KOHHRAN DIN TURA HMALAK DAN

New Ngharchhip-ah kum 1992 – 1994 vel khan Rev. PC. Doliana hovin rawngbawlna neih a lo ni tawh a, hetih hun lai hian Baptisma changte pawh an lo awm tawh a ni. Nimahsela, Kohhran din tak tak erawh a awm thei lo va; hun a kal zel a, Cherhlun Bial kohhranpui hmalaknain Crusade neih thin a ni a.

Kum 2000-ah Bial hmalakna bawkin Crusade neih leh a ni a, Evan. C. Vanlalena, Haulawng chu Speaker atan hman a ni a, ani hi Bro. Zothanmawia’n a lo tawiawm a. Ni 13.5.2000-ah Cherhlun atangin mi eng emaw zat chhukin Crusade thawh li-na neih tan leh a ni a, YMA Hall-ah Crusade hi neih a ni. Boruak kal hlei thei lovin Crusade hi vawi thum vel chawlh lai lawk te neih a ni a, Ni 13.5.2000-a Crusade tan kha Ni 13.7.2000-ah crusade an tawpsan chauh a ni.

Crusade lai hian Speaker Evan. C. Vanlalena chu debate-pui turin Rualuka chu Burma lam atangin a lo chhuk a, Ni 12.6.2000-ah New Ngharchhip BCM Biak In-ah an debate-a, hemi zan hian a vawi khat nan Baptisma rawngbawlna neih a ni a, mi paruk(6)-in Isua hmingin Baptisma an chang ta a ni.

Ni 10.7.2000-ah Kohhran form a ni ta a, a lawm nan hian Upa C. Lalchangliana, Cherhlun-in vawk a thawh a, Pu Vanlalmuana, New Ngharchhip-in (kan Kohhran ni lo) bawng a thawh bawk a, Pathian hnena lawmthu sawina leh chawimawina hun hman a ni a, Pu Vanlalmuana te inah hian zaikhawmna neih a ni. Kohhran hming ziakna neih a ni a, mi 19-in Pentecost Kohhran-ah hming an ziak ta a ni.

HRUAITU HMASA TE

Kohhran form a niha hruaitu tura ruat te chu heng mite hi an ni :

A. KOHHRANPUI :

• Chairman : Upa Lianmawia
• Secretary : Sis. Neihiangi
• Treasurer : Sis. Zairemmawii

B. MISSIONS DEPARTMENT :

• Director : Khawnghaka
• Secretary : Sis. Neihiangi
• Treasurer : Sis. Neihiangi

C. SUNDAY SCHOOL DEPARTMENT :

• Director : Upa Lianmawia
• Secretary : Sis. Neihiangi
• Treasurer : Sis. Neihiangi

D. LADIES AUXILIARY DEPARTMENT :

• President : Sis. Neihiangi
• Secretary : Sis. Lallawmchhungi
• Treasurer : Sis. Lallawmchhungi

BIAK IN NEIH DAN LEH SAK DAN

Khawtlangin Biak In hmun tur hi an pe thei lawk lo va; District Missions Conference, Rahsiveng-a neihah New Ngharchhip-a Biak In sakna turin thawhlawm khawn a ni a, Rs. 33,000/- lai hmuh a ni. Tichuan, Ni 24.10.2000-ah Pu Lalkhuma, New Ngharchhip in hmun chu Rs. 10,000/- in lei a lo ni ta a ni.

