Lungchem khua hi Lunglei atanga hmar thlang lam 62Km-a hlaa awm a ni. Thingtlang khua lian vak lo, In 90 bawr vel awmna a ni a, tunah chuan pem chhuak an tam tawh avangin, In 80 bawr vel an ni tawh a ni.

UPC KOHHRAN DIN HMA :

Pentecost Kohhran a din hma hian Lungchem khua hi Baptist Kohhran hlang an ni. District PYD hmalaknain kum 1984 khan Evan R. Pakunga, Evan R. Lalrosanga leh Evan B. Kapmawia te, rawngbawl tura tirh luh an ni a, hemi atan hian Upa K. Lungmuana, Zohnuai Local a mi chuan Rs. 3,200/- (Sangthum leh zahnih) a thawh a ni. Dodalna a nasat avangin Kohhran din a ni lo.

Dt.17.9.1988-ah Sertlangpui Local-in rawngbawlna an nei leh a, Kum 1989-ah Pukpui Local ten rawngbawlna an nei bawk a, Kohhran chu a ding thei ta chuang lo a ni.

Dt. 26.1.1990-ah Evan R. Lianzuala chu District PYD ten rawngbawl turin an dah a, rawngbawlna neiin UPC lo ni tawh sa te hui khawm hna a thawk bawk a, ani kaihhruaina hnuaia UPC lo ni tawh sa te chuan inhmuh khawmna te neiin inkhawm hrang tham kan awm ve tawh alawm tiin inkhawm hran an rel ta a ni.

Dt. 1.4.1990 Good Friday hmang pahin Bro. P. Lalhunthanga te Inah inkhawmna neih tan a ni.

KOHHRAN DIN HMA LEH DIN DAN :

District hriatpuia Kohhran hi din la ni chiah lo mahse; Inkhawmna te kan neih ve takah chuan Lungchemah UPC Kohhran dinin a awm ve ta tih vantlang hriat kan lo ni ve ta a. Inrinni zan, Sunday zing leh Sunday zanah te inkhawmna kan nei ve ta zel a ni. Biak In kan mamawh ve avangin a hmun tur, Evan R. Lianzuala’n VCP, Pu Biakthanga a dil a, ani'n hmun laili lai tak (duhthusamin zau lo mahse) min pe ta a, a chungah kan lawm hle. Biak In hmun tur kan neih takah chuan a hmun laih zawl a ngai a, hnatlanga laih thin a ni a, Baptist Kohhran thalai ten min laihpui thin a ni.

THILPEK CHUNGCHANG :

Biak In sak te kan tum ve avangin sum eng emaw zat kan mamawh a, kan mamawhna te hriaa hmangaih thilthlawn pek kan dawnte hi a ropuiin a hlu em a, sawi hmaih chi niin kan hre lo va, a hun leh ni erawh ziak vek a buaithlak deuh avangin hetiang hian a hlawmin dah mai ila, a tha ang e :Kum 1990 chhunga Biak In sak nana kan pawisa dawn dan chu :

1. Sertlangpui Local : Rs. 352.55/-
2. Chandmary Local (Hqtrs tih a nih hma) : Rs. 1932.65/-
3. Venglai Local (Lunglei) : Rs. 1194.00/-
4. Rahsi Veng Local (Lunglei) : Rs. 510.00/-
5. College Veng Local (Lunglei) : Rs. 200.00/-
6. Sist. Rozami : Rs. 10.00/-
7. Sist. Thankhumi : Rs. 100.00/-

Thilpek dang, hetih hun laia Project Officer, Pu Thuamkunga’n Petromax thar min pe. A chungah kan lawm hle, Upa R. Lalthuama, Pukpuiin Khuangpui, Bro. Lalzarmawia, Sertlangpuiin Khuangte min pe a, anmahni avangin kan zai ve thei a, an chungah kan lawm hle a ni.

Dt. 1.5.1990-ah Sist. H. Zatluangi, Sialsuk chu Hindi Teacher-in a lo awm a, Sist. Thinlaihnemi, Bilkhawthlir chu Primary School Head Teacher-in a lo awm bawk a, member kan pung ve sawt a, a lawmawm hle.

KOHHRAN DIN A NI TA :

Kum 1991 February ni 18 (Monday) hian Sertlangpui Bialtu Pastor, Rev. Lianhranga leh Cherhlun Bialtu Pastor, CS Pachhunga te chu unau thenkhat te nen Changpui atangin an lo phei a, Sist. Zoziri te chhungin Isua hmingin Baptisma an chang a, Kohhran member 30 bawr vel kan ni ve ta a, Kohhran Form mai chu tha an tih avangin Pastor CS Pachhunga thurawn angin Rev. Lianhranga chuan Kohhran a form ta a ni.

