Pu R. Zairema’n, makpa tia a pek chu lei atan an dil a. Lei a phal a, a man atan Rs. 150/- a chhiar a. A man an pek fel ni chuan Rs. 10/- in a lo tlawm (hniam) a, Rs. 140/- in an lei fel ta a ni. Hetih hun laia Building Board hruaitute chu : Pu Sapchhawna, Pu Kapthuama, Pu Sanglawta, Pu Vanthanga, Pu Thanhranga, Pu Dartlaia, Pu Darnghaka, Pu Thanchhunga te an ni. Biak In hmun lei kum hi 1977 a ni.

BIAK IN NEIH DAN LEH SAK TAN DAN

Biak In hmun tur lei fel a ni ta bawk a, Member te an phur hle mai. A hmun laih nghal a ni a. Zanah Laltin leh Pump (Petromax) eng hnuaiah zan hnih hnatlanga laih a ni a. Lei laih an chak bawk a, zan hnih laihah an duh tawk an lai hman der mai. Member te an tho tlang bawk a, Biak In ren tur thing an zai a. Thing zai tur hlawm insiamin an inhnatlan chhawk tlut tlut mai a, Lalpan an tha a tihchaksak a, hah pawh an sawi phal lo.

Ni 9 July 1978 (Pathianni)-ah Local Church Board-in Biak Inah ro an rel a. Local Chairman Upa Vanngaia’n rorel a kaihruai a, rorel No. 2-naah chuan, “Kohhran Thingzai sa, rama la awm lak khawm ni se,” tiin an rel a. Thingzai put hun atan Ni 10 July 1978 (Thawhtanni) an ruat nghal bawk a. He mi ni hian hnatlang an tha hle.

Phur takin Biak In thar sa turin hma an la zel a. Ni 5 September 1978 (Thawhlehni) zanah Upa P. Lalvuana Inah Church Board-in ro an rel a, “Biak In sak tan ni tawh se; amaherawhchu, Church Board chauhin thu ti tlu tlang mai lovin, Building Board leh P.Y.D Committee Member te nen rorel ho ni se. Rorel hun atan Ni 7.9.1978 (Ningani) zan ni sela, rorelna hmun atan Pu Dartlaia In dil ni se. Joint Meeting neih huna Thingpui pâwt nan, Tv. Lalngaihawma’n Bawnghnute lo ngaihtuah bawk se” tiin an rel fel sa thlap a. A hun leh hmun ruat saah Joint Meeting chu neih a ni ta a. Upa R. Laihnuna’n rorel a kaihruai a, Upa K. Lalvuana chu Secretary a ni. Upa P. Lalvuana, Pathian hnenah a tawngtai a. Biak In chungchang chu hetiang hian an rel a ni :

• Rorel 1-na : ‘Biak In hnatlang siam ni se, a hun atan Ni 12 September 1978 (Thawhlehni) ni se’ tiin.
• Rorel 2-na : ‘Ban zawmna tur Thingril chu rawngbawltu inkawp, Thingril nei tura ruatte khan Ni 12 September 1978 (Thawhlehni) hnatlang neih huna hman theih turin neih ni se’ tiin thu an ti tlu bawk.

Ni 12 September 1978 (Thawhlehni)-ah hnatlang neih a ni a, ban an zawm a. Ni 13 September 1978 (Nilaini)-ah Biak In ban phunin an lo tung ding ta a. He mi ni hi U.P.C Electric Local Biak In sak tan ni a nih angin, U.P.C Electric Local din ni atan pawm a lo ni ta a ni.

KOHHRAN HRUAITU HMASATE

• Member zat : 175
• Bialtu Pastor : Rev. Hrangchhina
• Haulawng Bial General Licence Holder : Evan. PC. Lalrosanga
• Upate : Upa R. Laihnuna, Upa R. Lalrema, Upa K. Lalvuana, Upa R. Thanzinga, Upa Lalluma, Upa P. Lalvuana
• Rawngbawltute : Rbt. C. Thantluang, Rbt. C. Thanmawia, Rbt. Thangkima, Rbt. Zairingaia, Rbt. Sapchhawna

Kohhranpui hruaitute :

• Chairman : Upa Vanngaia / Upa R. Laihnuna (Ni 12.9.1978)
• Vice Chairman : Upa R. Laihnuna
• Secretary : Upa K. Lalvuana
• Treasurer : Upa R. Laihnuna / Evan. PC. Rosanga (Ni 12.9.1978)
• Local Pastor : Evan. PC. Rosanga