Ni 25.10.2000-ah Biak In hmun tur laih a ni a, Cherhlun atangin mi 30 vel an hnatlang a; Ni 7.11.2000-ah a hmun tur laih zawh a ni a, Rev. R. Lalrosanga’n Biak In lungphum tur hi phumna a nei nghal a, sak chhunzawm nghal niin, Biak In sakna tur atan hian mi thil phal tak tak ten thilpek an pe nasa hle a – Bro. CR. Chuailova, Bazar-in a bang tur tile phek 32 a thawh a, Evan. R. Kawlthuama, Bazar-in tukverh kawngkhar(frame) pair ruk(6) a thawh bawk a. Tin, heng bakah District Kohhranpuiin a chung tur rangva a pek leh mi thil phalte thil pek phurh nan Evan. C. Vanlalduha, Rahsiveng Motor (407) chu hman a ni bawk. Biak In chu sak chhunzawm zel niin Ni 28.10.2001-ah sak zawh niin, Rev. Zalawma, District Superintendent-in a hawng. He Biak In hi 2017 thleng luah a ni.

Biak In pahnihna tur din a nih theih nan Lunglei District PYD Conference Vawi 49-na Zobawk-a neih chuan Home Missions Field-a Biak In sak a rel a, District PYD Board-in rel chhunzawmin New Ngharchhip-a Biak In sak chu a rel ta a. Hemi pual atan hian Conference laiin thawhlawm khawn a ni a, District PYD atangin Rs. 3,00,000/- pek a ni.

Rev. R. Lalrosanga, District Superintendent, Evan. K. Lalnunpuia, District PYD Secretary leh Bro. Lalrindika, District PYD Fin. Secretary te lo kalin, Rev. R. Lalrosanga’n Ni 10. June 2017-ah Biak In pahnihna tur lungphum chu a phum ta a ni. Biak In sakna tur atan hian mi thahnemngai tak tak an tam hle a, District Kohhranpuiin Rs. 1,00,000/- min pe a, a chung kilhna tur Upa Pc. Lalduhthlanga, Pukpui-in a tum bawk a, a Ceiling tur Ramthar Local PYD ten an tum bawk. Pulpit thar hlak Bro. Lalrokima Chhangte (hetih laia Cherhlun Bial-in New Ngharchhip-a rawngbawl tura kan rawih) leh a thian ten an lo tum bawk a ni. Heng bakah hian Work Camp nei turin Bial chhung leh pawn (Thingsai Bial) atangin an lo kal bawk a ni. Tichuan, Biak In sak peih a ni a, Cherhlun Section Conference Vawi 44-na chu New Ngharchhip Local-ah nghah a ni a, hemi rual hian Biak In hawnna neih nghal a ni a, Ni 7 February 2020 khan Rev. C. Vanlalena’n Biak In hawnna a nei ta a ni. Biak In hawnna hun hi khawtlang huapin ruai nen hlim taka hman a ni.

KOHHRANA THIL THLENG CHHINCHHIAHTLAK TAK TAK TE

New Ngharchhip-ah hian thil thleng chhinchhiahtlak ti-a han sawi tur hi tam tak a awm thei ang a, Kohhran a din theih nana hmalak dan te leh a din hnu pawha Pathian kaihhruaina ropui tak tak hmuh tur awm thin hi a ropui hle a, amaherawh chu ziah vek sen a ni lem lo vang. Chung zinga pakhat chu a chunga kan sawi tak, Biak In din a nih chhoh dan kan tarlan te khi a ni awm e. Kan phut leh beisei ni miah lova Pathian hnathawh ropui tak avanga vawiina Biak In (RCC) tha tak mai kan nei ringawt mai pawh hi thil thleng chhinchhiah-tlak leh ropui ber a ni hial awm e.

New Ngharchhip Local hi Local te tak te ni mah ila, Local dang tlawhtu hi kan nei ve thin a; Bial pawn atanga min lo tlawhtu hi Thingsai, Bualpui ‘H’ leh Lungkawlh te kan nei tawh a ni.

TUN DINHMUN

New Ngharchhip Local-ah hian tun dinhmun (2025 Half yearly Statistic Report) ah Member 19 (Mipa 6, Hmeichhia 13) an awm mek a ni.

2025-2026 Kohhran hruaitute :

• Chairman : Upa MC. Lalnikunga
• Secretary : Rbt. Neihiangi
• Treasurer : Rbt. RL. Lalzikpuii
• Statistician : Rbt. Neihiangi