RAMRIKAWN LOCAL CHANCHIN

Ramrikawn Local UPC hi kum 1972, rambuai sawi khawm kir leh, hnahchang khaw chhuak mi thenkhat ten an din a ni a, an din tirh lai a puipa deuh te chu :
Chairman : Thangzuala
Secretary : Thankima
Treasurer : Hmingthanga
1) Darchhunga
2) Raltawna
3) Zatawna
4) Haukhumi
5) Laiveti te an ni.

A hnu rei vak lovah, Kohhranah chak lohna neuh neuh te an lo nei a, hun rei vak lo chhung chu Biak in te pawh luah lum hlei thei lovin an awm a, Kum 1983-ah Pu Saikhuma, Lineman P&E Department lo awmin, aniho hian Biak in tlabal tawh tak chu an chei tha ve leh a, 1985-ah Pastor R. Lalrosanga rawngbawlna atangin, Pu PC. Lianhlira te chhungkuain Baptisma changin, Kohhran an rawn zawm ve leh a, 1986-ah Pu PC Lianhlira chu Upa atan hlan kai a ni. Kum 1988 kumah Local Chairman a tan dah a ni a, hetih lai hian Upa Vanlalngaia chu Secretary a ni. Hemi hnu deuh Kum 1995 kum hian Upa PC Lianhlira chuan General License lain, vawin thleng hian Ramrikawn Local Chairman hna hi a la thawk chhunzawm ta zel a ni.

Kum 1989 Chapchar laiin Rev. Lerthasunga ho ten Ramrikawnah hian Crusade an nei a, Crusade hlawhtling tak niin khawtlangin an hlimpui em em a, Kohhranhote pawh thuthlungah a vaw nghet hle a ni. He mi hnu lawk hian Evan PC Rokima ( College Veng Lunglei) chuan a thiante nen rawngbawlna an nei ve leh a, He mi tum hian Sist. Neihthangi te chhungkuain Thuthlung hmuin Kohhran an zawm ve leh bawk a ni.

Kum 1995-a Kohhran a buai lai vel khan, member tam zawkin Mizoram UPC zawmin an lo chhuahsan ve leh a, hetih lai hian Kohhran pawh a buai ve hle mai. Chhungkaw thum chauhin Kohhran hi an enkawl a ni. A hnu lawk kum 1997-ah Kohhran kut ke ber pakhat, Sist. Haukhumi’n chatuan ram panin a awm lohsan leh ta zel bawk a, Evan PC Lianhlira te leh Sist Neihthangi te chhungkua chauhin Kohhran hi an enkawl ta a ni.

Kum 2001 November thlaah Reiek lam atangin Bro. Zothanzuala te chhungkua chu Ramrikawnah hian lo pemin awm hmun an rawn khuar ve leh ta hlauh mai a, Kohhranah mi tangkai tak niin, Kohhran Secretary atan ruat a ni chhunzawm a, tun thlengin he mawhphurhna hi a la chelh chhunzawm ta zel a ni. Kum 2006 kumah Sist. Lianzami te nufain belh ve lehin, ani hi Kohhran tan mithahnemngai tak niin, Kohhran Treasurer atan ruat a ni ve leh bawk.

Biak in hi vawi 4 emaw lai sak that a ni ve tawh a, tuna an luah mek lai hi a lo rawp deuh tawh avangin, 2016 kum kha repair that leh a ni a, a chung tur hi District Kohhranpuiin tumin, Bialtu Minister-in Lungrem na tur Rs. 70,000/- a lo pek ve atangin leh, an sum balance hmangin an tuaihnum tha ve leh a ni. Tunah hian Kohhran an pachhe ve rih hle a Member 21 awm mekin General License Holder pakhatin a ho mek a ni.

2025-2026 Kohhran hruaitute : Chairman : Evan. PC. Lianhlira
Secretary : Upa Zothanzuala
Treasurer : Hmangaihropuia