UNITED PENTECOSTAL CHURCH (NEI) LUNGMAWI LOCAL CHANCHIN

United Pentecostal Church (NEI) Lungmawi Local chu Pathian kaihhruainain kum 37-na a hmang mêk a, tun hun min hruai thlengtu kan Pathian, a hming Lal Isua chu fakin awm rawh se.

United Petecostal Church (NEI) Lungmawi Local hi a din tirh atanga chhut chuan kum 50 vel chu a ni tawh ngei ang. Mahse, rambuai avang leh sawi khawm avangin Kohhran tia kalpui theih a ni ta lo va. Tichuan, Lungmawi tlânga awm chhoh leh hnu, kum 1984 khan UPC Lungmawi Local chu din chhoh leh niin, tun thleng hian Pathian kaihhruainain a kal chho ta zel a ni.

Kum 1962 velah Evan. Chuauruma chu Lungmawi tlangah rawn kalin rawngbawlna a rawn nei a, Baptist lam unaute pawhin an lo ruai ve thin a ni. Upa Haubuanga Inah zaikhawmnate neiin hlim takin hun an lo hmang thin a. Mahse, UPC-a han lak luh mai theih erawh an la awm lo. Kum 1963 April thlaah Pastor Hrantlinga chu rawn kal lehin, rei cham lovin a haw leh a, a hnua a rawn kal leh chuan, Upa Haubuanga leh Pi Zapuii leh midang thenkhatte chuan Baptisma an chang ta a, Upa Haubuanga ho chuan UPC din a lo ni ta a a ni.

Kum 1965 a lo her chhuah meuh chuan Kohhran member pawh 50 lai an lo tling chho ve ta a, Biak in te sualin hun an hmang chho ta a. Biak in hmun atan Bungveng lam pan pheina (Tuna VC Hall awmna) kawng chhak lamah a hmun te laiin, Biak in an sa ta a ni.

UPC Lungmawi Local Kohhran hruaitu hmasate chu:
Chairman : Upa Haubuanga
Secretary/Treasurer : Upa Thasiama

Tichuan, kum 1965-ah Kohhran khaipa ber Upa Haubuanga chuan chatuan ram min pansan a, Kohhran chu a tiavai ve deuh a. He mi kum vek hian Pastor Hrangchhina chuan, nu nau eng emaw zat rawn hruaiin rawngbawlna a rawn nei leh a, a rawngbawlna atang hian Bro. H. Enmawia leh Bro. Lawmzuala ten Baptisma changin, a hnu deuhah Bro. Lawmthanga’n Baptisma a chang leh a, Kohhran pawh theihtawp chhuahin an kal chhohpui leh ta a ni.

Kum 1966 a lo her chhuah hnuah, Mizoram chu rambuai ni chhovin, Lungmawi khua pawh rambuai avanga hal a nih tak avangin, mi tin maite chu sa him nan, ramhnuaiah leh hmun hrang hrangah tlan darh a lo ngai ta a. Pathian biak ho leh Kohhran kalpui zel theih a nih tak loh avangin, Kohhran anga awm chu a theih ta lo a ni.

Kum 1967- ah Pangzawl hmunah sawi khawm a ni chhova, Lungmawi khaw mite pawh Krismas leh kumthar inkar velah, Pangzawl sawi khawmna hmunah awmtura tih an ni a. Khaw hran hran awm khawm an nih avangin khua leh khua, Kohhran tê têa inkhawm a theih lo va, a huhova Pathian biakna neih thin a ni. Chutih lai chuan kum 1968-1969 velah Rev. Lalthima (Pangzawl bialtu) chuan Bro. H. Enmawia chu rawngbawltu puitlingah a dah a, Pangzawl sawi khawmnaah hian kum 5 (1968- 1972) chhung a awm a ni.

Rambuai a zia deuh hnu kum 1972-ah mahni khaw lam pan theih a nih hnuah, Lungmawi khuate paw’n mahni khaw lam pan mahse; khaw hmun pangngai chu thleng chho mai lovin, Tuikawi kamah kum 1972 chhung hian inbawk leh phawt a ni a. Kum 1973 thal laiin tuna khaw hmunah hian awm/luh chhoh a lo ni leh ta a ni.

Kum 1973-1984 inkar chho vel hian, UPC Kohhran hi member 10 vel niin Bro. H. Enmawia te inah inkhawm thin a ni. Heng member 10 te hi UPC Kohhranah lo awm ve tang tangin theih tawpin an lo kalpui ve hram hram thin a ni.

Kum 1974-ah BCM Kohhran lamah hlimna a rawn thleng a, hmangaihna ram a tel avangin Baptist Kohhran member thenkhat ten hrethiam lovin, Baptist Kohhran kha a rawn khi tan a, hemi avang hian Baptist Kohhran member thenkhat ten, UPC Pastor chah lut turin thurawnte an pe thin a. UPC Pastor te an rawn kal lawk theih loh avangin, Lungmawi khawtlang boruak hriain, Isua Kohhran Pastor J. Laltluanga leh a thiante lo lutin, BCM Kohhran atangin member 30 chu chhuakin, Pu Laldenga Inah Isua Kohhran a rawn din ta a ni.

