KOHHRAN DIN DAN LEH BIAK IN NEIH DAN

Kum 1963-64 hian Pi Kapthangi leh Pi Japanliani te chu Kohhran member hmasate an ni a, 1966 ram buai dâwn tan kumin Pu Lalmuana leh Pi Nuzawni te nupa-in, Pastor Chuauruma kutah Baptisma an chang leh a, 1964 kuma Pu J. Thantluanga te chhung Darngawn atanga lo pem, zirtirtu chhungkawhoin an awm leh a, hetih lai hian Pu Thantluanga inah an inkhawm thin a, mahse Kohhran ang chuan an la kal (function) lo, biak in hmun tur leiin, chu chu tuna tlang sânga Sub-Center hmun khi a ni.

Ramhnuaiah kum khat an awm a, 1968-ah khua an kai leh a, tah hian Pu Lalmuana inah an inkhawm thin a ni. Hemi kum hian Pu Thanhranga leh Pu Munga, Pi Khawlliani te chu UPC-ah lo lutin, he tih lai hian Pu Liantluanga te nupa an awm ve bawk a ni.

1969-1971 kum hi hruai khawm a ni a, 1972-ah hruai khawm kîr leh hnuin Biak in hmasa ber sak tan a ni a, a dung 20ft, a vang 15ft-a sak a ni. Tuna UPC biak in hmun ngai tho hi a ni. Hemi hnu hian Kohhran pangngai anga ruahmanna neih niin hruaitu tur pawh ruat nghal a ni bawk.

KOHHRAN HRUAITE (1972)
Chairman: Upa Lalmuana Pautu
Secretary: L. Thanhranga
Treasurer: Rbt. Chhuanvawra

Kohhran member hi 15 (sawmpanga)vel an ni a, chumi hnu deuh 1976 kum hian Pu Zomawia te nupa leh Pi Thangzauvi te chu Pastor Rodawla kutah Baptisma changin, a hnu deuhah Pu Unianthanga, Pu Khawlrumliana te nupa, Pi Kapdaii leh Pi Rothangi leh a fate an lo lut leh a, 1982-1986 inkarah Pu F.Chhuana te, Pu C. Rammawia te an lo lut leh a, tichuan biak in pawh, a dung 24ft leh a vang 15ft-in sak that leh a ni.

KOHHRAN HRUAI RUAT THAR TE
Chairman: Upa Lalmuana
Secretary: Evan. Thanhranga
Treasurer: Rbt. Chhuanvawra
LAD President: Pi Nuzawni
LAD Secretary: Pi Khawlliani

1984 kumah Pu Thanhranga a boral a, Kohhran pawh in-form chhoh zel a ni. Thli chhiain biak in a tih chhiat avangin Pastor Zohmingliana hova sak that leh a ni a, a dung 30ft leh a vang 15ft-in, a chung tur rangva 4 bandel chu Pu Keuva'n a tum a ni. Heng hian 1990 leh a hnu enge maw chen chu a awh chho a ni. Heng hun lai hian member pawh 30 chuang an ni ve tawh a, Kohhran pawh tha takin an kal chho ve zel a ni.

1984 a lo nih leh chuan Pu Zomawia pawh tirhkoh hial a lo ni chho ta a, Kohhran Chairman hna pawh, ani leh Unianthanga leh Khawlrumliana te hian an inthawh chhawk zak zak thin a ni. Hun a kal leh deuh, thenkhat an pem chhuak a, thenkhat mual an lo liam bawk nen, Kohhran pawh a pa chhe leh zeuh thin. Mahse Lalpan a awmpui a, Kohhran member pawh pung chho ve zelin, 2004 bawr velah phei chuan Kohhran member pawh 70-80 lai an lo ni ta a ni.

Chutih lai mek erawh chuan sualin nasa takin hna a lo thawk ve bawk a, hruaitu leh hruaitu inkarah te, member leh hruaitu inkarah te, member leh member inkarah te, eng eng emaw inhmuh thiam lohna lo pian chhuah tirin, chu chuan Kohhranho pawh pun leh zual aiin, ral lam an lo pan leh ta zawk a ni.

2010 a lo inher chhuah meuh chuan, mahni ke pawha ding hlei thei an lo ni ta si lo a, chu chu Bialtu Pastor leh bial Kohhranho chuan vei em emin, 2011 bial Mission Conference, Bunghmun Local-a neihah chuan District Missions Department hian field-a min hawnsakin thawktu min dahsak se tiin District Mission Conference-a thlen turin an rel a, an han thlen ta ngei a. District Conference chuan lo pawmpuiin a lo pass ta a ni.

Dt 8.1.2012-ah chuan Rev. C. Darkhuma, Director, Mission Department, Lunglei District, Lunglei chuan field ni turin a puang a, a hawng nghal bawk a ni.

Thawktu tur R. Lalthlamuana, Sekhum chu Director-in lak luhna a nei nghal a ni. Hetih lai hun hian Kohhran member-te hi Pi Japanliani, Remtluanga (Japani fapa) leh Sangpui w/o Siamlal Murmu-a te chauh an ni tawh a ni.

Hun a kal chho zel a, thawktute thawhrimna Lalpan malsawm zelin member pawh an lo pung ve hret zel a, biak bûk pawh sak that a lo hun chho ta. 2016 kum tir lam atangin hma lak niin, Bialtu Pastor te, thawktu (field incharge) te leh bial hruaitute leh member te inpekna nen, chak taka sak niin bial PYD te phei chuan Work Camp te neiin, sak zawh hma chu an thawk reng zel a, peih fel a lo ni ta.

21.1.2017-ah Bunghmun Bialtu Pastor LH. Lalchhandama chuan biak in thar a hawng a, ruai nen ropui taka lawm a ni.

District Mission Department-in field-a a puan atanga vawiin thlengin, thawktu hi mi 6 awm tawhin, a thente phei chu Pastor-ah hial an lo awm tawh a ni.

TUN DINHMUN
Laisawral Local-ah hian tun dinhmun (2025 Half yearly Statistic Report) ah Member 5 (Mipa 1, Hmeichhia 4) an awm mek a ni.