Kohhranpui :

Missions Department :

Ladies Auxiliary Department :

Sunday School Department :

BIAK IN SAK TAN A NI :

Kan sum hmuh tling khawm atangin Thing zaitir a ni a, thingril ban zawm turte lei a ni a, Dt. 25.6.1991 (Saturday) hian Biak In sak tanna hnatlang neih a ni. Kan vaiin mi 10 kan ni. Ban khurte kan laih zawh hnuin Evan R. Lianzuala’n hunserh a hmang a, Bible a chhiar zawhin ban khur laihna bulah kan za vaiin Pathian hnenah inhlanna kan nei a, a foundation tur kan phum ta a ni. Memberte kan phurin kan hlim tlang a, kan thawk tam hle a ni.

Biak In hi a bang dap a ni a, Skirting pawh a hrana siam a ni lo a, a chung Rangva hi District-in min tumsak a, Dt.26.6.1991-ah Work Camp nei turin Lunglei atangin RK Khiangte hovin mi eng emaw zat an lo kal a, Sertlangpui atangin Rangva hi an lo pu thla a, Sertlangpui unauten an rawn zui bawk a, a chung te chih fel a ni a, Bro. P. Lalhunthanga’n Vawk a talh a, hlim takin mikhual lo kalte nen chaw hlui kil hona neih a ni.

BIAK IN HAWN :

Inkhawm theihin Biak In peih a ni ta a, a hawnna neih ve ngei tha kan tih avangin Dt. 31.3.1992 (Saturday) ah hawn ni se tiin Local Church Board in a rel a, vawk 55 inches-a lian, Rs. 5,400/- a leiin hetih hun laia District PYD Secretary, Rev. Ralkapkunga Khiangte-in Pathian hnenah hlanin a hawng. Bialtu Pastor PR. Dawla’n Pathian thuchah a sawi bawk. Vantlang huapin ruai buatsaih a ni.

Ni 15.2.1992-ah Mualthuam ‘N’ Vengchhak Local PYD ten min rawn tlawh a, an rawngbawlna a nungin kan hlawkpui hle. Dawhkan (Table) pakhat min siamsak a, an chungah kan lawm hle. Dt.21.2.1993-ah Isua hmingin mi 10 in Baptisma an chang a, chhungkaw khat lawm luh an ni bawk. Dt. 27.4.1993 khan Lungsen Chhim veng atangin Upa R. Dengvuana, Bro. Rinsanga leh Zara te chu Pulpit min siamsak turin an lo kal vang vang a, an chungah kan lawm hle a ni. Kum 1996-ah Vuakmual atangin Upa C. Hrangthantluanga te chhung an lo pem a, (anni hi UPC ni sa an ni) 2003 khan Pu C. Thangzika te chhung leh Pu PC Rochungnunga ten Isua hmingin Baptisma an chang bawk a, Kohhran member pawh 50 bawr vel kan ni ve ta. Lalpa chu fakin awm rawh se.

1995-1996 chhung hian Biak In hi Repair a ni a, kum 18 dawn kan luah leh hnuin kum 2014 khan Biak In thiat lovin a aia lian leh tha deuh zawk turin (22ft X 33ft) sak hnan a ni a, a ban hi liang thlengin kan chhung a, skirting chin chhun a ni bawk. A bangah Tiles hman a ni a, a Ceiling pawh Tile hmanga siam a ni. Thutthleng nghen chhan nei tunah chuan kan nei ve ta.(as on 2021). Biak In chung Rangva hi District atanga min tumsak a ni bawk a ni.

Kawng hrang hrangah hma kan sawn ve zel a, Buhfaithamah pawh thahnem kan ngai tlang a, Member zata chhutin District-ah pawh lawmman pakhatna leh pahnihna te kan hauh pha vein, kum li (4) lai mai chu a zawnin lawmman kan dawng ve tawh a ni. Thawhlawm lamah pawh hma kan sawn ve zel a, Kohhran member tlem ngaihtuah chuan kan thawh tha ve viau zel e. Kohhran din tirh laia Rs. 8, Rs. 9, Rs. 10 te ni thin kha, tunah chuan Rs. 400, 500 te kan lo thawh ve thei ta a, a lawmawm tak zet a ni.

Pulpit pawh Upa C. Lalhlupuia, Thenhlum Local siam mawi tak kan nei ve tawh bawk. Inkhawm Dar atan Thenhlum Local hian Truck Wheel reem min pe a, tun thleng hian kan la hmang a ni.

Tuna Lungchem Local hruaitute :