Tichuan, kum 1974-ah Bro. Laithuama, Bro. Dozinga, Bro. Lawmthanga leh Bro. H. Enmawia te leh member tlem te la awm ten, UPC Biakin chu sak tan leh an tum a. Thingril leh hmanrua châk dangte la khawmin theih tawp an chhuah leh ta a. Mahse, tul dang avanga Bro. Laithuama te Aizawl lamah an pem tak avangin, Biak in pawh an sa thei ta lo va, Isua Kohhran lam chuan UPC Biak in hmun chu Biak in sak nan an dil a, remtihsak an nih angin, UPC Biak in hmunah chuan Biak in sain, hmanraw lak sate pawh Isua Kohhran lamten an hmang tangkai ta a ni.

Hun a liam leh hnuah, Haulawng bialtu Pastor Rualchhina chuan UPC member- la awmte chu rawn tlawh pahin, rawngbawlnate a rawn nei a, mahse UPC-a lut mai tur an la awm lo a, kum 1982-ah Haulawng bialtu Pastor tho, Pastor Rodawla leh Upa Rohlira chuan unau eng emaw zat rawn hruaiin, Lungmawi khuaah UPC din leh turin rawngbawlna hrang hrangte an rawn nei leh a. Nimahsela, Isua Kohhran an lo din ngheh tawh avangin, UPC Kohhran chu an din thei ta chuang lo a ni. Chung hun lai chuan Isua Kohhran Headquarter lamah Bible Society member nih duh leh duh lo an awm avangin, buaina neuh neuh a awm chho ta a, Lungmawi khawtlanga Isua Kohhran pawh Headquarter boruakin a rawn chiah ve takah chuan, buaina neuh neuhte awmin, Isua Kohhran chhungah khi a lo awm tan ta a ni.

Tichuan, kum 1984 lo her chhuakin Haulawng Bial chu then a lo ni a. Haulawng Bial atangin Chhipphir Bial hawn thar a ni a. Lungmawi pawh Chhipphir Bialah rin luh niin, Chhipphir Bialtu atan Pastor F. Aihrima chu ruat a ni a. Chumai ni lovin District Mission Department chuan Mission-in a rawih lai, Evan. R. Lalrosanga chu rawn dah telin, Pastor F. Aihrima nen Lungmawi khawtlangah kum 1984 April thlain rawngbawlna an rawn nei a, hemi hma hian Pathianni chamin an lo kal tawh a. Chumi hnua an lo kal lehin, Evan. R. Lalrosanga chuan Lungmawi khua chu a chamchilh nghal ta a. Thla thum chhung zet rawngbawlna a neih hnuah, Isua Kohhran atangin member 30 chu UPC-ah luh an duh tak avangin, District hruaitute hriattir nghal a ni a. Tichuan, District lam atangin Rev. H. Lalruata leh LAD President Sist. Tialnawni bakah, Bro. Sanglawta te rawn kalin, Dt. 8 July, 1984-ah Bro. R. Lalrema inah, United Pentecostal Church (NEI), Lungmawi Local chu din thar/that leh a lo ni ta a ni.

Dt. 16 April, 1985-ah Hnahthial Bial chu then niin, Pangzawl Bial thar hawn a ni a, Pangzawl Bial tharah hian Lungmawia Kohhran dinna kawnga sulsutu, Evan. R. Lalrosanga chu Pastor-ah lutin, Pangzawl Bial tharah chuan Bialtu Pastor atan ruat a ni a, Lungmawi khua pawh Chhipphir Bial atangin Pangzawl Bialah rin luh ve a ni nghal a, tun thleng hian Pangzawl Bialah UPC Lungmawi Local chu a awm ta a ni.

UPC Lungmawi Local hi kan tam lai berin member 114 kan tling ve a, nimahsela, member thenkhat pem chhuak leh boral an awm ve zel avangin, member hi pun lam aiin kiam lam kan pan zel a, tunah hian member 74 kan awm mek a ni.

Department Hrang Hrang Din Hun leh Lawmna: 1. Ni 9 July 1984-ah LAD din a ni.
2. Ni 15 July 1984-ah PYD din a ni bawk.
3. Kum 2000 khan PMD din a ni.
4. Ni 12.7.1984 khan Missions Department din a ni bawk.
5. Kohhran din tirh atangin Sunday School Department hi kalpui niin, tun thlengin la kalpui chhoh zel a ni.
6. Kum 2012 khan Building Committee din a ni a, Biak in saknaah a sulsutu berte an ni.
7. Ni 8 July 2009 khan Silver Jubilee lawmna hun hmangin, Jubilee lungphun hi Rev. R. Lalrosanga’n a hawng.

2025 - 2026 Kohhran hruaitute: Chairman : Upa Lalrema
Secretary : Bro. Lalramenga Chawngthu
Treasurer : Bro. Chanchinmawia