Phairuangchhuah Khua hi Zawlpui bial chhung, Putlungasih atanga khaw thlang lam 5 Km-a hlaah, Kauchuah paltlanga awm a ni a. He khua hi Isua Kohhran (IK) ten kum 22 chhung an lo enkawl tawh khua a ni a. He khuaah hian Sowrkar Building nen in 48 bawr vel an awm a ni. Chung zingah chuan Chakma Baptist Church (CBC) hi Chhungkaw 1 an awm a, Buddish chhungkua 1 an awm bawk a, mimala Khristian-a inpe duh lo pawh hi an awm ve nual bawk a, chung tih loh chu IK Kohhran vek chu niin, an Missionary-a thawk mek Pu C. Lawmsiama enkawlna hnuaia awm an ni.

Kum 2023 kum khan Zawlpui Bial Kohhranpui, kum chanve Board July thlaa neih chuan, Phairuangchhuah hmunah hian Kohhran din tura hmalak a, rammut ni se, rammut pawh Bialtu Pastor, Pastor R. Lalremsiama kutah dah ni se tiin a lo pass a. He rorelna bawhzui hian July ni 24, 2023 khan Phairuangchhuah hmunah hian Bialtu Pastor te Chhungkua leh Upa Thantluanga (Belthei Local) leh Sis. Rinzaui (Putlungasih Local) te chu kalin, ram te zuk thlithlai a, Kohhran din theih a ni ang em tih te zuk thlithlai turin an thleng thla a. Hemi hnu hian Bialtu Pastor leh Bial Secretary Upa Andrew Lalremsanga te chu Ni 12 January 2024-ah an zuk kal leh a. Khu lai hmuna IK Missionary leh an puipate nen, zuk inkawmin, IK Kohhran lam hian nghak leh hlek turin an lo ngen a, amaherawhchu rammut phawt mai Bialin tha nia a hriat avangin, Ni 27 January 2024 hian rammu turin Bialtu Pastor hovin mi 5 an zuk rammu ta ni.

Hemi tuma rammute chu Pastor R.Lalremsiama, Upa Lalthantluanga, Bro. Lalramthabeiseia, Upa Andrew Lalremsanga leh Upa David Lalchhuangliana te an ni. Hemi tum rammutah pawh hian IK Kohhrana an puipate leh an Missionary te nen pawh meeting te neiin, UPC Kohhran din tha tih tlan a ni a. Amaherawhchu, IK Kohhran lam hian an Assembly Rorel te ngaichang leh rih phawt tur ten, kan rammute an ngen leh a. Chuvang chuan hawsan leh rih phawt a ni a, nimahsela IK lam hian hun eng emaw chen ngaihchan an nih hnuah pawh, thu engmah rawn nei lovin, anmahni Kohhran lamah an lo insawh nghet a ni tih te hriat zui a ni ta a. Chutiang a lo nih tak avang chuan, IK Kohhran lam thu chhuak ngaichang tawh lovin, Ni 30 December 2024 khan Phairuangchhuah hmunah hian Kohhran din turin Bialtu Pastor leh Bial Secretary te leh mi dang 2 te chhuk thlak a ni leh ta a, hemi tum hian Pastor R. Lalremsiama chuan chhungkua 13, member 59 lawm luhna a nei a, Kohhran hi din a ni ta a ni. Hruaitu tur te hi adhoc-a ruat niin heng tiang hian ruat an ni :

Lunglei District Kohhranpui hnen atangin Phairuangchhuah hmuna Kumthar hmanna tur, sum leh pai kan dawn tak avangin Kumthar zuk hmanpui turin Putlungasih hmuna kan Home Missionary, Evan. Lalhriatmawia chu tih a ni a, a ni hian member 15 lai a zuk lawm lut leh bawk a, Phairuangchhuah hmunah chuan Kohhran din a ni ta a, member 74 lai kan lo ni ta a ni.