KOHHRANA THIL CHHINCHHIAH TLAK TE

1. Kum 1978 hian Kohhranhote tisa leh Thlarauvah kan hlim hle a. Krismas ruai buatsaih nan Member-ah target siam a ni a. Kum 12 chin chung lam tan Rs. 4-in intuk a ni. Kum 11 hnuai lam tan Rs. 2/- inkhawn a ni bawk. Tisa ruai tlai leh puar taka theh a ni bawk.
2. Biak In a chung rangva, a bang Thingphel, Skirting rangva, a chung chhawng, Biak In nalh tak din a ni a. Mualthuam ‘N’ Kohhranah Thutthleng nghen chhan neia siam awm chhun kan ni. District huap pawha zahpuiawm lo tak a ni.
3. Hetih hun lai hian General Licence Holder Evan. PC. Lalrosanga, Local Pastor ni mek chu kum thum chhung Shillong-ah Bible School a kal zawh hnuin, Ni 16 February 1980-ah Bialtu Pastor atan lak a ni a, a Bial hmasa ber chu Thenhlum Bial a ni.
4. Ni 3 May 1981 (Pathianni)-ah Church Board rorel chuan, ‘Inkhawmnaah thawhlawm khawn ni se, kan khawn hun tur chu Pathianni zing ni se’ tiin a rel a, thla hnih an khawn hnuah Ni 5 July 1981 (Pathianni)-a Church Board rorel chuan ‘Pathianni zing Inkhawmnaah thawhlawm khawn tawh loh mai ni se’ tiin a rel leh a ni.
5. Ni 21 March 1982-ah duh taka an sak Biak In chu hawn ni se an ti a, a hawngtu tur atan pawh Rev. PR. Dawla, Haulawng Bialtu Pastor ruat a ni a, an hun ruat Bialtu Pastor an hrilh a, an hun ruat hi Bial P.Y.D inhawmpui nen a lo inrual chiah mai a, hun dang an ruat leh a. Ni 9 May 1982 (Pathianni) vawi hnihna chu Biak In hawn ni atan an ruat leh ta a ni. An hun ruatah hian Rev. PR. Dawla chuan a hawng ta a ni.
6. Biak In hming hi U.P.C Vengthlang tih a ni a, chu chu duh lovin Ni 8 August 1982-ah ‘Electric Veng Biak In emaw, Electric Local emaw tih ni se, District hotute hnenah thlen ni se’ an ti a. Amaherawhchu, hun rei tak Local hming thlak lovin Kohhran a la kal zel a. Ni 24 January 1983-ah Bialtu Pastor, Rev. PR. Dawla hovin Local hming tur an rel ho leh a, an thutlukna chuan ‘U.P.C Vengthlang’ tih chu ‘Electric veng/Electric Local’ tih ni se tiin an rel a, heta tang hian ‘Electric Local’ tih a lo ni ta a ni.
7. Kohhranhote Petromax (Pump) leh Laltin (Lantern) eng hnuaiah an inkhawm thin a. Kohhranhoten Electric eng pawh luh an duh hle mai a, sum an nei mai lo va, mimal leh rawngbawltuah sum an intuk a, sumtuakin an inhlawhfa bawk a, theih ang anga an intuak hnuah, Ni 10 January 1983 (Thawhtanni)-ah Electric an pawt lut fel ta a ni.

BIAK IN THAR SAK CHHUNZAWM THU

September ni 13, 1978-a Biak In sak chu rei tak luah a ni a. Kum 1991-a thli na tak tleh chuan, a chhem awn a, do din that leh a ni. May ni 2, 1994 (Thawhtanni)-ah thiah a ni ta a. Biak In thar sak nghal a ni. Biak In hi thla li chhung sak a ni a, thla li chhunga Biak In kan sa zo thei hi Pathian malsawmna leh member-te thahnemngaihna liau liau a ni. Ni 23 July 1994 (Inrinni)-ah sak zawh a ni a, zanah inkhawm nghal a ni. Inkhawm Chairman - Upa K. Lalvuana, Thuhriltu - Upa R. Zairingaia te an ni a. Upa R. Laihnuna leh Upa R. Lalrema ten fuihna thu an sawi bawk. Rbt. R. Lalsawma leh Rbt. R. Ramliana te hun hawnah dingin thu an sawi.

BIAK IN THAR DANG SAK THU

Ni 2.5.1994-a Biak In sak tan, Ni 23 July 1994-a luah chu a lo hlui tawh avangin, Biak In thar Cement Concrete-a sak that rel a ni a. Ni 28 June 2010 (Thawhtanni)-ah Biak In thiah a ni a, Biak In thiah hma hian Upa R. Zairingaia, Local Chairman, Pathian hnenah a tawngtai a, Lunglei District hruaitute hriattir an ni bawk. Biak In len zawng : A dung - 60 ft, a vang - 28 ft, a san zawng - 16 ft.

Ni 4 December 2010 Chawhma Dar 10:00-ah Rev. H. Rothuama, Chhipphir Bialtu Pastor-in Biak In lungphum a phum a, Ni 7 January 2011 (Zirtawpni)-ah Biak In ban phun tan a ni a, kum ruk (6) chhung sak a ni. Chhipphir Bial inkhawmpui kan dawl hun a nih avangin, Biak In thar, tukverh kawngkhar pawh la awm lovin Ni 4 October 2013 (Zirtawpni) zanah inkhawmpui nan luah lailawk a ni a. Biak In saknaa tha lut zawng zawng zat - 2210, Hnatlang neih zat - 210, Puihna tha - 27, Sum hman zat - Rs. 19,92,915/-. Tunah hian Sunday School Hall tha leh changtlung tak RCC-a sain, luah luh a ni tawh.

TUN DINHMUN

Mualthuam Electric Local-ah hian member 232 (kum 2025 report) an awm mek a. Licence Holder - 3, Upa - 5, Sr. Upa - 2, Rawngbawltu - 5 an awm mek.

Kum 2025-2026 Local hruaitute :

• Chairman : Upa R. Ramliana
• Vice Chairman : Rbt. Biakkunga
• Secretary : Evan Engzawna
• Asst. Secretary : Rbt R. Lalchhandama
• Treasurer : Upa K. Lalnunzira
• Fin. Secretary : Upa R. Lalthanliana
• Statistician : Upa K. Pazawna