Hetianga Kohhran a lo din hnu hian, kum 2025 District Missions Conference, Chawngte Local-ah neih a ni a. Hemi tum District Missions Board thu khawm chuan, District Missions Field atan Phairuangchhuah chu hawng chhunzawm nghalin, hemi tum vék hian Phairuangchhuah Field-a Home Missionary hna thawktu atan Rbt. Pc. Laldingliana, Mualthuam ‘N’ Electric Local-a lawi chu lak nghal a ni bawk. Hmalakna kal chho nghal zelin, Lunglei District-â kan hotu ten, a hmun te min en fiahsakin Rev. PC. Lalfakawma, District Secretary, UPC Lunglei District chu rawn kalin, ram te a rawn en fiah a. Hemi hnu hian District Board chuan Phairuangchhuah hmunah hian ram zau tha tak mai, Kohhran hmun hma atan Rs. 1,50,000/- in a lei a, a hmun te lei fel a nih hnu hian, District Missions Department chuan Phairuangchhuah hmuna Home Missionary Quarters sakna atan Rs. 80,000/- rawn sanction nghal bawkin, Zawlpui Bial Missions Department leh Pastor R. Lalremsiama, Bialtu Pastor te kaihhruaina hnuaiah, Bial mipui ten Work Camp zuk neiin, kar hnih chhung sak a ni.

Phairuangchhuah hmun hi a Location-in a zir tawk loh avangin, bungrua leh in sakna hmanrua thlengin transportation a khirhkhan hle mai a, hei vang hian sum leh pai lam pawh kan indaih lo ta viau mai a, rilru buai taka hun kan hman laiin Headquarters Local, Missions Department te hnen atangin Quarters sak tanpui nan Rs. 20,000/- min rawn pe hlauh mai a, chu mai bakah District Missions Department-a kan dil belh Rs. 10,000/- kan hmu leh bawk a. Lawm takin Quarters pawh kan han pum thei ta a, Quarters hi 16X27 feet-a zau, Assam type, a chung rangva, a bang tile leh a chhuat thingphel hmanga sak a ni. Quarters sak lai hian zanah te, Mual inkhawm te neiin hun hman thin a ni bawk.

Hetih hun laia UPC NEI-a kan General Missions Director Rev. C. Vanlalena chuan, Australia lama Melbourne UPC te hnenah Phairuangchhuah hmunah Kohhran din a nih avang hian, thawktu rawihsak turin Melbourne UPC te min ngensak a, ani zarah hian Phairuangchhuah hmuna thawktu lawman, kum 1 chhung an rawn tum a, chu mai bakah Melbourne UPC-a kan rawngbawlpui, Pu PK. Chinzah hnen atang ten Crusade fund Rs. 12,000/- kan dawng bawk a. Tin, Quarter sak zawh a nih rual khan, Quarter Property leina turin Rs. 50,000/- leh thawktu tuam hlawm nan tiin, Rs. 10,000/- an rawn thawn leh a. Heng zawng zawng kan hmuh theih nana theih tawp min chhuahsaktu Rev. C. Vanlalena, General Missions Disrector chungah hian kan lawm tak meuh meuh a ni. Amah leh Melbourne UPC te pawh, Lalpan mal a sawm zel ang tih kan ring tlat a ni.

Quarters te peih fel a nih hma hian thla 3 chhung chu, Home Missionary Rbt. Pc. Laldingliana hi Zawlpui Pastor Quarters atangin Phairuangchhuah hmun hi a va vil thin a, zan riak te, lang ten a vei vak reng thin a, Quarters sak peih a nih hma hian mi thar tum hnih lai lawm luh a ni leh a. Chhungkaw hnih, an vaiin mi 8 lawm luh an ni. Quarters peih a nih hnu hian, Home Missionary pawh Bial Missions Department hruaitute leh Bialtu Pastor te nen, bial mipui thenkhat ten zui bawkin Quarters thar hi May ni 7, 2025 khan a luah lut ta a ni.

Quarters te peih a nih takah chuan, theih tawp chhuaha rawngbawlna neih chhunzawm zel niin, Member thar nei tur leh kan member-te, sawh nghehna kawngah theih tawp chhuah chhoh zel a ni a, Tin, Biak in sa tura ruahmanna hi hmalak chhoh mek zel a ni bawk a. District Kohhranpui hnen atangin sum leh pai Biak In sakna tur pawh, Bialtu Pastor kutah a awm tawh a, a rang thei ang bera Biak in pawh neih a nih thuai theih nan hmalakna kalpui mek zel a ni bawk a ni.

Tunah hian Phairuangchhuah Local-ah hian, report siam lai (kum 2025-ah) hian Member 86 kan awm mek a ni.

Biak in pawh Rev. C. Lalrintluanga, District Superintendent-in Ni 31.10.2025 khan a lung a phum a, Work Camp leh hnatlang hmanga sak niin, a dung leh vang hi Feet 38/15-sak a ni.

2025-2026 Kohhran hruaitute :